Rusiyada bələdiyyə deputatlarının ölkə Prezidenti Vladimir Putinin qəbuledilməz hərəkətlərini bəyan edən yeni müraciəti ortaya çıxıb. Moskva və Sankt-Peterburq şəhərlərinin 18 rayonunun bələdiyyə deputatları Rusiya prezidenti Vladimir Putinin istefası tələbi ilə petisiya imzalayıblar.
Azərbaycan mediası Rusiya mətbuatına istinadən bildirir ki, müraciəti Sankt-Peterburq deputatı Kseniya Torstrem Tvitter hesabında yayıb.
Moskva, Sankt-Peterburq və Kolpino şəhərlərinin 18 rayonundan olan bələdiyyə deputatları Rusiya Prezidenti Vladimir Putinin istefasını tələb edən ictimai bəyanatla çıxış ediblər.
Torstrem digər bələdiyyə deputatlarını da bu bəyanata qoşulmağa çağırıb: “Biz Rusiyanın bələdiyyə deputatları hesab edirik ki, Prezident Vladimir Putinin hərəkətləri Rusiyanın və onun vətəndaşlarının gələcəyinə zərər vurur. Biz Vladimir Putinin Rusiya Federasiyasının Prezidenti vəzifəsindən istefasını tələb edirik!”
Bildirilir ki, hazırda sənədi 19 deputat imzalayıb.
Qeyd edilir ki, bir müddət əvvəl Sankt-Peterburqun Smolninsk bələdiyyə dairəsinin Yabloko partiyasından olan 7 deputat da Vladimir Putinin prezident postundan uzaqlaşdırılması xahişi ilə Dövlət Dumasına müraciət edib.
“Bu hadisəyə “qiyam” demək bir az çətin olar, amma...”
Siyasi şərhçi Azər Həsrət bizimlə söhbətində bildirdi ki, bu heç də Rusiya vətəndaşlarının hamısının Putin kimi düşünmədiyini göstərir. A.Həsrətin fikrincə, həm sadə vətəndaşlar, həm də Putinin istifesı tələbi ilə petisiyanı imzalayan bələdiyyə deputatları açıq-aydın şəkildə görürlər ki, mövcud siyasət Rusiyanın sonunu gətirir. “Əlbəttə ki, Rusiyada hamı müharibə tərəfdarı deyil və Ukraynaya qarşı edilən təcavüzü dəstəkləmir. Əslinə qalanda Rusiya ictimaiyyətinin böyük əksəriyyəti Putinin bu hərbi təcavüzünə qarşıdır. Sadəcə olaraq ölkədə elə bir system tətbiq edilib ki, səsini çıxaran dərhal həbs edilir, böyük miqdarda cəriməyə məruz qoyulur. Ona görə də çoxları səslərini çıxara bilmirlər. Şübhəsiz ki, Dövlət Duması birbaşa Putinin nəzarətində olduğuna görə oradan da müxalif səslər çıxmır. Çünki onlar da birmənalı şəkildə Putinin adamlarıdır, ona “ləbbeyk” gedənlərdir. Amma müxtəlif bölgələrdən bu və digər formada az da olsa demokratik yolla seçilən yerli səviyyəli nümayəndələr, bələdiyyələr Putinə qarşı bu cür fikirləri səsləndirirlər. Yəni onlar öz ölkələrinin, xalqlarının taleyini düşünürlər. Putinin bu addımının, bu müharibəsinin yanlış olduğunun fərqindədirlər. Bu bələdiyyələr bir növ öz ölkələrini bu böyük bəladan xilas etmək üçün öz həyatlarını risk altına qoyurlar. Bu hadisəyə “qiyam” demək bir az çətin olar, amma bunu ümumilikdə fərqli və daha sağlam fikirlər kimi, qiymətləndirə bilərik. Bu Rusiya ilə bağlı ümidlərin tam ölmədiyi anlamına gəlir”.
A.Həsrətin sözlərinə görə, biz düşünə bilərik ki, Rusiyada heç də hamı təcavüz, qonşularla savaş dilində danışmağın tərəfdarı deyil, bu ölkədə həm də qonşularla dinc, yanaşı, normal yaşamağın tərəfdarı olan adamlar da az deyil: “Əslinə, qalanda onlar Rusiyanın xilaskarlarıdır”.
İradə SARIYEVA
