Rusiya-Ermənistan münasibətlərində son dövrlərdə müəyyən gərginliyin hökm sürməsi heç kimə sirr deyil. Bundan ən çox narahat olan isə Ermənistanın revanşist qüvvələridir.
Baş verənlərlə bağlı Ermənistan parlamentinin “Hayastan” fraksiyasının rəhbəri, keçmiş müdafiə naziri Seyran Ohanyan da etiraf edir ki, bu gün Ermənistan və Rusiya arasında münasibətlərdə dərin uçurum var. O qeyd edib ki, bundan məharətlə istifadə edən Azərbaycan regionda istəklərinə daha sürətlə çatır. Məsələ ilə bağlı “168.am” nəşri yazır ki, postsovet məkanında və Ermənistanda antirus əhval-ruhiyyəsi Rusiya üçün yeni deyil, xüsusən də Rusiya-Qərb müharibəsi münasibətlərinin indiki mərhələsində: “Qərbin daha aqressiv şəkildə anti-Rusiya dairələrini qızışdırdığı bir vaxtda bu normal prosesdir. Amma bu hal Ermənistanda özünü daha qabarıq büruzə verir. Son on ildə Ermənistanda Qərbin bu qədər dərin siyasi iştirakı müşahidə edilməyib. Aydındır ki, Qərb bütün mümkün cəbhələrdə işləyir və Ermənistandakı qərbyönlü dairələr Ermənistanın bütün problemlərinə görə Rusiyanı günahlandırmağa çalışırlar. Anti-Rusiya dairələri həmişə olduğu kimi özünü göstərir. O da faktdır ki, Rusiya media eksperti sahəsinin Ermənistana vahid rəğbətli münasibəti yoxdur, Rusiyada fikirləri ilə ciddi “iqlim” formalaşdıran qərbyönlü və Türkiyə-Azərbaycan tandemli dairələr də az deyil”. Nəşr bildirir ki, İrəvan şəhərində yerləşən “Sürməli” ticarət mərkəzində baş verən partlayışa Rusiyanın reaksiyası da bunun nəticəsidir: “Həmin partlayış Ermənistan üçün təkcə ciddi daxili nəticələri deyil, həm də çoxlarını təəccübləndirən xarici siyasi nəticələri ortaya çıxardı. Partlayışdan bir neçə gün sonra Rusiyanın İrəvandakı səfirliyi yerli informasiya məkanında Rusiyaya qarşı saxta ittihamlara görə Ermənistan Xarici İşlər Nazirliyinə etiraz notası göndərib. Qeyd olunub ki, Moskva bunu Rusiya-Ermənistan müttəfiqlik münasibətlərini pozmağa yönəlmiş böhtanların arxasında duran siyasi qüvvələrin birbaşa təxribatı kimi qiymətləndirir. Bəs “Sürməli” ətrafında yaranmış vəziyyətlə bağlı Rusiyanın bu qədər sərt diplomatik “şapalaq” vurmasına səbəb nə idi? Rusiya diplomatik dairələrinə yaxın mənbələrdən əldə edilən məlumatına görə, belə bir addım Moskvanın İrəvana qarşı son dərəcə pis “tonudur” və anti-Rusiya əhval-ruhiyyəsini yalnız partlayışla əlaqələndirmək sadəlövhlükdür. Bu, Moskvanın münasibətlərdə başlatdığı tondur və təəssüf ki, Moskva-İrəvan münasibətlərinin gələcək xarakterini müsbət mənada əvvəlcədən müəyyən edir. Səbəblər İrəvanda və Moskvadadır, çünki son illər Ermənistan-Rusiya münasibətləri əsl müttəfiqlik xarakterini itirib, o müttəfiqlikdən yalnız şablon qalıb. İrəvan Rusiyanı gözdən salmaq, “zərbələr” vurmaq fürsətini əldən vermirsə, o zaman Moskva nə üçün alyansın bütün yükünü daşımalıdır? Təəssüf ki, bu tendensiyadır, özü də Ermənistan rəsmiləri də bunu istəyir”. Qeyd edilənlər fonunda rusiyalı politoloq Stanislav Tarasov bütün bunların səbəblərinin İrəvanda olduğu qənaətini bildirib. O, narazılıqlarla bağlı iki qrup səbəb göstərib: “Rusiya Federasiyası çox ciddi səbəb olmadan belə nota verməzdi. Ermənistan-Rusiya münasibətlərində ciddi problemlər var, bunlardan biri də anti-Rusiya əhval-ruhiyyəsidir. Rusiya uzun müddətdir ki, bundan narahatdır. Bu nota ilə o əhval-ruhiyyənin və o əhval-ruhiyyəni yaradanların motivlərinin aradan qalxacağına dair illüziyalar yoxdur. Vəziyyətə görə Ermənistan səlahiyyətliləri məsuliyyət daşıyır”. O qeyd edib ki, danışıqlar İrəvanın xahişi ilə Moskva-Brüssel təyyarəsinə köçürülüb və bu, Rusiya Federasiyası üçün belə çətin mərhələdə Moskvanın mövqeyini zəiflədib: “Ermənistan hakimiyyəti Rusiya üçün etibarlı tərəfdaş və müttəfiq ola bilməyib və Rusiya üçün bütün əhəmiyyətini itirib”. Erməni ekspert Boris Navasardyan isə qeyd edir ki, son hadisələr birbaşa Rusiyanın Ermənistanın daxili siyasi proseslərinə müdaxilə etmək cəhdidir. Navasardyan “ordu.az” portalının məlumatına əsasən onu da qeyd edib ki, Ermənistana qarşı Rusiya indi çox nəzakətsiz davranır: “Sürməli” olayı ilə bağlı nota Rusiya Federasiyasının yolverilməz müdaxiləsi, erməni cəmiyyətinə psixoloji təzyiq idi. Erməni cəmiyyətinin strateji müttəfiqindən narazılıq etmək üçün çoxlu səbəbləri var. Rusiya həmin bəyanatla Ermənistan ictimaiyyətində günahkarlıq hissi yaratmağa çalışır. Rusiya müttəfiq kimi çıxış etmədi, ciddi dəyişiklik lazımdır”. Ermənistanın “Müstəqil Ermənistan” partiyasının sədr müavini Hovsep Qazaryan bildirib ki, Ermənistan və Rusiyanın maraqları bir-birinə ziddir: “Biz Rusiyaya başa salmalıyıq ki, siz yaxşı müttəfiq deyilsiniz”. Helsinki Vətəndaş Assambleyasının Vanadzor ofisinin rəhbəri, erməni hüquq müdafiəçisi Artur Sakunts da eyni mövqeni bölüşür: “Moskva bizimlə girov kimi danışır. Moskva başımızın üstündə asılmış “damokl qılıncı”dır. Hara kimi belə gedəcəyik? Bu nə deməkdir? Ermənistan Putin rejiminin hədəfinə çevriləndə hökumətin təslim olmaq üçün atacağı addım nə olacaq?”.
Samirə SƏFƏROVA
