Prezident İlham Əliyev xalqa növbəti müraciətində bildirib ki, Minsk Qrupunun fəaliyyətinə başqa qiymət vermək olmaz: “Elə bil ki, bizi bu vəziyyətlə barışmağa sürükləyirdilər. Yeni reallıqlar yaranıb, siz də reallıqlarla hesablaşmalısınız!”
Dövlət başçısı deyib ki, biz yeni bir reallıq yaratmışıq, indi hər kəs yeni reallıqla hesablaşmalıdır: “Amma biz nəyi görürük? Biz torpaqlarımızı işğalçılardan azad etməyə başlayanda görün nələr baş verir? Azərbaycana nə qədər böyük təzyiq göstərirlər. Hər tərəfdən əl-ayağa düşdülər. Bəs nə oldu, 28 il belə süründürə-süründürə bu məsələni elə bil ki, həll edirdiniz! Gəlib-getmək, orada-burada danışıqlar… Yığılmışıq boğaza bu danışıqlardan. Nə qədər bu düşmənlə danışıqlar aparmaq olar? Özü də düşmən harınlaşır, azğınlaşır, qudurur və bizə deyir ki, yox, ancaq sülh yolu ilə, bunun hərbi variantı yoxdur. Kim deyir ki, yoxdur? Biz BMT Təhlükəsizlik Şurasının qətnamələrini təkbaşına yerinə yetiririk. Halbuki bu, BMT Təhlükəsizlik Şurasının vəzifəsidir, biz təkbaşına icra edirik. Biz yeni reallıq yaratmışıq, hesablaşın. Ancaq nə görürük? Orada görüş, burada görüş, atəşkəs belə oldu, atəşkəsi kim pozdu. İndi bunların bütün fəaliyyəti Ermənistanı xilas etməkdir. Aqressoru, təcavüzkarı, Xocalı soyqırımını törədəni, Gəncəni Ermənistan ərazisindən ballistik raketlərlə bombalayanı. Budur bu fəaliyyət”.
Göründüyü kimi, ölkə başçısı artıq Azərbaycanın yeni reallıqlar yaratdığını və hamının bununla hesablaşmalı olduğunu bəyan edir. Bu reallıqlar kimi dünya nələri qəbul etməlidir?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bunun ən düzünü ölkə başçısının özü bilir:
“Biz yalnız gümanlarımızı irəli sürə bilərik. Hesab edirəm ki, Prezident çox detalı nəzərdə tuta bilər. Bu reallıqlar ondan ibarətdir ki, Azərbaycan Ordusu hərb meydanında özünü göstərə bildi. Ordumuzun yeni silah növlərindən istifadə etməklə müasir müharibə aparması dünyanın nüfuzlu ölkələrinin hərbi analitiklərinin də diqqətini cəlb edib. Söhbət yalnız müasir dronlardan istifadədən getmir. Azərbaycan ümumilkdə yeni döyüş taktikası ortaya qoydu. Eyni zamanda, bütün dünya bəyan edirdi ki, münaqişənin hərbi yolla həlli yoxdur, yalnız sülh danışıqları ilə həlli mövcuddur. Azərbaycan bu stereotipi də məhv etdi. Hazırda biz sübut edirik ki, münaqişənin hərbi təzyiq vasitəsilə həlli mümkündür. Biz beynəlxalq hüququn bütün normalarına əməl etməklə düşməni ərazimizdən qovuruq. Ortaya çıxan mənzərə budur ki, güc faktoru ciddi şəkildə nəzərə alınır. Eyni zamanda, Azərbaycan müharibənin bu fazası ilə beynəlxalq münasibətlər sistemində də yeni reallıqlar yarada bildi. İndiyə qədər Ermənistanın arxasında dayanan güclərin yoxluğu və ya yox kimi olmaları üzə çıxdı. Azərbaycanın haqq işinə açıq formada dəstək verən ölkələri tanıya bildik. Bu və digər məsələləri əsas götürsək, hazırda dünyanın güc balansında yeni reallıqlar yaranıb ki, bunu da Azərbaycan edə bilib.
Hesab edirəm ki, yeni reallıqlar özünü danışıqlar formatında da göstərə bilir. Bəlli oldu ki, üç böyük dövlət həmsədr kimi bu münaqişəni həll etmək gücündə deyil. Artıq danışıqlar prosesində yaranan reallıqlarda Türkiyənin varlığı özünü göstərir. Onunla da hesablaşırlar. Rəsmiyyətdə Türkiyənin adı formata daxil edilməsə də, artıq ABŞ da, Rusiya da Dağlıq Qarabağ məsələsində Türkiyə ilə məsləhətləşmələr aparır. Bu da Türkiyənin, faktiki olaraq, prosesin iştirakçısına çevrildiyi anlamına gəlir. Bütün bu reallıqlar və sadalaya bilmədiyimiz digər məsələlər Prezidentin dediyi məsələyə aiddir və dünya mütləq bunları qəbul etməlidir”.
Azərbaycan eyni zamanda BMT-nin qətnamələrini təkbaşına icra etməklə dünyada sülhə verdiyi töhfə ilə bağlı yeni reallığa imza atmış oldu.
Məhəmmədəli QƏRİBLİ
