“Ərazilərin itirilməsinə görə məsuliyyət daşıyan o insanlar bu gün həmin partiyaların, demək olar ki, 30 ildir rəhbərləridir”. Prezident İlham Əliyev bu fikirləri Yaponiyanın “Nikkei” qəzetinə müsahibəsində deyib.
Ölkə başçısının sözlərinə görə, siyasi partiyaların mütləq əksəriyyəti işğal olunmuş ərazilərin qaytarılması ilə bağlı onun yürütdüyü siyasəti tam dəstəkləyir: “Cəmi iki partiya bu prosesdə iştirak etmir. Cəmi iki partiya Azərbaycanın milli maraqlarının əleyhinə çıxış edir. Bunlar Xalq Cəbhəsi partiyası və Müsavat partiyasıdır. Yeri gəlmişkən, bu iki partiya mənim siyasi dialoqla bağlı təklifimi qəbul etmədi. Yalnız iki partiya, birbaşa maliyyələşdirilməsi kənardan gələn, həmişə Azərbaycanın milli maraqlarına qarşı çıxan, Ermənistanın ərazilərimizi işğal etdiyi zaman - 1992-1993-cü illərdə hakimiyyətdə olduqları üçün ərazilərimizin itirilməsinə görə məsuliyyət daşıyan bu iki partiya, Xalq Cəbhəsi və Müsavat. Ərazilərin itirilməsinə görə məsuliyyət daşıyan o insanlar bu gün həmin partiyaların, demək olar ki, 30 ildir rəhbərləridir. Heç kim demokratiyadan danışmır, heç kim onların bu vəzifədə, demək olar ki, 30 il ərzində necə qaldıqları barədə danışmır. Buna görə bizi tənqid etmək istəyənlər yaxşı olardı ki, güzgüyə baxsınlar. Bizim gözümüzün önündə, beynəlxalq ictimaiyyətin gözü önündə dırnaqarası demokratiyalarda nümayişlərin necə dağıdıldığını, insanların mitinqlərdə necə öldürüldüyünü, yaralandığını, xəsarət aldıqlarını görürük. Biz bunları hər həftə görürük. Etirazçıları dağıtmaq üçün polisin itlərdən və atlardan necə istifadə etməsini görürük. Siz bunu Azərbaycanda görməyəcəksiniz, heç vaxt. Buna görə bizi tənqid edənlər, yaxşı olardı ki, öz işləri ilə məşğul olsunlar”.
Həqiqətən də uzun illərdir bir partiyaya rəhbərlik edən şəxslərin bu barədə danışmağa haqqı yoxdur.
“Sözügedən mövqedən çıxış edənlər bir vaxtlar hakimiyyəti idarə edə bilmədilər, ərazilərimizin işğal edilməsinin qarşısını almadılar”
Məsələyə münasibət bildirən AVCİYA-nın vitse-prezidenti, tarix elmləri doktoru, professor Məhərrəm Zülfüqarlının sözlərinə görə, demokratiyadan danışanlar yaxşı olardı ki, özlərinin nə dərəcədə demokrat olduğunu təftiş etsinlər: “Prezident İlham Əliyevin son illər, xüsusən də sentyabrın 27-dən başlanan Vətən müharibəsi dövründə atdığı addımlar böyük rəğbətlə qarşılanır və dəstəklənir. Eyni zamanda, bütün bunlar İlham Əliyevin dünyada olan nüfuzunu daha da artırır. İndiki dövrdə hətta Prezidenti tənqid edən bəzi şəxslər də ölkə başçısına dəstəklərini bu və ya digər qaydada nümayiş etdirirlər. Artıq Prezidentin tutduğu siyasi xəttin düzgünlüyü yüzdə-yüz sübut olunub. Eyni zamanda, bütün xalq ölkə başçısının arxasındadır. Ona görə də uzun illər partiya rəhbəri olan, heç bir iş görə bilməyənlərin bu haqda danışmağa haqları yoxdur. İstər mənəvi, istərsə də siyasi baxımdan. Bunlar hər dəfə Prezidentə qarşı tənqidi fikirlər söyləyirlər. Ancaq bu mövqedən çıxış edənlər bir vaxtlar hakimiyyəti idarə edə bilmədilər, ərazilərimizin işğal edilməsinin qarşısını almadılar. Daha doğrusu, bunu bacarmadılar. Bunu hər kəs yaxşı bilir. Bunların rəhbərlik etdiyi siyasi təşkilatların özündə belə demokratiya yoxdur. Ancaq hər addımbaşı demokratiyadan danışırlar. Prezident çox doğru olaraq vurğuladı ki, hansısa partiyanın sədri 20-30 ildir təşkilata rəhbərlik edirsə, despotik bir rejim yaradırsa, kənardan gələn pulla yaşayırsa, belələrinin demokratiyadan danışmağa haqqı yoxdur. Belələri Prezidentin yanında çox cılızdır”.
Ekspertin fikrincə, Prezidentin apardığı uğurlu siyasət sayəsində ölkəmiz müharibədə qələbələr qazanır.
Vidadi ORDAHALLI
