Bu gün ölkə rəhbərliyi tərəfindən Azərbaycanla bağlı həqiqətlərin dünya ictimaiyyətinə çatdırılması üçün müxtəlif beynəlxalq platformalardan məharətlə istifadə olunur. Qeyd edilənlərin növbəti real nümunəsi İqtisadi Əməkdaşlıq Təşkilatının (İƏT) XV Zirvə Toplantısı fonunda özünü bir daha qabarıq şəkildə büruzə verdi. Toplantının gedişi, burada qəbul edilən yekun sənəd Azərbaycanın, o cümlədən Prezident İlham Əliyevin növbəti mühüm diplomatik qələbəsi kimi tarixə düşdü.
Zəngəzur dəhlizindən istifadə İƏT üzvləri üçün mühüm üstünlüklər vəd edir
Xatırlatmaq yerinə düşərdi ki, Azərbaycan İqtisadi Əməkdaşlıq Təşkilatının fəal üzvlərindən biridir və bu quruma üzv olan ölkələr eyni zamanda həm İslam Əməkdaşlıq Təşkilatı, həm də Qoşulmama Hərəkatında təmsil olunurlar. Həmin dövlətlərlə Azərbaycan arasında səmərəli əməkdaşlıq münasibətləri yaradıılıb. Elə bu da Azərbaycanın dünya birliyinə inteqrasiyasına mühüm töhfələr verir.
Yaranmış vəziyyətdə Azərbaycan üçün əsas prioritetlərdən biri İqtisadi Əməkdaşlıq Təşkilatının faəliyyətinin daha təkmil hala gələməsi, üzv ölkələr arasında qarşılıqlı münasibətlərin güclənməsidir. Bu məqsədlə Azərbaycanın təşəbbüsü ilə ərsəyə gələn Zəngəzur dəhlizindən sözügedən quruma üzv ölkələrin fəal istifadəsi onlar arasında iqtisadi inteqrasiyanı daha da gücləndirmək iqtiarındadır. Qeyd edilən xüsusda İqtisadi Əməkdaşlıq Təşkilatının Zirvə toplantısında çıxışı zamanı Prezident İlham Əliyev bildirib: “İqtisadi Əməkdaşlıq Təşkilatının sonuncu Zirvə toplantısında mən həmkarlarıma Zəngəzur dəhlizi haqqında məlumat vermişdim. Bu gün deyə bilərəm ki, Zəngəzur dəhlizi reallığa çevrilir. Bu yeni nəqliyyat infrastrukturu Şərq-Qərb və Şimal-Cənub dəhlizlərinin önəmli hissəsinə çevriləcək. Əminəm ki, İƏT-ə üzv ölkələr bu dəhlizdən istifadə edəcəklər”. Burada nəzərə alınmalıdır ki, Azərbaycan hər zaman regional əməkdaşlığa xüsusi önəm verib və hökumətlərarası regional təşkilat olan İƏT Zəngəzur dəhlizindən yararlanmaqla davamlı iqtisadi inkişafında yeni nailiyyətlərə imza ata bilər. Azərbaycanın Avrasiyanın əsas və etibarlı nəqliyyat və logistika mərkəzlərindən birinə çevrilməsi də bu fonda İƏT üçün mühüm üstünlüklər vəd edir. Bunu Milli Məclisin deputatı Cavid Osmanov da xüsusi olaraq qeyd edir: “Bu və digər regional, eyni zamanda beynəlxalq təşəbbüslərlə çıxış edən Azərbaycan son illər faktiki olaraq Avrasiyanın əsas və etibarlı nəqliyyat-logistika mərkəzlərindən birinə çevrilib. Buna töhfə verəcək növbəti böyük bir uğurun - Zəngəzur dəhlizinin reallaşması regionun nəqliyyat sektorunda yeni imkanlar yaradacaq. Soçi görüşündən sonra Prezident İlham Əliyevin İqtisadi Əməkdaşlıq Təşkilatının tribunasından da Zəngəzur dəhlizinin artıq reallığa çevrilməsini bəyan etməsi bir daha təsdiq edir ki, bu yeni nəqliyyat infrastrukturu Şərq-Qərb və Şimal-Cənub dəhlizlərinin önəmli hissəsinə çevriləcək və təşkilata üzv ölkələr bu dəhlizdən böyük fayda götürəcəklər”. Onun sözlərinə görə, Prezident İlham Əliyevin Zəngəzur dəhlizinin Şərq-Qərb və Şimal-Cənub dəhlizlərinin önəmli hissəsinə çevriləcəyini əsaslandıran fikirləri, eyni zamanda Azərbaycanın işğaldan azad etdiyi ərazilərdə dərhal genişmiqyaslı yenidənqurma işlərinə başlaması, yalnız özünün maliyyə resurslarına arxalanaraq, sıfırdan yeni şəhər və kəndlər salması, Qarabağ və Şərqi Zəngəzurun yaşıl enerji bölgələri elan edilməsi Azərbaycan Prezidentinin İƏT-də qurucu lider kimi tanınmasına əsas verir.
Nəqliyyat-kommunikasiya dəhlizləri Azərbaycanın beynəlxalq tərəfdaşlarının sayını artırır
O da mühüm faktdır ki, nəqliyyat-kommunikasiya dəhlizlərinin yaradılması Azərbaycana mühüm dividendlər qazandırır. Bu, ölkənin sosial-iqtisadi inkişafını daha dinamik hala gətirməklə yanaşı, təhlükəsizlik sferasında Azərbaycanın əlavə üstünlüklər əldə etməsinə gətirib çıxarır. Uğurlu enerji strategiyasına paralel olaraq, ötən illər ərzində Azərbaycan transmilli nəqliyyat-kommunikasiya siyasətinin həyata keçirilməsində mühüm uğurlara imza atıb. Azərbaycan Şərq-Qərb, Şimal-Cənub, Şimal-Qərb nəqliyyat dəhlizləri kimi regional bağlantı layihələrinin icrasına mühüm töhfə verməklə yanaşı, onların reallaşması istiqamətində genişmiqyaslı işlər görüb.
Azərbaycanın tarixi qələbəsi ilə başa çatan Vətən müharibəsindən sonra regionda transmilli nəqliyyat layihələrinin həyata keçirilməsi istiqamətində ölkəmiz yeni imkanlar əldə edib. Xüsusən də Zəngəzur dəhlizinin həyata keçirilməsi üçün əldə edilən razılıqlar Avrasiya məkanında Azərbaycanın tranzit imkanlarının daha da artmasına gətirib çıxaracaq. Zəngəzur dəhlizi Şərq-Qərb nəqliyyat dəhlizinin əhəmiyyətini yüksəltməklə yanaşı, Azərbaycanın Avrasiya məkanında tranzit ölkə kimi əhəmiyyət və imkanlarını daha da artıracaq. Bu, Azərbaycanda qeyri-neft sektorundan əldə edilən gəlirlərin ciddi şəkildə artımına səbəb olmaqla yanaşı, ölkəmizin ixrac məhsullarının həcminin artmasına da təsir edəcək. Azərbaycanın tranzit imkanlarının, o cümlədən beynəlxalq nəqliyyat dəhlizləriində artan rolu ölkəmizlə tərəfdaşlıq edən dövlətlərin də sayını çoxaldır. Bu da öz növbəsində Azərbaycanın tərəfdaşlarının sayının artması, onlarla müttəfiqlik əlaqələrinin möhkəmləməsi deməkdir. Beləliklə, nəqliyyat layihələri Azərbaycana təkcə iqtisadi yox, həm də siyasi dividendlər qazandırır. Eyni zamanda bu layihələr Azərbaycanın dünya miqyasında inteqrasiya siyasətinin də uğur göstəricisi kimi qəbul edilir və bunu İƏT-lə tərəfdaşlıq kontekstində də görmək olar. Elə bundan irəli gəlir ki, qurumun Zirvə Görüşündə qəbul edilmiş Aşqabad sənədində Azərbaycanın maraqlarına uyğun müddəalar öz əksini tapıb. Sənəddə Azərbaycan xalqı və hökuməti işğal edilmiş ərazilərin azad edilməsi və ərazi bütövlüyünün bərpa olunması münasibətilə təbrik edilir. Bundan əlavə, üzv ölkələr Azərbaycanın azad edilmiş ərazilərinin qurulması və yenidənqurma layihələrinə investisiya qoymağa çağırılır. Bütün bunlar bir daha göstərir ki, Azərbaycan beynəlxalq aləmdə öz maraqlarının təmin edilməsinə də uğurla nail olur.
Tahir TAĞIYEV
Yazı Azərbaycan Respublikası Medianın İnkişafı Agentliyinin maliyyə dəstəyi ilə çap olunur.
