Hikmət Hacıyev Ermənistanın bəşəriyyət əleyhinə dəhşətli cinayət faktını şərh etdi - ekspert təhlili...

İsmayıl Tanrıverdi: “Ermənistanın uşaqları müharibəyə cəlb etməsinin arxasında çox çirkin niyyətlər dayanır”

img

Ermənistanda fərarilik və ordudan yayınma halları o qədər genişlənib ki, işğalçı dövlət beynəlxalq qanunvericiliyin tələblərini pozaraq, uşaqların əlinə silah verib onları döyüşə aparır. Bu cinayət azmış kimi, hələ əlisilahlı uşaqların foto və videogörüntülərini də sosial şəbəkələrdə yaymaqdan çəkinmirlər. Paşinyan hakimiyyəti “döyüşçü” uşaqların əlinə silah verməkdən zövq aldığını ortaya qoyur.

 

Azərbaycan Prezidentinin köməkçisi Hikmət Hacıyev Ermənistanın uşaqları müharibəyə cəlb etdiyini sübut edən videoya cavab olaraq “Tvitter” səhifəsində bu barədə yazıb.

 

Hikmət Hacıyev bildirib ki, videoda Ermənistanın uşaqdan əsgər kimi istifadə etdiyi görünür. İstintaq başladılmalıdır: “15 yaşınadək uşaqların əsgər kimi istifadə olunması beynəlxalq humanitar hüquqlar - müqavilələr və qanunlar baxımından qadağandır və ICC tərəfindən müharibə cinayətləri kimi təyin olunur”. H.Hacıyev Ermənistanın bəşəriyyət əleyhinə növbəti cinayətini ifşa edib.

Siyasi şərhçilər hesab edirlər ki, Prezidentin köməkçisi Ermənistanın işlətdiyi növbəti cinayəti ifşa etməklə beynəlxalq ictimaiyyətin diqqətini işğalçı ölkənin atdığı cinayətkar addımlara cəlb edib.

  • “...zorla müharibəyə göndərilən uşaqlardan hansısa biri burada həlak olarsa, sabah dünyaya car çəksinlər ki...”

BDU-nun Tarix fakültəsində erməni araşdırmaları ETL-nin böyük elmi işçisi, tanınmış ermənişünas İsmayıl Tanrıverdi “Bakı-Xəbər”ə bildirdi ki, bu gün Ermənistanda gənclər və orta yaşlı insanlar müharibəyə getməkdən imtina etdikləri üçün düşmən ölkə daha böyük çirkinliklərə əl ataraq, uşaqları müharibəyə aparır. “Bu gün bütün dünyanın gözü qarşısında Ermənistanda 12-13, 14 yaşlı uşaqlara hərbi təlimlər keçirilir və həmin uşaqlar müharibəyə hazırlanır. Hətta o uşaqlar arasında döyüşdə iştirak edənlər də var. Bu günlərdə 12-13 yaşlı bir uşağın görüntüsü yayılıb, həmin uşaq top atanların yanında onlara kömək edir. Ermənilər deyirlər ki, bu uşaq “qəhrəman” Valerinin oğludur, cəbhədə döyüşür. Ermənistan uşaqları müharibəyə aparmaqla bəşəriyyət qarşısında çox böyük cinayətə yol verdiyini açıq şəkildə ortaya qoyur. Uşaqların müharibəyə aparılması böyük cinayətdir ki, bu cinayəti də Ermənistan edir. Hesab edirəm ki, Ermənistanın bəşəriyyət əleyhinə işlətdiyi cinayətlərə 15 yaşına çatmamış uşaqları şərik etməsi, onları bu işə cəlb etməsi cəzasız qalmamalıdır. Bütün beynəlxalq təşkilatlar düşmənin bəşəriyyət əleyhinə həyata keçirdiyi müharibə cinayətlərinə göz yummamalı, Ermənistana qarşı sərt tədbirlər görməlidirlər. BMT, onun təsisatlarından biri olan UNİSEF susmamalıdır, Ermənistanı cəzalandırmalıdır. Ermənistanın hərbi-siyasi rəhbərliyinin uşaqları müharibəyə cəlb etməsini, onları hərbi təlimlərə aparmasını sübut edən saysız təkzibolunmaz fakt var. Bu faktlar kifayət edir ki, Ermənistan cəzalandırılsın. Terrorçu Ermənistan dövləti tərəfindən uşaqların müharibəyə cəlb olunması, bəşəriyyət əleyhinə cinayətlərin iştirakçısına çevrilməyə sövq edilməsi cəzasız qalmamalıdır. Amma təəssüf ki, hələ də düşmən ölkənin bu cinayətlərinə beynəlxalq aləm münasibət bildirmək istəmir. Amma biz bu faktları beynəlxalq təşkilatlara təqdim etməli və Ermənistanın hüquqi baxımdan cəzalandırılmasına nail olmalıyıq”.

İ.Tanrıverdinin sözlərinə görə, Ermənistanın terrorçu hərbi-siyasi rəhbərliyinin uşaqları müharibəyə aparmaqla, əslində, çox çirkin bir niyyəti var. “Ermənistan bu gün hər cür saxtakarlığa əl atır. Bir neçə gün əvvəl Ermənistan əsgərləri sərhəddə Rusiya bayrağını qaldırmışdılar, bununla belə təsəvvür yaratmaq istəyirdilər ki, guya sərhəddə Rusiya hərbi birləşmələri var. Ermənistanın uşaqları müharibəyə cəlb etməsinin arxasında çox çirkin niyyətlər dayanır. Ermənistan bilir ki, Azərbaycan ordusu uşaqlara, qadınlara, bir sözlə, mülki əhaliyə güllə atmır, ona görə də öz cinayətkar əməllərini uşaqların arxasında gizlənərək həyata keçirirlər. Onlar müharibədə uşaqlardan istifadə etməklə beynəlxalq qanunvericiliyin bütün bəndlərini kobudcasına pozurlar. Burada əsas diqqətçəkən məqamlardan biri də odur ki, zorla müharibəyə göndərilən uşaqlardan hansısa biri burada həlak olarsa, sabah dünyaya car çəksinlər ki, guya Azərbaycan Ordusu erməni uşaqlarını hədəfə alıb. Ermənistanın bu məkrli addımlarının qarşısı vaxtında alınmalıdır. Hesab edirəm ki, Azərbaycan bu istiqamətdə təxirəsalınmaz işlər görməli və düşmən ölkənin bəşəriyyət əleyhinə törətdiyi cinayətlərə uşaqları da şərik etməsi faktını beynəlxalq aləmə çatdırmalıdır. Bildiyim qədər, artıq bu məsələ ilə bağlı işlər görülür. Prezidentin köməkçisi Hikmət Hacıyev artıq bu dəhşətli cinayətə şərh verib və Ermənistanın bu qara niyyətlərini ifşa edib” - deyə İ.Tanrıverdi qeyd etdi.

İradə SARIYEVA

Son xəbərlər