Üzeyir Cəfərov: “Hər kəs döyüş sirrini qorumalıdır, əks halda...”
Son günlər müxtəlif sosial şəbəkələrdə döyüş bölgəsindən və azad edilən yaşayış məntəqələrindən videomateriallar yayılır. Artıq peşəkar zabitlərin bu videolarda ötürülən məlumat əsasında vurulduğu, şəhid olduğu deyilir. Bu isə bu tip videoların yayılmasının necə təhlükəli olduğunu göstərir.
Düzdür, sosial şəbəkə istifadəçilərinin bir qismi döyüş bölgəsindən foto və video paylaşılmaması qaydasına riayət etsə də, bəziləri buna məhəl qoymayaraq rəsmi təsdiq olunmamış materialları yayırlar.
Belə olan halda, döyüş bölgəsindən foto və video paylaşanların qanunvericiliyin tələbinə uyğun olaraq sərt formada cəzalandırılması təklif olunur.
- “Düşmən bu foto, video və qeydlərdən öz maraqları naminə istifadə edir, ordumuzun döyüş ruhunu, ona olan inamı sarsıtmaq üçün plan qurur, addımlar atır”
Məsəə ilə bağlı fikir bildirən hərbi ekspert Üzeyir Cəfərov qeyd etdi ki, sosial şəbəkə istifadəçiləri ciddi səhvlərə yol verirlər. Həm səbrsizlik göstərərək əsgər və zabitlərimiz barəsində lazımsız qeydlər yazır, həm döyüşlərin getdiyi əməliyyat istiqamətləri ilə bağlı məlumat, video və şəkil paylaşır, həm də döyüşlərdə həlak olan, şəhidlik zirvəsinə ucalan qardaşlarımızın ad-soyadını açıqlayırlar. Bunlar qətiyyən yolverilməz hallardır: “Düşmən bu foto, video və qeydlərdən öz maraqları naminə istifadə edir, ordumuzun döyüş ruhunu, ona olan inamı sarsıtmaq üçün plan qurur, addımlar atır. Bu savaş bizim haqq işimizdir. Şəhidlər var və müharibə tam başa çatanadək yeni itkilərimiz qaçılmazdır. Sentyabrın 27-dən sonra əməliyyatların ilk günlərindəki ümumi səliqə-sahman bir qədər eyforiya və məsuliyyətsizliklə əvəzlənib. Çox xahiş edirəm, buna əsla yol verməyək. Ən xırda ehtiyatsızlıqdan düşmən öz çirkin, mənfur məqsədləri üçün istifadə edir. Məsuliyyətli, ehtiyatlı, diqqətli olaq.
Sosial media ordumuza mane olur. İnanın, bunu tam səmimi və ciddi deyirəm. Bəzilərimiz bilərəkdən və ya bilməyərəkdən bir çox yanlışlığa yol veririk”.
Həmsöhbətimiz hesab edir ki, hər kəs döyüş sirrini qorumalıdır. Əks halda ən sərt formada məsuliyyətə, hətta lazımdırsa cinayət məsuliyyətinə cəlb etmək gərəkdir: “Müharibə səhlənkarlığı sevmir, ən xırda ehtiyatsızlıq həyat bahasına başa gəlir. Komandirlərimizi, qəhrəman oğullarımızı qoruyaq”.
Günel CƏLİLOVA
