Prezident İlham Əliyev Yaponiyanın “Nikkei” qəzetinə müsahisində Azərbaycanın sülh tərəfdarı olduğunu bir daha nümayiş etdirib:
“…Bəli, atəşkəs humanitar zəmində elan olunmuşdur. Bildiyiniz kimi, Moskva bəyannaməsində substantiv danışıqlara və danışıqlar formatının dəyişməz olaraq qaldığına da istinad var idi. Bu isə Ermənistan tərəfindən qondarma “Dağlıq Qarabağ hökumətini” danışıqlara cəlb etmək cəhdlərinin artıq olmayacağı deməkdir. Bu bizim tərəfimizdən və Minsk Qrupu tərəfindən rədd edilmişdir. Buna görə, əlbəttə, əgər Ermənistan danışıqlara sadiq qalarsa və əraziləri boşaltmaq üçün üzərinə ciddi öhdəlik götürərsə, - hansını ki, onlar hələ də elan etməyiblər, - bu halda bu atəşkəs uzunmüddətli olacaqdır. Çünki biz bu problemi sülh yolu ilə həll etmək istəyirik. Lakin, əgər onlar resurslarını səfərbər etmək, əlavə əcnəbi hərbi yardım almaq və bizə qarşı yeni hücuma keçmək üçün bu atəşkəsdən istifadə etməyə cəhd göstərəcəklərsə, əlbəttə, bu atəşkəs uzun müddət davam etməyəcəkdir. Bu onlardan asılıdır”.
Ölkə başçısı hansı şərtlərlə hərbi əməliyyatların dayandırıla biləcəyi ilə bağlı da fikirlərini izah edib:
“Onlar bu əraziləri boşaldacaqlarına dair üzərlərinə ciddi öhdəlik götürməlidirlər. Çünki bu, Minsk Qrupunun vasitəçiliyi ilə iki ölkə arasında razılaşdırılmış əsas prinsiplərin bir hissəsidir. Əsas prinsiplərdə deyilir ki, işğal olunmuş ərazilər Azərbaycana qaytarılmalıdır, bizim qaçqın və məcburi köçkünlərimiz işğal olunmuş bütün ərazilərə qayıtmalıdırlar, o cümlədən Dağlıq Qarabağın ərazisinə, o cümlədən qədim Azərbaycan şəhəri olan Şuşanın ərazisinə. Buna görə Ermənistan hökuməti bu prinsiplərə sadiq olduğunu, bu əraziləri boşaldacağını açıq şəkildə bəyan etməlidir və bundan sonar, əlbəttə ki, danışıqlar başlayacaqdır. Biz indi birinci olaraq ərazilərin boşaldılması və sonra danışıqların başlanılması ilə bağlı ilkin şərti irəli sürmürük. Biz hazırda Ermənistan tərəfindən, bu zorakılığa və dinc əhaliyə qarşı hərbi cinayətlərin törədilməsinə görə məsul olan şəxsdən, şəxsən baş nazirdən tələb edirik ki, Ermənistanın işğal olunmuş əraziləri boşaldacağını desin. Bundan sonar, əlbəttə ki, münaqişənin nizamlanması döyüş meydanından danışıqlar masasına keçəcəkdir”.
Göründüyü kimi, İlham Əliyev sülhün əldə olunması üçün çox konstruktiv bir mövqe ortaya qoyur. Bunun üçün yalnız Paşinyanın torpaqlardan nə vaxt çıxacağı ilə bağlı üzərinə öhdəlik götürməsinin vacibliyi vurğulanır. Paşinyan bunu da etmirsə, məqsədi nə ola bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, bunun bir adı var - işğaldan əl çəkmək istəməmək: “Paşinyan hadisələrin bu axarda gedəcəyini gözləmirdi. Məhz buna görə də hakimiyyətə gələndən bir müddət sonra yeni olduğunu bəhanə etdi. Bir müddət danışıqlardan belə yayındı. Sonra isə qeyri-konstruktivlik göstərdi. Sülh prosesinə xələl gətirən hərəkətlər etdi və addımlar atdı. Hətta bir az da irəli gedərək, danışıqların formatını dəyişməyə çalışdı. Sonda indiki nəticə ilə üzləşməli oldu. İlham Əliyev əldə olunan razılaşmalara uyğun tələblər irəli sürür. Azərbaycanın ətraf rayonlarının işğaldan tam azad edilməsi öhdəliyini Ermənistan danışıqlar prosesində üzərinə götürüb. İş burasındadır ki, Paşinyan bunu da etmək istəmir. Bizim Prezident olduqca konstruktiv təkliflə çıxış edir. Paşinyan çıxıb desin ki, torpaqları hansı qrafiklə boşaldacaq, bununla da hərbi əməliyyatlara ehtiyac qalmasın. Ancaq Paşinyan olmayan gücü ilə müharibə yolunu seçir. Onsuz da tez bir zamanda Azərbaycan öz ərazi bütövlüyünü təmin edəcək. Artıq bu işin ən çətin mərhələsi arxada qalıb. Onda heç Paşinynın qrafikinə də ehtiyac duyulmayacaq. Paşinyan bilir ki, müqavimət yersizdir. Sadəcə, həmin rayonları imzası ilə yox, hərb meydanında uduzaraq verdiyi təəssüratını yaratmağa çalışır. Seçim onlarındı. Azərbaycan bu məsələdə həm haqlı, həm də güclü tərəfdir. Paşinyan istəyir ki, ölkənin müxalifəti uğursuzluqların ardını yaşamamaq üçün onu belə öhdəliyi götürməyə məcbur etsin. Yəni bu məsuliyyəti bölüşmək istəyir”.
Görünən budur ki, Paşinyan öz ambisiyalarının ucbatından Ermənistanı daha da çıxılmaz vəziyyətə sürükləməyə çalışır.
Məhəmmədəli QƏRİBLİ
