Ermənistanın baş naziri Nikol Paşinyan erməni kişilərini onun əmrlərinə tabe olmağa və hərbi xidmətdən yayınmamağa çağırıb. Bunu işğalçı ölkənin rəhbəri Facebook səhifəsində canlı yayım zamanı deyib:
“Qadınlarımız kişilərimizə bu vəziyyətdə tərəddüd etməyin bağışlanmadığını söyləməlidirlər. Qadınlar ərlərini və oğullarını saxlamamalıdırlar. Mən tələb edirəm ki, hər bir Ermənistan vətəndaşı mənim əmrimə tabe olsun. Mən əmr edirəm ki, hər bir kişi indi ayağa qalxsın və öz hərbi komissarlığına getsin. Bu mənim əmrimdir. Qadınları həvəsləndirin. Qoy özləri dəstələr yaratsınlar. Bu, minillik müharibədir”.
Nikol Paşinyan bütün fərariləri həm də ictimai qınağa məruz qoymağa çağırıb:
“Cəmiyyətimizdə döyüş meydanından qaçanların ciddi töhmət almaları üçün əhval-ruhiyyə olmalıdır. Bizdə ümummilli konsensus olmalıdır. Öz postunu tərk edən hər kəs bilməlidir ki, onlara ictimai töhmət veriləcək”. Paşinyanın sözlərinə görə, həkim və vətəndaşın oğlan uşağına çağırışdan yayınmaq üçün koronavirus diaqnozu təyin edilməsi barədə razılığa gəlməsi yolverilməzdir.
Paşinyanın bu müraciəti artq ermənilərin müharibədə iştirak etmək istəməməsi, kütləvi fərariliyə meylli olmalarının göstəricisi sayıla bilərmi?
“Resurs“ Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, bu dönəm ərzində erməni qüvvələri ciddi itki verib: “Ermənilər yayındırıcı rəqəmlər açıqlayır. Müəyyən hesablamalar göstərir ki, 10 mindən artıq erməni əsgəri Qarabağda məhv edilib. Vurulan, sıradan çıxaralan texnikaların sayından da itkilərin nə qədər olduğunu təxmin edə bilərik. Əgər itki bu qədərdirsə, deməli, iki dəfə də artıq yaralı sayı var. Faktiki olaraq 30 min erməni əsgərini biz döyüş meydanından kənarda qoymuşuq. Onların aktiv hərbçilərinin sayı 50 min adam çıvarında göstərilirdi. Bu da o anlama gəlir ki, düşmənin canlı qüvvəsinin yarıdan çoxu sıradan çıxarılıb. İki dəfə elan olunan səfərbərlik dönəmində də çox az sayda adam toplaya biliblər. Bu qədər canlı qüvvə itkisinin fonunda, hansı dövlətdən silah almalarına baxmayaraq, həmin silahları istifadə etməyə canlı qüvvə çatışmır. Paşinyanın son dönəmlər orduya 60 yaşından yuxarı adamları, qadın və uşaqları da cəlb etməsi onların vəziyyətinin acınacaqlı olduğunu sübut edir. Bunlar sosial şəbəkələrdə nümayiş olunur. Paşinyanın erməni qadınlarına müraciət etməyi ki, kişlərinizi orduya buraxın, həmin ölkədəki milli ruhun hansı səviyyədə aşağı olmasından xəbər verir. Həm də mənəvi-psixoloji vəziyyətlərindən xəbər verir ki, artıq heç kim gəlib Azərbaycan torpağında ölmək istəmir. Bir həftə təlim keçdikdən sonra onlar döyüş meydanına sıravi vətəndaşları göndərirlərsə, bu bir daha ordunun resurslarının tam tükəndiyinə dəlalət edir. İmkanları olanlar isə bilirlər ki, ora getmək ölümə bərabərdir. Bu səbəbdən də bütün vasitələri işə salırlar ki, ordudan yayınsınlar. Paşinyanın özü etiraf edir ki, həkimlər xəstələrdən pul alıb, onlara saxta COVİD diaqnozu qoyur. Bütün bu narazılıqlar Ermənistanın daxili rəyinə sirayət edib və artıq özünü biruzə verməyə başlayıb. Yəqin ki, ordudakı uğursuzluqla bağlı reaksiyalar Ermənistanın siyasi həyatında daha açıq etiraz formalarında özünü göstərməyə başlayacaq”.
Paşinyanın öz həyat yoldaşını orduya göndərməsi və özünün də ön cəbhədə döyüşməyə hazır olduğuna dair verdiyi açıqlama onların tam tükəndiyindən xəbər verir.
Məhəmmədəli QƏRİBLİ
