Soros Açıq Cəmiyyət Fondu Bakıya diplomatik təzyiq göstərməyə çağırıb. Bu barədə Azərbaycan mətbuatında amerikalı milyarder Corc Sorosun təsis etdiyi Açıq Cəmiyyət Fondunun “Twitter” səhifəsinə istinadən məlumat verilib. “Biz beynəlxalq ictimaiyyəti son bir həftə ərzində 200-dən çox hərbçinin ölümünə səbəb olan şiddətli döyüşlərin başlanmasından sonra Ermənistanın Azərbaycanla sərhədində atəşkəsi gücləndirmək üçün təcili addımlar atmağa çağırırıq.
Bu həftənin əvvəlində Azərbaycan qoşunları Ermənistan “ərazisini”, o cümlədən “mülki infrastrukturu” atəşə tutmağa başlayıb, daha sonra beynəlxalq sərhədin Ermənistan tərəfindəki əraziləri ələ keçirib.
Döyüşlər 2020-ci ildə iki ölkə arasında baş vermiş altı həftəlik müharibədən bəri ən qanlı döyüşdür. Bu döyüşlərdə minlərlə insanın Azərbaycanın sərhədləri daxilində yerləşən Qarabağda “erməni anklavına” nəzarət uğrunda həlak olduğu bildirilir.
2020-ci il müharibəsində döyüşlər və iki ölkə arasında əvvəlki münaqişələr əsasən beynəlxalq hüquqa görə Azərbaycanın tərkib hissəsi sayılan Qarabağla məhdudlaşıb.
Biz Aİ və BMT-ni Azərbaycan qoşunlarının Ermənistanı tərk etməsini və döyüş əməliyyatlarının bərpa olunmamasını təmin etmək üçün, o cümlədən atəşkəs monitorinq qruplarını yerləşdirməklə, habelə Bakıya sülh danışıqlarına qayıtmaq üçün diplomatik təzyiq göstərməklə addımlar atmağa çağırırıq”, – deyə məlumatda qeyd olunub.
“Soros dairələrinin fəallaşmaları mövsümi xarakter daşıyır və tutar qatıq, tutmaz ayran prinsipinə söykənir ki, bu da ciddi siyasət hesab edilə bilməz”
“SƏS” qəzetinin baş redaktoru, siyasi ekspert Bəhruz Quliyev mövzu ilə bağlı “Bakı-Xəbər”ə açıqlamasında “Fikirlərimə Müzəffər Ali Baş Komandanımızın hər birimizin eşitdiyi bəyanatı ilə başlamaq istərdim – Bizə heç bir qüvvə diktə edə bilməz və heç kimə də göstəriş vermək ixtiyarı verilməyib. Əslində həmin bəyanatın bu gün də və hər zaman aktual qalması sözügedən mövzu ilə əlaqələndirilə bilər. Bildiyimiz kimi, Soros faktoru daim anti-Azərbaycan xarakterli qurum kimi tanınır və bu baxımdan, həmin qurum daxilində fəaliyyət göstərən ayrı-ayrı şəxslər, təşkilatlar, siyasi dairələr əllərinə düşən hər fürsətdəcə gözlənilən münasibətlərini ortaya qoyurlar. Ona görə də belə fikirlərdən təəccüb etməyə dəyməz” deyə bildirib. Onun sözlərinə görə, Soros Açıq Cəmiyyət Fondunun Bakıya diplomatik təzyiq göstərməyə çağırış etməsi arxasında dayanan daha bir faktor Sorosun ABŞ-ın demokratlar cinahının maliyyələşdirməsi ilə əlaqələndirilə bilər: “Bildiyimiz kimi, Açıq Cəmiyyət İnstitutunun təməl prinsiplərindən biri Amerikadanın Demokratlar Partiyasını maliyyələşdirmək və lazım olduğu halda idarəçilik mexanizmlərinə təsir etmək məqsədini güdür. Nəzərə alsaq ki, amerikalı demokratlar əsasən sırf ermənipərəst mövqeyində dayanırlar və eyni zamanda daim belə olub, onda həmin məsələnin haradan və nə üçün qaynaqlandığını da aşkara çıxarmaq çətinlik yaratmır. Fakt budur ki, son proseslərdə, xüsusilə sentyabrın 12-dən 13-ə keçən gecədən etibarən müəyyən olunmamış sərhədlərimizdə ermənilərin təxribat-diversiya aktlarının qarşısının qətiyyətlə alınması ABŞ-dakı dairələri ciddi narahat etməyə başladı. Və daha bir fakt budur ki, ABŞ minlərlə km uzaqda olsa belə özünü zorən regiona sırımağa cəhdlər göstərir. Götürək, mövcud ABŞ iqtidarının üçüncü şəxsinin – Nensi Pelosinin Ermənistana səfərini və orada açıq-aşkar Azərbaycan əleyhinə səsləndirdiyi bəyanatlarını və s. Sizi inandırım ki, bu gedişlərin də arxasında Soros və onun Açıq Cəmiyyət İnstitunun barmağı vardır. Üstəlik, Qərbdə özlərini “dissident” kimi sırıyan xainlərin, habelə ölkəmizdəki satqın radikal müxalifət təmsilçilərinin də fəallaşmaları, daha dəqiq desək, erməni maraqlarını müdafiə etmələri kələfinin bir ucu məhz həmin amilə söykənməkdədir. Yəni Soros fondunun fəallaşması, əl-ayağa düşməsi artıq şəbəkə xarakteri almağa başlayıb”.
Siyasi ekspert hesab edir ki, bənzər hadisələr daha əvvələr də müşahidə edilib, amma heç bir nəticə əldə olunmayıb: “Bəli, ola bilsin ki, son proseslər çərçivəsində Soros dairələri əvvəlkilərdən də artıq şantajlara, siyasi sabotajlara əl atsın, amma bu o demək deyil ki, Azərbaycan həmin dairələri əlinin arxası ilə özündən kənarlaşdıra bilməyəcək. Xeyr, əsla belə deyil. Əksinə, Azərbaycan diplomatiyası daha dinamik iş prinsipinə arxalanaraq mütəşəkkil müqavimət göstərəcək. İlk növbədə isə xalqın hakimiyyətə, ümumən isə dövlətçilik marağına hədsiz dəstəyi belə psevdodemokrat ünsürlərinin sonunu daha da yaxınlaşdıracaq”.
Bəhruz Quliyev daha bir məqama da toxunaraq ABŞ-ın mövcud siyasətinin Avropa üçün də ciddi təhlükə siqnalları verdiyini bildirib: “Sirr deyil ki, Azərbaycan Avropanın enerji təminatında rol oynayır və əgər bu gün sorosçu dairələrin təkidi ilə Konqresdə ölkəmizə qarşı hər hansı qətnamələr və sanksiyalar tətbiq edilərsə məhz Avropa İttifaqı ölkələri bu kimi məsələlərdən ciddi zərər görə bilərlər. Fakt budur ki, Azərbaycan regional iqtisadi güc mərkəzi olması ilə yanaşı, həm də beynəlxalq miqyasda aparıcı ölkə olaraq öz sözünü deyir və hər halda, ABŞ-ın rəsmi dairələri də bunu yaxşı anlayır, dərk edirlər. Təbii ki, əgər onlar Açıq Cəmiyyət İnstitunun təkidlərinə əməl etməsələr bundan yalnız uda bilərlər. Əks halda, hər şey onların istədikləri kimi getməyəcək. Azərbaycanın regionda Türkiyə və Rusiya kimi real partnyorları, müttəfiqləri var və o cümlədən, Gürcüstan faktorunu da buraya əlavə edə bilərik. Belə olan halda Soros dairələrinin fəallaşmaları mövsümi xarakter daşıyır və tutar qatıq, tutmaz ayran prinsipinə söykənir ki, bu da ciddi siyasət hesab edilə bilməz”.
İradə SARIYEVA
