Azərbaycan dövlətinin ərazi bütövlüyünün təmin edilməsi, işğal altında olan torpaqlarımızın təcavüzkar Ermənistanın silahlı birləşmələrinin və terrorçu qruplarının işğalından azad edilməsi istiqamətində Azərbaycan Ordusunun həyata keçirdiyi hərbi əməliyyatlar dünyanın müxtəlif ölkələrində, qitələrində yaşayan azərbaycanlılar, xalqların nümayəndələri tərəfindən ciddi şəkildə dəstəklənir.
Azərbaycançılıq məfkurəsinə, ideologiyasına sadiq qalan hər bir soydaşımız həm Prezident İlham Əliyevə ünvanladığı məktubda, həm də yaşadığı ölkədə keçirilən icazəli aksiyalarda Azərbaycanın ədalətli, haqlı mövqeyini dəstəklədiyini bəyan edir, Ermənistanın təcavüzkar siyasətinə qarşı etiraz səsini ucaldır. Həm Azərbaycan türkləri, həm də ölkəmizdə yaşayan başqa xalqların xarici ölkələrdə yaşayan nümayəndələri azərbaycançılıq ideologiyasına öz sadiqliklərini təsdiqləyirlər və dövlətimiz, dövlətçiliyimiz ətrafında sıx birlışdiklərini, Ali Baş Komandana, müzəffər ordumuza dəstəklərini ifadə edirlər.
Sentyabrın 27-dən başlayaraq bu günə kimi müzəffər ordumuzun cəbhədə qazandığı uğurlar, düşmənin silahlı birləşmələrini, terroruçu qruplarını darmadağın etməsi xaricdə yaşayan azərbaycanlıları daha da ruhlandırır, onların apardıqları informasiya müharibəsinə ciddi stimul verir. Azərbaycançılıq ideologiyasının bayrağı altında birləşən soydaşlarımız Ermənistanın Azərbaycan xalqına, mülki əhalimizə qarşı törətdiyi son terror aktlarına da ciddi etiraz edirlər.
İsraildə yəhudilər və azərbaycanlıların ölkəmizə dəstək aksiyası...
Bu gün dünyanın bir sıra ölkələrində soydaşlarımız Azərbaycanın ədalətli mövqeyinə, şanlı ordumuza dəstək məqsədilə keçirdikləri icazəli aksiyalarda Ermənistanın Gəncədə mülki əhaliyə qarşı törətdiyi terror aktlarını ifşa etmək istiqamətində də dünyaya mühüm çağırışlar edir, mesajlar verirlər.
İsrailin müxtəlif yerlərində, o cümlədən də Hayfa, Təl-Əviv kimi şəhərlərində yaşayan azərbaycanlı və yəhudi soydaşlarımız “Qarabağ Azərbaycandır!” şüarı altında icazəli aksiya keçirərək bununla həm Azərbaycan dövlətinə, Azərbaycan Ordusuna dəstəklərini ifadə edıblər, həm də Ermənistanın Gəncədə və digər şəhərlərimizdə, yaşayış məntəqələrimizdə dinc əhaliyə qarşı törətdiyi terror aktlarına öz etirazlarını bildiriblər və işğalçı ölkənin xalqımıza qarşı faşist, terrorçu hərəkətlərini İsrail cəmiyyətinə çatdırıblar. Hətta onların birgə keçirdikləri həmrəylik aksiyasını pozmaq üçün bir qrup erməni tərəfindən hücuma da məruz qalıblar. Üzərində işğalçı ölkənin bayraqları olan maşınlarda olan ermənilər soydaşlarımızın yolunu kəsiblər, lakin bu dəfə də ədalət zəfər çalıb, düşmən geri çəkilib.
Hannover azərbaycanlıları da ölkəmizlə həmrəydirlər...
Bildiyimiz kimi, bir neçə gün əvvəl Almaniya-Azərbaycan Dostluq Cəmiyyətinin təşkilatçılığı ilə Almaniyanın Hannover şəhərinin “Kröpcke” meydanında baş tutan Gəncə terrorunun qurbanlarının anım mərasimində azərbaycanlı icmanın üzvləri iştirak ediblər.
Ermənistan silahlı qüvvələrinin dinc əhalini hədəfə alması, müxtəlif şəhər və rayonlarda onlarla günahsız insanın qətlə yetirilməsi, mülki obyektlərin dağıdılması kəskin şəkildə pislənib və bu vandalizm aktı səhnələşdirilmiş formada yerli ictimaiyyətə təqdim edilib.
Cəbhə bölgəsindən uzaqda yerləşən Gəncə və Mingəçevir şəhərlərinin ağır artilleriya atəşinə tutulmasının erməni vandalizminin bariz nümunəsi olduğunu qeyd edib, beynəlxalq ictimaiyyəti erməni vəhşiliyini qınamağa və ərazi bütövlüyünün bərpası istiqamətində apardığı haqlı mübarizədə Azərbaycanı dəstəkləməyə səsləyiblər.
Vyana da erməni terroruna “yox” deyir...
Məlum olduğu kimi, Avstriyanın Vyana şəhərindəki Azərbaycan diasporu işğalçı Ermənistan ordusunun Azərbaycana qarşı təcavüzünə, Azərbaycan ərazisindəki növbəti hərbi təxribatlarına etiraz olaraq Vyananın Helden Platz meydanında icazəli aksiya keçirib. Aksiya iştirakçıları Ermənistan silahlı qüvvələrinin Gəncə şəhərini və digər yaşayış məntəqələrini yenidən raket atəşinə tutması nəticəsində mülki vətəndaşların, o cümlədən, azyaşlı uşaqların və qadınların həlak olmasının, mülki obyektlərin dağıdılmasının vandalizm aktı olduğunu bildiriblər və dünya ictimaiyyətini Azərbaycana qarşı qərəzli mövqe tutmamağa, erməni terroruna göz yummamağa çağırıblar.
“Azer Der” cəmiyyətinin təşəbbüsü ilə keçirilən aksiyada Vyanada yaşayan və fəaliyyət göstərən soydaşlarımızla yanaşı, türk icmasının nümayəndələri də iştirak ediblər. Aksiyada çıxış edən soydaşlarımız Gəncə və Mingəçevir şəhərlərinin raket atəşinə tutulmasını, Gəncədə onlarla mülki vətəndaşın, o cümlədən, günahsız körpələrin həlak olmasından təəssüf hissi keçirdiklərini bildiriblər.
Aksiyada Azərbaycan Respublikasının Dövlət Himni ilə yanaşı, Avstriyanın himni də oxunub. İştirakçılar müxtəlif dillərdə “Qarabağ Azərbaycandır!”, “Gəncə üçün dua et!”, “Erməni terrorçuluğuna son qoyun!”, “Mülki insanlar toxunulmazdır!”, “Uşaq ölümünə son qoyun!”, “Biz terrora yox deyirik”, “İşğalçı dövləti dəstəkləməyin!”, “Ermənistan - BMT qətnamələrinə əməl et!”, “Ermənistana inanma”,“Ermənistanın işğalına son!”, “Ermənistanın təcavüzünə son”, “Erməni terroruna son” şüarları səsləndiriblər.
Münhendə də bizi dəstəklədilər...
Münhen Azərbaycanlıları Mədəniyyət Mərkəzinin təşkilatçılığı ilə Ermənistan silahlı qüvvələri tərəfindən Azərbaycanın ikinci böyük şəhəri olan Gəncənin növbəti dəfə raket atəşinə tutulması nəticəsində dinc əhalinin, mülki infrastrukturun hədəfə alınmasına etiraz olaraq yürüş təşkil edilib.
Yürüşdə işğalçı Ermənistanın Azərbaycanın yaşayış məntəqələrində, xüsusilə Gəncə və Mingəçevir şəhərlərində dinc əhaliyə hədəflənmiş terror aktını insanlıq əleyhinə yönəlmiş müharibə cinayəti, mülki şəxslərin, azyaşlıların öldürülməsini soyqırım aktı kimi qiymətləndiriblər.
Azərbaycanlılarla yanaşı, türk icmasının nümayəndələri və digərlərinin iştirakı ilə Marienplatz meydanından başlayan yürüş Odeonsplatz meydanına kimi davam edib. İştirakçılar müxtəlif dillərdə “Qarabağ Azərbaycandır!”, “Gəncə cəbhə zonası deyil!”, “Erməni terrorçuluğuna son qoy!”, “Uşaq ölümünə son qoyun!”, “Biz terrora yox deyirik”, “İşğalçı dövləti dəstəkləməyin!”, “Ermənistan - BMT qətnamələrinə əməl et!” kimi şüarlar səsləndiriblər. Bildirilib ki, dünya birliyi və beynəlxalq təşkilatlar dinc əhaliyə qarşı yönəlmiş bu cür zorakılığı qınamalıdır. Yürüş zamanı Ermənistanın Azərbaycanın mülki əhalisinə qarşı törətdiyi cinayətlər, Gəncə və Mingəçevir şəhərlərində törədilən vandalizm aktları ilə bağlı yerli ictimaiyyət geniş məlumatlandırılıb.
İsveç Krallığında erməni terroru pislənib
İsveç Krallığının Stokholm şəhərindəki Azərbaycan diasporu işğalçı Ermənistan ordusunun Azərbaycana qarşı təcavüzünə, Azərbaycan ərazisindəki növbəti hərbi təxribatlarına etiraz olaraq Sergelakaden meydanında icazəli aksiya keçirib. Aksiya iştirakçıları Ermənistan silahlı qüvvələrinin təxribatlarını, Gəncə şəhərinin yenidən raket atəşinə tutmasını və nəticədə mülki vətəndaşların, azyaşlıların, qadınların həlak olmasını, mülki obyektlərin dağıdılmasını kəskin şəkildə pisləyiblər.
Skandinaviya Azərbaycanlılarının Koordinasiya Şurasının və Azərbaycan İsveç Federasiyasının təşəbbüsü ilə keçirilən aksiyada Stokholmda yaşayan və fəaliyyət göstərən soydaşlarımız iştirak ediblər.
Bern də bizimlədir
Qeyd etdiyimiz kimi, soydaşlarımız Ermənistanın işğalçılıq, terrorçuluq hərəkətinə qarşı azərbaycançılıq şüarı altında birləşiblər. Belə ki, İsveçrədə yaşayan azərbaycanlılar işğalçı Ermənistan ordusunun ölkəmizə qarşı təcavüzünə, Azərbaycan ərazisindəki növbəti hərbi təxribatlarına etiraz olaraq Bernin Helvetia Platsa meydanında icazəli aksiya keçiriblər. Aksiya iştirakçıları Gəncə şəhərinin və digər yaşayış məntəqələrinin Ermənistan silahlı qüvvələri tərəfindən yenidən raket atəşinə tutulması nəticəsində mülki vətəndaşların, o cümlədən, azyaşlı uşaqların və qadınların həlak olmasını, mülki obyektlərin dağıdılmasını kəskin şəkildə pisləyiblər.
İsveçrə Azərbaycanlıları Koordinasiya Şurasının, Azərbaycanlıların İsveçrədəki Mədəniyyət Mərkəzinin təşəbbüsü ilə keçirilən aksiyada Berndə yaşayan və fəaliyyət göstərən soydaşlarımız iştirak ediblər. Aksiyada “Qarabağ Azərbaycandır!”“İşğalçı dövləti dəstəkləməyin!”, “Ermənistan terrorçu dövlətdir!”, “Azərbaycan ədalət tələb edir!”, “Mülki insanlar toxunulmazdır!”, “İşğal beynəlxalq sülhə təhlükədir!”, “Uşaq ölümünə son qoyun!” kimi şüarlar səsləndirilib.
Almaniyadakı Azərbaycan diasporu Gəncə terroruna qarşı etiraz aksiyası keçirib
Məlumata görə, Almaniyanın Köln şəhərində Almaniya-Azərbaycan Dostluq Cəmiyyəti tərəfindən icazəli aksiya təşkil edilib. Şəhərin Roncalliplatz meydanı adlanan ərazisində baş tutan aksiyada azərbaycanlı icmasının Köln şəhərində və ətraf ərazilərdə yaşayan üzvləri iştirak ediblər. İştirakçılar müxtəlif dillərdə “Qarabağ Azərbaycandır!”, “Azərbaycan sülh istəyir!”, “Gəncə cəbhə bölgəsi deyil!”, “Mülki insanlar toxunulmazdır!”, “Biz terrora yox deyirik!”, “Erməni terrorçuluğuna son qoyun!”, “Uşaq ölümünə son qoyun!”, “Ermənistan - BMT qətnamələrinə əməl et!” və s. şüarlar səsləndiriblər.
Aksiya iştirakçıları çıxışlarında Azərbaycanın ərazi bütövlüyünün bərpası uğrunda apardığı haqlı mübarizəni dəstəklədiklərini bildirib, beynəlxalq ictimaiyyəti Ermənistanın işğalçı və təcavüzkar siyasətinə son qoyulması üçün ədalətli mövqe nümayiş etdirməyə çağırıblar.
Xaricdə yaşayan azərbaycanlılar həqiqətlərin dünya ictimaiyyətinə çatdırılmasını davam etdirirlər
İordaniya Haşimilər Krallığındakı Azərbaycan diasporunun bu ölkənin geniş oxucu auditoriyasına malik www.orobanews.com xəbər portalında Ermənistanın təxribatlarını pisləyən bəyanatı dərc olunub.
Bəyanatda bildirilir: “30 ilə yaxındır ki, Ermənistan Azərbaycan ərazilərini işğal altında saxlayır. Ermənistan silahlı qüvvələrinin hərbi təxribatları bir daha Ermənistanın işğalçı dövlət olmasını təsdiqləyir. BMT Təhlükəsizlik Şurasının 4 qətnaməsinə əməl etməyən işğalçı dövlətin münaqişənin sülh yolu ilə nizamlanmasında maraqlı olmadığı, yeni ərazi iddiasında olduğu da vurğulanır. Dünya ictimaiyyətini Cənubi Qafqaz regionunda sülhə və sabitliyə ciddi təhlükə olan Ermənistanın bu işğalçı siyasətinə son qoymağa çağırırıq”.
Misirdəki Azərbaycan diasporunun sədri, tədqiqaçı-alim Seymur Nəsirovun bu ölkənin aparıcı qəzetlərindən biri olan "Almasryalyoum" qəzetinin saytında Azərbaycanın ərazi bütövlüyü uğrunda Ermənistana qarşı apardığı haqlı mübaribənin səbəbləri barədə yazısı dərc olunub. O, Azərbaycanın əzəli torpağı olan Dağlıq Qarabağın mübahisəli ərazi olmadığını və ölkəmizin ərazi bütövlüyünün bərpası uğrunda müharibənin yalnız işğal altında olan torpaqlarımızda aparıldığını vurğulayıb.
Bununla yanaşı, Səudiyyə Ərəbistanı Krallığı, Pakistan İslam Respublikası, Oman Sultanlığı və Əlcəzair Xalq Demokratik Respublikasında yaşayan azərbaycanlılar da Azərbaycan dövlətinin yanında olduqlarını bəyan edərək, yaşadıqları ölkələrin yerli ictimaiyyətini Azərbaycanın haqlı mövqeyini dəstəkləməyə və işğalçı Ermənistanın təcavüzkarlıq siyasətini pisləməyə çağırıblar.
Qeyd edək ki, məlumatlar Diaspor Komitəsinin rəsmi saytından götürülüb.
Azərbaycançılıq ideologiyası böyük təsir gücünə malikdir, onun ən böyük gücü isə birlik, həmrəylik yaratmaqdır, soydaşlarımızı bir ideya, vahid məqsəd ətrafında birləşdirməkdir. Bu gün soydaşlarımız azərbaycançılıq ideologiyasına sadiqliklərini ifadə edir və Azərbaycanın ədalətli mövqeyini dünyaya çatdırmaq üçün əllərindən gələni edirlər. Onlar inanırlar ki, bir gün mütləq ədalət zəfər çalacaq, o zəfərin ilk sədalarını bizə müzəffər Azərbaycan Ordusu eşitdirir.
İradə SARIYEVA
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
