Ermənistanın könüllü hərbi dəstələrinin bir-bir məhv edilməsi erməni cəmiyyətini daxildən partladan növbəti faktora çevrilir...

İbrahim Rüstəmli: “Bu artıq onların son ümidlərinin də puç olması deməkdir”

img

Məlum olduğu kimi, işğalçı Ermənistan bütün cəbhələrdə ard-arda ciddi məğlubiyyətə uğramaqdadır. Müzəffər Azərbaycan Ordusunun polad iradəsi, qətiyyəti düşmənin gözlədiyindən daha tez, daha keyfiyyətli və daha miqyaslı yeni şəkillənmə yaradıb.

Müxtəlif qaynaqlardan gələn, KİV-də yayılan məlumatlara görə, işğalçı ordu bütün cəbhə boyu ağ bayraq qaldıraraq, Azərbaycan Ordusuna təslim olmaq ərəfəsindədir. Qoşunlarımız cəbhənin bütün istiqamətlərində düşmənə ağır zərbələr endirməklə onun müdafiə xəttini darmadağın edib. Vəziyyətdən çıxmaq üçün Ermənistan müxtəlif ölkələrdən muzdlu döyüşçülərdən ibarət qruplar gətirsə də, könüllülərdən ibarət dəstələr təşkil etsə də, məğlubiyyətdən yaxa qurtara bilmir. Ən son məlumatlara görə, ordumuz erməni könüllü dəstələrini bir-bir məhv edir. Belə ki, cəbhənin Xocavənd, Füzuli və digər istiqamətlərində Ermənistan silahlı qüvvələrinin pərən-pərən salınan könüllülərdən ibarət dəstələri, döyüş texnikaları da məhv edilib. Göründüyü kimi, Ermənistan tərəfi könüllü dəstələri döyüşə cəlb etsə də, müharibənin gedişini öz xeyrinə dəyişə bilmir. Azərbaycan Ordusu ermənilərin könüllü hərbi dəstələrini bir-bir sürətlə məhv edir. Bütün bunların fonunda, könüllülərin belə hərbi iflası Ermənistan cəmiyyətinə nə vəd edir?

  • “Bütün bunlar erməni cəmiyyətində parçalanmalara gətirib çıxaracaq”

Məsələyə münasibət bildirən hərbi ekspert İbrahim Rüstəmlinin sözlərinə görə, könüllü dəstələrin bir-bir məhv edilməsi Ermənistan cəmiyyətində böhranı dərinləşdirəcək: “Bu artıq onların son ümidlərinin də puç olması deməkdir. Çünki ermənilər döyüşə xarici muzdlu qüvvələri cəlb etsələr də, nəsə edə bilmədilər. İndi də onların yerli könüllü dəstələri sıradan çıxarılır. Budəfəki müharibə Birinci Qarabağ savaşı deyil. O dövrdə ordumuz yeni yaranırdı. Ən başlıcası, sovet zabitləri bizə qarşı vuruşurdular. Bundan başqa, o vaxtkı mərkəzi hakimiyyət gizli olaraq Ermənistanı dəstəkləyirdi. İndi isə mənzərə tamam fərqlidir. Azərbaycan Ordusu fərqli bir situasiyada döyüş aparır. Bizim nizami ordumuz var və vahid komandanlıq tərəfindən idarə olunur. Əməliyyat şəraiti tam nəzarət altındadır. Belə bir şəraitdə Nikol Paşinyanın diletantcasına könüllülərə müraciət etməsi, yaradılan 30 nəfərlik qruplar döyüşdə dönüş yarada bilməz. Çox keçmədi ki, biz bunun nəticələrini gördük. Ordumuz həmin könüllü dəstələri bir-bir sıradan çıxarır. Azərbaycan mobil şəkildə qoşunların qarşılıqlı əlaqəsini təmin etməklə düşmənə ardıcıl zərbələr endirir. Bütün bunlar erməni cəmiyyətində parçalanmalara gətirib çıxaracaq”.

Hərbi ekspertin fikrincə, bütün bunlar həm də Ermənistanda ciddi siyasi böhranın yaranmasına səbəb olacaq.

Vidadi ORDAHALLI

Son xəbərlər