Məlum olduğu kimi, bu ilin noyabr ayının 26-da Rusiyanın Soçi şəhərində Azərbaycan Prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin görüşüb. Üçtərəfli formatda keçirilən Soçi görüşünün 26 noyabr tarixinə salınması diqqət çəkir. Çünki 26 noyabr 1991-ci il tarixində Dağlıq Qarabağ Muxtar Vilayəti rəsmən ləğv edilib.
Bu baxımdan, Soçi görüşünün noyabrın 26-na salınması təsadüf idimi?
Xatırladaq ki, Ermənistanın baş naziri bir neçə dəfə görüşə gəlmək istəməyib. Noyabrın 9-a təyin edilən görüşə etiraz etdi ki, “noyabrın 9-u mənim üçün ağır gündü, görüşü başqa günə salın”. Sonra Soçi görüşü noyabrın 15-nə salındı, Paşinyan onu da pozdu, görüş baş tutmadı və sonda görüş noyabrın 26-na təyin edildi.
Ola bilərmi ki, noyabrın 26-nın hansı gün olduğundan Paşinyanın xəbəri olmayıb? 26 noyabrın Dağlıq Qarabağ Muxtar Vilayətinin rəsmən ləğv edildiyi gün olduğunu Paşinyan əvvəlcədən bilsəydi, bu görüşə gəlməkdən də imtina edə bilərdimi, görüşü pozardımı?
“...Qondarma DQMV-nın rəsmən ləğv edildiyi günün 30 illiyində...”
AVCİYA-nın vitse-prezidenti, professor, siyasi şərhçi Məhərrəm Zülfüqarlı “Bakı-Xəbər”ə şərhində bildirdi ki, Paşinyanla bağlı məsələ gün kimi aydındır: “O, Rusiyanın siyasətinə qarşı Qərb siyasəti yeritməyə çalışdı və nəticədə də indiki vəziyyətə düşüb. Qərbin dəstəyi ona kifayət həddə deyil, Rusiya da onu sıxır. Ona görə də belə bir vəziyyətdə Rusiyanın təzyiqi ilə bütün razılaşmanı həyata keçirməyə məcburdur. Çünki Saakaşvilinin timsalında Qərbin siyasətinə boyun əyən və etibar edən siyasətçiləri də görmüşük. Gördünüz ki, Qərb ölkələri sonradan onu necə arxasız qoydular, sonacan müdafiə etmədilər.
Ona görə də Paşinyan indi iki can arasında qalıb. Rusiya daim öz forpostu hesab etdiyi Ermənistana təzyiq edir, bu da həmin təzyiqlərə davam gətirə bilmir. Paşinyan açıq-aydın Rusiyanın təzyiqi altındadır və noyabrın 26-a təyin edilən görüşü pozmağa cəhd edə bilməzdi. Həmin günün hansı tarix olduğunu bilsəydi belə, imtina etməyə ixtiyarı yox idi, çünki Rusiya nə deyir Paşinyan onu icra edir. Başqa yolu yoxdur. Hesab edirəm ki, bu görüşün 26 noyabra salınması da təsadüfi olmayıb. Qondarma DQMV-nın rəsmən ləğv edildiyi günün 30 illiyində Paşinyan növbəti bir sənədə qol çəkdi. Əlbəttə bu, Azərbaycanın bu məsələdə qazandığı növbəti uğurlardandır. Görürsüz ki, görüşqabağı İrəvanda mitinqlər keçirilirdi və ona 26 noyabrda Soçiyə getməmək barədə çağırışlar edirdilər ”.
M.Zülfüqarlının sözlərinə görə, son seçkilərdə xalqın ona dəstək verməsi ümidlərini bir qədər artırmışdı. M.Zülfüqarlı qeyd edir ki, Ermənistanda sosial problemlər çox dərin olduğu üçün xalqda siyasilərin hamısına imansızlıq yaranıb, o cümlədən də Paşinyana. “Ona görə də, Rusiya nə diqtə etsə ona boyun əyməyə hazırdır. 10 noyabr 2020-ci il sazişinin bəndlərinin əməl etmədiyi hissələrinə isə Rusiyanın təzyiqi ilə əməl edəcək. O cümlədən də Zəngəzur dəhlizinin açılışı artıq reallaşır. Bundan sonra da Azərbaycanın mövqeyi gücləndikcə Paşinyan geri çəkilməyə məcburdur. Öz ordusu, gücü, iqtisadiyyatı olmayan dövlət başqa cür siyasət yeridə bilməz” - deyə M.Zülfqarlı bildirdi.
İradə SARIYEVA
