Bugünlərdə Prezident İlham Əliyev Konya səfəri zamanı Şimali Kipr Türk Cümhuriyyətinin Prezidenti Ersin Tatarı qəbul etdi. Bundan sonra belə fikirlər səsləndi ki, Azərbaycanın Şimali Kipr Türk Cümhuriyyəti ilə bağlı siyasətində yeni mərhələ açıla bilər.
Hətta bəzi ekspertlər bu qənaətdədir ki, Qarabağın işğalda olduğu dönəmdə Şimali Kiprin müstəqilliyinin tanınması ilə bağlı tərəddüdlər artıq arxada qalıb. Bir müddət öncə Azərbaycan parlamentinin nümayəndə heyəti Lefkoşada oldu və Kipr türklərinin rəsmiləri ilə görüşlər keçirməklə yeni mərhələnin başlandığını diplomatik şəkildə elan etmiş oldu. Şimali Kipr Türk Cümhuriyyətinin Prezidenti Ersin Tatar deyib ki, Azərbaycan Prezidenti İlham Əliyevlə görüşündə yenidən Şimali Kipr Türk Respublikasının tanınması məsələsi qaldırıb: “Şimali Kiprin tanınması yaxın günlərdə baş verə bilər. Əliyevlə görüş çox səmimi keçdi, dünyaya siyasi mesaj verildi. Görüşümüz Yunanıstanı təşvişə saldı”. Türkiyənin mediasına müsahibəsində isə o deyib ki, tezliklə Azərbaycana səfər edə bilər. Belə ehtimallar var ki, Azərbaycan Türkiyənin ardınca ŞKTC-ni tanıyan ikinci dövlət ola bilər.
Azərbaycan indiki məqamda ŞKTC-nin müstəqilliyini tanıya bilərmi?
Politoloq Qabil Hüseynli “Bakı-Xəbər”ə açıqlamasında bildirdi ki, hazırkı məqamda belə bir addımın Azərbaycan tərəfdən atılması heç də məqsədəuyğun deyil: “Şimali Kipr Türk Cümhuriyyəti dünya tərəfindən tanınmayıb. BMT vahid Kipr anlayışından hələ də əl çəkməyib. Onun ətrafında müxtəlif gedişlər etdiyi bir zamanda bizim bu addımı atmağımızın heç bir faydası olmaz. Biz kiprli qardaşlarımızın haqq işini müdafiə edirik. Bu gün Azərbaycanın özünün ermənilərlə bağlı problemləri var. Onlar və havadarları bizdən status tələb edir. Bizim ŞKTC-nin müstəqilliyini tanımağımız ermənilərin əlinə ciddi əsaslar verə bilər. Ermənilər öz separatist addımlarını daha da sürətləndirə bilər. Mən inanmıram ki, Azərbaycanın siyasi rəhbərliyi bu qorxulu addımı atmağa razı olacaq. Bizim üçün məqbul olmayan presedentin yaranması bizə gərək deyil. Kiprin yunan kəsimi Avropa Birliyinin üzvüdür. Bir vaxtlar Kofi Annan planı vardı, onu yunanlar qəbul etmədi. Yunanıstanla Türkiyənin münasibətləri də gərgindir. Türk qardaşlarımız bu mövqeyə görə bizi anlayışla qarşılaya bilər. Bu məsələdə Azərbaycanın müəyyən mərhələyə qədər gözləmə mövqeyində qalmasını təbii qəbul etməlidirlər”.
Məhəmmədəli QƏRİBLİ
