Rusiya prezidenti Vladimir Putin Səmərqənddə keçirilən ŞƏT sammitində jurnalistlərin sualına cavab olaraq deyib ki, Ermənistan və Azərbaycan sərhədindəki son insidentin Qarabağla (Rusiya sülhməramlılarının məsuliyyət zonası nəzərdə tutulur) heç bir əlaqəsi yoxdur:
“Son sərhəd insidentinin Qarabağla ümumiyyətlə heç bir əlaqəsi yoxdur, bu, tamam başqa regiondur, Ermənistan-Azərbaycan sərhədidir”.
O, vurğulayıb ki, bu konfliktin lokallaşmasında həm də Rusiyanın təsiri oldu:
“Biz baş verənlər və itkilərə görə, əlbəttə ki, təəssüf edirik. Xüsusilə və ilk növbədə Rusiyanın da təsiri ilə bu münaqişə lokallaşdırıldı, ümid edirəm ki, bu, belə də davam edəcək”.
Doğrudanmı, sərhəddə baş verənlərin Qarabağla heç bir əlaqəsi yoxdur, yoxsa Putin bununla hansısa siyasi manipulyasiya edir?
Azad Vətən Partiyasının sədri Akif Nağı “Bakı-Xəbər”ə açıqlamasında bildirdi ki, Putinin bu ifadələri işlətməsi müxtəlif cür yozula bilər: “Hansı mənanı ifadə etmək istədiyini özündən başqa kimsə deyə bilməz. Mən bunu belə şərh edərdim ki, artıq Putin də Azərbaycanın mövqeyi ilə razılaşır. Azərbaycan dəfələrlə bildirib ki, artıq Qarabağ məsələsi bitib və kimsə bu adla hər-hansı təşəbbüslər etməsin. Putinin bu açıqlamasında Azərbaycanla Ermənistanın arasında olan delimitasiya və demorkasiya məsələsinə işarənin olduğu qənaətinə daha çox gəlmək olur. Söhbət sərhədlərin dəqiqləşdirilməsindən gedir. Bu proses Zəngəzur bölgəsində xüsusi əhəmiyyət kəsb edir. Həmin bölgədə Ermənistanın hələ də razılaşmadığı məqamlar var. Bu qarşıdurma da həmin razılaşdırılmamış məqamlarla ola bilər. Çox güman ki, Putin həmin məsələyə işarə edir. Qarabağla bağlı uzun-uzadı müzakirələrin aparılmasına ehtiyac yoxdur. İndiki məqam üçün zəruri olan iş
sərhədlərin dəqiqləşməsidir. Putin bu mövzunu dəstəkləməklə Azərbaycanın mövqeyini dəstəkləmiş olur. Regionda marağı olan ABŞ bu mövqe ilə razılaşmır. Qarabağ adlı köhnəlmiş mövzunu gündəmdə saxlamağa çalışır. ABŞ Nümayəndələr Palatasının sədrinin Ermənistana səfər etməsi və orada verdiyi açıqlamalar həqiqətən də, müəyyən reallıqları ortaya çıxarır. Görünən budur ki, ABŞ regionda təsir gücünə malik olmaq istəyir. Ancaq hiss edilir ki, olduqca ehtiyatla davranırlar. Hətta KTMT-dən Ermənistanın çıxmalı olub-olmadığı ilə bağlı ona ünvanlanan suala olduqca diplomatik cavab verdi. Dedi ki, Ermənistan bu təşkilatın üzvüdür və həmin təşkilatın regiona ciddi təsir gücü var. Bu onu göstərir ki, Ermənistanı tam olaraq Rusiyanın orbitindən çıxarmaq barədə düşünmürlər. Amma bununla yanaşı təsir imkanlarını artırmağa da çalışırlar. Putinin məlum açıqlaması həm Azərbaycanın mövqeyinə uyğundur, həm də region uğrunda ciddi qarşıdurmanın olduğuna bir işarədir. Eyni zamanda bununla ABŞ-ın təşəbbüslərinin əbəs olduğunu nəzərə çatdırmaq istəyir”.
Məhəmmədəli QƏRİBLİ
