05/12/2020 20:06
728 x 90

Uşağını Qarabağ müharibəsindən yayındırmaq üçün “erməni bicliyi “ - Ermənistanda ordu-xalq ziddiyyətinə növbəti sübut...

Tərlan Eyvazov: “...Paşinyanın hərəkətlərinə adekvat addım ataraq, öz uşaqlarını koronavirus adı ilə ordudan yayındırır”

img

Bu gün Ermənistanda xalq və ordu arasındakı uçurum daha da genişlənməkdədir. İşğalçı dövlət öz məğlubiyyətini etiraf edib, terrorçu silahlı birləşmələrini Azərbaycan ərazilərindən çıxarmaq əvəzinə, öz vətəndaşlarına qarşı zor tətbiq edərək, onları orduya cəlb etmək istəyir.

Bilirik ki, Ermənistanda 18 yaşdan 55-60 yaşa qədər olan kişilərin ölkədən çıxışına rəsmən qadağa qoyulub. Paşinyan hakimiyyəti bununla ordudan yayınmanın qarşısını almaq istəyir, lakin işğalçı ölkənin bu addımı da heç bir nəticə vermir, yenə də insanlar kütləvi şəkildə ordudan yayınırlar. Özü də xüsusi üsuldan istifadə edərək, döyüşmək üçün Qarabağa getməkdən canlarını qurtarırlar. Hazırda Cənubi Qafqazada koronavirus pandemiyasının ən çox yayıldığı ölkə Ermənistandır. Ermənistanda bir çox valideyn “biclik” işlədərək, övladını ordudan yayındırmağa nail olur. Yayılan məlumatlara görə, Ermənistanda valideynlər yerli həkimlərə rüşvət verərək, övladlarını koronavurus xəstəsi kimi qeydiyyata aldırırlar. Bu gün Ermənistanda xeyli sayda saxta koronavirus xəstəsi olduğu haqda dəqiqləşdirilmiş məlumatlar var. Valideynlər pandemiyadan sui-istifadə edərək, sağlam oğul və qızlarını “xəstə çıxarır”lar ki, çağırış zamanı xəstəlik kağızını müvafiq quruma təqdim etsinlər.

Əlbəttə, bütün bunlar xalq və ordu arasındakı dərin ziddiyyətlərin olduğunun sübutudur. Hazırda düşmən ölkədə xalq və ordu arasında hər hansı bir həmrəylik formaları mövcud deyil, erməni xalqı tezliklə Ermənistan silahlı birləşmələrinin Dağlıq Qarabağdan və Azərbaycanın işğal altında olan digər ərazilərindən çıxarılması üçün Paşinyanın əmr imzalamasını tələb edir.

  • “Azərbaycandan fərqli olaraq, Ermənistanda insanlar orduya getmək istəmirlər”

Tanınmış hərbi ekspert Tərlan Eyvazov “Bakı-Xəbər”ə şərhində bildirdi ki, Ermənistan vətəndaşları övladlarının onlara aid olmayan torpaqlarda döyüşməsini, həlak olmasını istəmir, bu səbəbdən də həkimlərə rüsvət verib övladlarını koronavirus xəstəsi kimi qeydiyyata aldırırlar. Ordudan yayınanlara, fərarilərə qarşı Ermənistanda sərt cəza tədbirləri görüldüyünü xatırladan T.Eyvazovun sözlərinə görə, xalq buna görə də pandemiyadan sui-istifadə edir.

Son həftələr Ermənistanda xalq və ordu arasında olan uçurumun daha da dərinləşdiyini deyən T.Eyvazovun sözlərinə görə, xalq bu yolla Ermənistanın işğalçılıq siyasətinə etiraz edir. “Xalqın öz övladlarını ordudan yayındırmaq üçün işlətdiyi bu kələk Paşinyanın özünün fırıldaqlarına bir cavabdır. Koronavirus pandemiyasından Paşinyan hökuməti çox ciddi şəkildə sui-istifadə edir. Paşinyan və onun ətrafı Qarabağ cəbhəsində həlak olan hərbçilərin sayını gizlətmək üçün onların bir qismini koronavirusdan “ölən adam” kimi qələmə verir. Amma bizim əlimizdə də öldürülən hərbçilərlə bağlı təkzibolunmaz faktlar var, bəzilərinin fotoşəkilləri, bəzilərinin də sənədləri əlimizdədir. Xüsusən də bizim sosial şəbəkə istifadəçilərimiz üzə çıxarırlar ki, bu şəxslər Qarabağ cəbhəsində həlak olublar. İşğalçı Ermənistan hakimiyyətinin bu fırıldaqları tərəfimizdən ifşa olunur. Erməni xalqı da Paşinyanın hərəkətlərinə adekvat addım ataraq, öz uşaqlarını koronavirus adı ilə ordudan yayındırır. Azərbaycandan fərqli olaraq, Ermənistanda insanlar orduya getmək istəmirlər. Azərbaycanda isə qismən səfərbərlik elan edilib və könüllü şəkildə cəbhəyə getmək istəyənlər kifayət qədərdir, onlar növbəyə durublar, hər kəs cəbhəyə gedəcəyi günü səbrsizliklə gözləyir. Ermənistanda isə, qeyd etdiyim kimi, bunun tamam əksi baş verir. Bu ölkədə ciddi demoqrafik problemlər var, insanlar bir parça çörək arxasınca xaricə gedir, bu gün də getmək istəyirlər. Bunun səbəblərindən biri də ermənilərin Qarabağ cəbhəsində döyüşməkdən imtina etməsi ilə bağlıdır. Paşinyan hökuməti pandemiyadan sui-istifadə edərək, 18-60 yaşlı kişiləri ölkədən xaricə buraxmamaq barədə qərar verib. Bununla da ölkədən kənara çıxmaq istəyənlərin qarşısını kəsirlər və getmək istəyənləri zorla cəbhəyə göndərirlər”.

T.Eyvazovun sözlərinə görə, orduya getməkdən imtina edərək yayınanların çoxunun atası Birinci Qarabağ Müharibəsində həlak olub, indi onların anaları istəmirlər ki, övladlarını da atalarının taleyi gözləsin. Bu səbəbdən də sağlam uşaqlarını “koronavirus xəstəsi” kimi qeydiyyata aldırdıqlarını deyən ekspert hesab edir ki, insanlar Ermənistanın müharibədə uduzduğunu yaxşı anlayırlar. “Bu gün Ermənistanda valideynlər uşaqlarını qorumaq hayındadırlar. Birinci Qarabağ Müharibəsində o uşaqların çoxunun ataları həlak olub, bəzilərinin qardaşları, yaxınları son həftələr həlak olub, ona görə də onlar təcavüzkar ordunun sıralarında döyüşmək istəmirlər. Ermənistan vətəndaşları “Böyük Ermənistan” xülyası ilə yaşayan siyasi rəhbərliyin xəstə niyyətlərinə, təcavüzkarlığına dəstək verməkdən imtina edərək, uşaqlarını “koronavirus xəstəsi” kimi qələmə verirlər. Mən o valideynləri yaxşı başa düşürəm, onlar uşaqlarını qorumaq üçün bu yola əl atırlar” - deyə T.Eyvazov vurğuladı.

İradə SARIYEVA

Son xəbərlər