Avqustun 22-də Azərbaycan Meliorasiya və Su Təsərrüfatı ASC-nin əməkdaşları yerli erməni mütəxəssislərin iştirakı ilə Qarabağın Ağdərə (keçmiş Mardakert) rayonunda yerləşən Sərsəng su anbarına baxış keçiriblər.
Bu hadisə son dərəcə əhəmiyyətli sayıla bilər, çünki bu, Qarabağ erməniləri ilə Azərbaycanın dövlət strukturları arasında 30 ildə əməkdaşlığın başlanmasının ilk sübutudur. Bu faktın özü xeyli dərəcədə psixoloji əhəmiyyət kəsb edir və erməni icması ilə Azərbaycan əhalisi və dövlət qurumları arasında daha geniş təmasların başlanğıcı ola bilər. Rəsmi məlumatda bildirilir ki, su anbarında texniki monitorinq aparılıb, anbardan suyun daxil olması və axıdılması qrafiki barədə məlumat alınıb. Azərbaycanın aran bölgəsində suvarılan torpaqların su təchizatının bərpası məsələləri müzakirə olunub. Belə görüşlərin müntəzəm keçirilməsi üçün razılıq əldə edilib. Bu su anbarı 1976-cı ildə tikilib və onun tutumu 560 milyon kubmetrdir. Anbar suları vaxtilə Bərdə, Tərtər, Ağdam, Ağcabədi, Yevlax və Goranboyda 96 min hektar əkin sahəsini suvarıb. Münaqişə illərində ermənilər Azərbaycanın aran rayonlarına su axınının qarşısını almışdılar ki, bununla da adıçəkilən rayonlarda kənd təsərrüfatının inkişafına böyük ziyan vurublar.
Qarabağda yaşayan ermənilərin Azərbaycanın rəsmi qurumu ilə ilk dəfə əməkdaşlığa getməsi nədən xəbər verir və gələcəkdə daha hansı addımlar atıla bilər?
Politoloq İlqar Vəlizadə “Bakı-Xəbər”ə açıqlamasında bildirdi ki, ilk növbədə bu, Azərbaycanın qüdrətinin göstəricisidir: “Digər tərəfdən isə Azərbaycanın yaratdığı yeni reallıqların yerli ermənilər tərəfindən qəbul olunmasıdır. Çünki bütün bu infrastruktur obyektlər bizim ərazimizdədir, onların da sahibi Azərbaycan dövlətidir. Ola bilər ki, hazırda həmin ərazilər Rusiya sülhməramlılarının müvəqqəti yerləşdiyi əraziyə təsadüf edir. Bu heç də o anlama gəlmir ki, həmin obyektlər Azərbaycan iqtisadiyyatına inteqrasiya edilməyəcək. Bizim mütəxəsisslərimizin Sərsəng su anbarına səfəri məhz bu xarakteri daşıyır ki, gələcəkdə bu obyekt tam olaraq bizim iqtisadiyyata inteqrasiya olunacaq. Şərti desək, inventarizasiya xarakteri daşıyan səfər olub. Bunun nəticəsində texniki parametrlər ölçülür və bununla bağlı müvafiq addımların atılması planlaşdırılır. Su anbarı çox mürəkkəb bir strateji qurğudur. Onun tam olaraq bizim nəzarətimizə keçməsi çox lazımdır. Çünki uzun illər ermənilərin nəzarətində olan həmin su anbarı kifayət qədər aşınmaya məruz qalıb, oradakı suyun Azərbaycana ötürülüməsinin qarşısı alınıb. Yerli ermənilər orada çalışan mütəxəssislər olublar. Çox güman ki, onlar bizim rəsmilərə anbarın real vəziyyəti barədə ətraflı məlumatlar veriblər. Su anbarı hazırda həm də risqli sayılır. Çünki onun istismar müddəti bitmək üzrədir. Uzun illər ərzində ermənilər orada heç bir əsaslı təmir işləri aparmayıb”.
Politoloqun sözlərinə görə, bu obyekt əslində yalnız enerji istehsalı ilə deyil, həm də meliorasiya sahəsinə töhfəsini verirdi: “ Ermənilər kobud şəkildə onun texniki parametrlərini pozub. Suyun əlavə həcmini vaxtlı-vaxtında bizim tərəfə buraxmayıblar. Bütün bunlar da bəndi təzyiqə məruz qoyub. Azərbaycan tərəfi öz bəndinə sahib çıxır və onun təmiri üçün nə lazımdı edəcək. Hesab edirəm ki, ermənilərin bundan sonra başqa çarəsi yoxdur. Onlar digər strateji obyektlərin də taleyini Azərbaycanın özünə tapşıracaqlar. Çünki həmin obyektləri saxlayıb təmir etməyə gücləri qalmayıb”.
Məhəmmədəli QƏRİBLİ
