Rusiyanın aparıcı mətbu orqanı olan “RİA Novosti” Azərbaycana qarşı təxribatçı yazı dərc edib. Azərbaycan 28 May – Müstəqillik Gününü qeyd edərkən, Rusiyanın dövlət media orqanı ölkəmizə qarşı təxribatla məşğul olub. Bildirilənə görə, Azərbaycanın Qarabağ bölgəsində yaşayan və separatçılıqla məşğul olan qondarma qurumun qondarma deputatlarından biri David Melkumyan Azərbaycan və Türkiyəyə qarşı qərəzli və düşmən mövqeyi sərgiləyən müsahibə verib. Bu barədə yerli media məlumat yayıb.
Ekspertlərin sözlərinə görə, “RİA Novosti” qondarma deputata məqsədli şəkildə yer ayırıb və məqsədi də Azərbaycan-Türkiyə qardaşlığına, müttəfiqliyinə kölgə salmaq olub. Ekspertlərin qeyd etdiyinə görə, Türkiyə və Azərbaycan prezidentlərinin Azərbaycanın Müstəqillik Gününü birgə qeyd etməsi, hər iki prezidentin “Teknofest”i izləyərək bəyanatlar verməsi Rusiyanın özünü bərk narahat edib.
“Azərbaycan Rusiya mediası ilə bağlı siyasətinə yenidən baxmalıdır”
Siyasi şərhçi Azər Həsrət bizimlə söhbətində bildirdi ki, təkcə “RİA Novosti” deyil, Rusiyanın öndə gedən media qurumları Azərbaycana qarşı təxribatla məşğul olur. “Rusiya mediası ilə bağlı diqqətli və ehtiyatlı olmaq lazımdır.Yalnız “RİA Novosti” yox, ümumiyyətlə Rusiya mediası birmənalı olaraq anti-Azərbaycan fəaliyyəti ilə məşğul olur. Özəlliklə də öndə gedən Rusiya mediası bizə qarşı qaralama kampaniyası aparır. Təəssüflər olsun ki, biz də buna çox dözümlü yanaşırıq. Hətta “Sputnik Azərbaycan”ın gəlib Bakının göbəyində fəaliyyət göstərməsi, üstəlik də bəzən gizli, bəzən açıq şəkildə anti-Azərbaycan təbliğatı aparmasına belə dözürüksə, Moskvadakı media haqqında nə deyə bilərik? Onlar niyə o bölücülərə, separatçılara meydan verirlər? Azərbaycanın Müstəqillik Günündə Rusiya mediasında separatçı deputatın dili ilə Azərbaycan və Türkiyə əleyhinə fikirlərin səsləndirilməsinin arxasında Rusiyanın özünün niyyətləri dayanır. Bu aydın məsələdir ki, Rusiya mediası birmənalı olaraq ermənilərin təsiri altındadır. Təbii ki, azərbaycanlılar da nəsə edə bilər. Amma təəssüf ki, Rusiyadakı Azərbaycan milyonerləri və milyarderləri Rusiya mediasına bu yöndən təsir etməyə o qədər də meylli görünmürlər. Bu da səbəblərdən biridir. Ümumiyyətlə isə, Rusiyanın özünün dövlət siyasətinin özü də bunun üzərində köklənib. Ona görə də media sadəcə “ermənilər belə istədilər” prinsipi ilə davranmır, bunu həm də Kreml, rəsmi Moskva istəyir, rus mediası ona görə davranır. O baxımdan düşünürəm ki, Azərbaycan Rusiya mediası ilə bağlı siyasətinə yenidən baxmalıdır. Dəfələrlə deyirik ki, Rusiyanın televiziya kanallarının Azərbaycanın kabel paketlərindən çıxarılması təmin edilməlidir. Rusiya mediasının Azərbaycandakı təmsilçilikləri, xüsusən də “Sputnik Azərbaycan”ın fəaliyyəti nəzarətə götürülməlidir. Ümumiyyətlə, “Sputnik Azərbaycan” ölkəmizdən çıxarılmalıdır. Sizə bir misal çəkəcəyəm. Rusiya prezidenti Vladimir Putin prezidentimiz İlham Əliyevlə telefonla danışır, təbii ki, dövlətlərarası münasibətləri və sairi müzakirə edirlər. Nəticədə Kreml rəsmi xəbər yayır ki, Azərbaycan və Rusiya prezidentləri arasında telefon danışığı olub, ikitərəfli münasibətlər, güney Qafqazda durum və s. müzakirə olunub. Orda bir dəfə də olsa Qarabağın adı keçmir. Amma nə müşahidə edirəm? Görürəm ki, "Sputnik Azərbaycan" öz xəbərlərində qeyd edir ki, Putinin İlham Əliyevlə Qarabağı müzakirə edib. "Sputnik Armeniya" isə bu xəbəri başqa cür təqdim edir və deyir ki, misal üçün, “Azərbaycan prezidenti ilə Rusiya prezidenti Dağlıq Qarabağ münaqişəsinin həllini müzakirə edib”. Siz ifadəyə, təqdimata baxın. İyunun 1-də də Putin Nikol Paşinyana ad günü münasibətilə zəng edib onu təbrik edib, müəyyən məsələlər də müzakirə olub. Kremlin saytını açın baxın, orada Qarabağın adı ümumiyyətlə keçmir. Amma siz "Sputnik Azərbaycan" ın xəbərini açın baxın, yazırlar ki, Qarabağla bağlı müzakirə aparıblar. Özü də “Sputnik Azərbaycan” bunu Kremlə istinadla yazır. Biz buna niyə dözməliyik? Düşünürəm ki, “Sputnik Azərbaycan”ı ölkədən çıxarmaqla prosesə başlamaq lazımdır. Hesab edirəm ki, bizim Moskvadakı səfirliyimiz belə məsələlərlə bağlı Rusiya mediasına təkzib göndərməlidir. İllərdir bunu deyirik. Səfirlik orada nə işlə məşğuldur? Açıqlama versin, bəyanat versin. Yəni Rusiya dövlətinin rəsmilərinə etiraz etsin, nota göndərsin. Bu işləri görmək lazımdır. Bizim XİN də, səfirliyimiz də bunu etməlidirlər. Etmirik, sonra da deyirik ki, Rusiya mediası niyə bizə qarşı qərəzlidir. Sən ona cavab verməyəndə o da belə davranacaq. Ermənilər də görür ki, meydan boşdur, götürüb istədiklərini yazdırırlar. Bizim dövlət qurumları susduqca onlar bunu davam etdirəcəklər. Eyni zamanda yenidən fəaliyyətə keçmək, Azərbaycanın Rusiyadakı səfirliyini bu yöndə fəallaşdırmaq lazımdır. Həzm edə bilmirlər, türk birliyi onları narahat edir. Odur ki, belə hallara rəvac verirlər”- deyə A.Həsrət vurğuladı.
İradə SARIYEVA
