Akif Nağı: “...uşaq bağçasında ona görə gizləniblər ki, sabah ora bir mərmi düşərsə, “Azərbaycan Ordusu uşaq bağçalarını hədəfə alır” deyə bütün dünyaya car çəksinlər”
Tez-tez sosial şəbəkələrdə və erməni KİV-ində qondarma “DQR”in “prezidenti” Araik Arutyunyanın və tərəfdarlarının uşaq bağçasında keçirdikləri “müşavirə”nin fotoşəkilləri, videogörüntüləri yayılır.
Separatçı rejimin qondarma rəhbəri və onun tərəfdarları uşaq bağçasında qərargah yaradıblar. Döyüşdə ağır itkilər verən düşmənin uşaq bağçasına sığınmasının sözsüz ki, arxasında onların çirkin niyyətləri dayanır. Onlar yaxşı bilirlər ki, Azərbaycan Ordusu uşaq bağçasını hədəfə almır, mülki yerləri güllələmir, uşaqları öldürmür. Bu səbəbdən də qondarma rejimin “rəhbərliyi” uşaq bağçasını qərargaha çevirib.
Bir çox ekspert separatçı rejimin “rəhbərliyi”nin bu addımı atmasını sarkazma çevirib. Belə ki, ekspertlər ironik olaraq deyirlər ki, sabah düşmən hansısa doğum evini, yaxud gözəllik salonunu qərargaha çevirsələr, bunu təəccüblə qarşılamaq olmaz, çünki uşaqların və qadınların arxasında gizlənmək düşmənin adətidir.
Qarabağ Azadlıq Təşkilatının (QAT) sədri Akif Nağı hesab edir ki, A.Arutyunyanın və tərəfdarlarının uşaq bağçasına sığınması onların çirkin niyyətlərinin göstəricilərindən biridir. A.Nağının sözlərinə görə, separatçı rejimin qondarma başçısı və onun ətrafındakılar bütün oyunlardan çıxdıqdan sonra sonuncu vasitə kimi uşaq bağçasına sığınmağa əl atıblar. “Əlləri hər yerdən üzülüb. Azərbaycan Ordusu qarşısında heç nə edə, döyüş meydanında ordumuzun zərbələrinə cavab verə, müharibə qaydalarına uyğun hərəkət edə bilmirlər. Azərbaycanın üstünlüyü bütün istiqamətlərdə özünü göstərir. Ordumuzla bacarmadığına görə də düşmən bizim dinc əhalini, uşaqlarımızı hədəfə götürüb, onları qətlə yetirir. Amma düşmən bilir ki, Azərbaycan Ordusu uşaqlara güllə atmır, mülki əhali ilə işi yoxdur, ona görə də uşaq bağçasına sığınıblar. Qondarma rejimin “rəhbərliyi” uşaq bağçasına sığınmaqla özlərini uşaqların arxasında gizlədirlər. Onlar nəinki uşaqların arxasında gizlənir, hətta başqa çirkin əməllərə də əl atırlar. Separatçı rejimin təmsilçiləri uşaq bağçasında ona görə gizləniblər ki, sabah ora bir mərmi düşərsə, “Azərbaycan Ordusu uşaq bağçalarını hədəfə alır” deyə bütün dünyaya car çəksinlər, bununla da öz çirkin niyyətlərini bir daha ortaya qoysunlar. Bu da çox cılız hərəkətdir. Uşaq bağçasına sığınmağın da heç bir mənası yoxdur. Bizim dilimizdə bir misal var: “Siçan deşiyi axtarır ki, ora girsin”. İndi onlar harada deşik var, ora girirlər ki, bəlkə canlarını qurtara bildilər. Müharibədə həmişə zəif, eybəcər tərəf ya qadınların, ya uşaqların arxasında gizlənib, qadınlardan, uşaqlardan, hətta olub ki, əsirlərdən sədd kimi istifadə edib. Ermənilər olmayan ağıllarını tamamilə itiriblər, ona görə də bilmirlər nə etsinlər. Çünki ağılları, məntiqləri yoxdur, ağılları olsaydı, separatçılıqdan əl çəkərdilər, normal yaşayardılar. Artıq Azərbaycan hərbi əməliyyatlar aparır və onlar da bunun qarşısında heç nə edə bilmirlər. Dünya da artıq onların bu məkrli hərəkətlərini, uşaqların arxasında gizləndiklərini görməlidir”.
A.Nağının fikrincə, ola bilsin, qondarma rejimin “rəhbərliyi” uşaqları da özlərinə qərargah seçdiyi bağçada saxlasın və uşaqlardan istifadə etsin. Onların hər cür məkrli hərəkətlərə yol verdiklərini deyən A.Nağının sözlərinə görə, separatçı rejimin “rəhbərliyi”nin bu addımı heç bir nəticə verməyəcək. “Nə qədər gec deyil, ağ bayraq qaldırıb təslim olmalıdırlar. Azərbaycan xalqı humanist, yumşaq ürəkli xalqdır. Hər dəfə onları bağışlayıb, yenə də bağışlayar. Amma nə qədər bizə qarşı dirəniş göstərərlərsə, bunun heç bir mənası olmayacaq, separatçılar ya bizim əsgərin gülləsindən, ya da acından öləcəklər. Onlar özləri üçün bundan bir nəticə çıxarmalıdırlar” - deyə QAT sədri vurğuladı.
İradə SARIYEVA
