01/12/2020 04:14
728 x 90

Ermənistan informasiya müharibəsində hər bir Azərbaycan vətəndaşını tora sala bilər - təhlükədən necə keçməli...

Aytəkin Kamranqızı: “Sosial şəbəkə istifadəçiləri yalnız dövlət qurumları tərəfindən rəsmən təsdiqlənən məlumatları paylaşmalıdırlar”

img

Sentyabrın 27-də saat 06:00 radələrində Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif növ artilleriya qurğularından intensiv atəşə tutub.

Nəticədə cəbhə bölgəsində genişmiqyaslı hərbi əməliyyatlar başlayıb. Cəbhə xəttində gərginliyin artması informasiya təhlükəsizliyi məsələsini yenidən gündəmə gətirib. Bu gün mübarizə təkcə cəbhədə yox, informasiya məkanında da gedir. Belə bir vaxtda dezinformasiyalar, yəni “fake” profillərlə yayılan yalan, saxta xəbərlər üstünlük təşkil etməyə başlayır.

Bəllidir ki, müharibə şəraitində yaşayan Azərbaycan üçün informasiya təhlükəsizliyi, dövlət sirri olan hərbi məlumatların yayılmaması ən vacib məsələlərdəndir. Artıq Qarabağ münaqişəsi regional xarakterini itirib və qloballaşmış bir problemə çevrilməyə başlayıb. Olduqca geostrateji bir bölgədə olduğundan, münaqişənin regiona təhlükə yaratmasında informasiya çox mühüm rol oynayır. Bildiyimiz kimi, bu gün də ermənilər xarici ölkələrdə olan diasporlarının dəstəyilə Azərbaycana qarşı informasiya mübarizəsi aparırlar.

Ermənilərin təsiri altında olan təşkilatlar da beynəlxalq ictimai rəydə Azərbaycanla bağlı mənfi rəy formalaşdırmağa davam edirlər. Ermənistan kütləvi informasiya vasitələrində bu gün də döyüş bölgələrindən həqiqətə uyğun olmayan, yalan məlumatlar yayımlanır və ictimaiyyətdə ölkəmizə qarşı, hazırkı münaqişəyə qarşı mənfi rəy yaratmağa çalışırlar.

Qeyd edək ki, Müdafiə Nazirliyi sosial şəbəkə istifadəçilərinə müraciət edib. Müraciətdə deyilir: “Son günlər bəzi sosial şəbəkə istifadəçiləri əməliyyatların aparıldığı istiqamət və cari vəziyyətlə bağlı müxtəlif şəxsi fikirlər paylaşaraq hadisələri qabaqlamağa çalışırlar. Bildiririk ki, bu cür addımlar həm məxfilik rejiminin pozulmasına, həm də hərbi qulluqçularımızın həyatının təhlükəyə atılmasına səbəb ola bilər. Bütün bunları nəzərə alaraq, sosial şəbəkə istifadəçiləri və KİV nümayəndələrini rəsmi surətdə öz təsdiqini tapmamış məlumatları yaymamağa və yalnız Müdafiə Nazirliyinin rəsmi məlumatlarına istinad etməyə çağırırıq”.

  • “…yüz ölçüb, bir biçmək lazımdır”

Sosioloq Aytəkin Kamranqızı bildirdi ki, hazırda yalnız dövlətin rəsmi məlumatlarına inanmaq, düşmənin və yeni yaranan şübhəli resursların, sosial şəbəkə qruplarının fikirlərinə inanmamaq, bütün informasiyalara şübhə ilə yanaşmaq, yüz ölçüb bir biçmək lazımdır: “Azərbaycan çox güclü informasiya siyasəti aparır, hər şey müharibə dövrünün qanunlarına uyğundur. Hərbi vəziyyətə uyğun yaşamalıyıq. Hər birimiz əsgərik, məsuliyyətimiz var. Hər kəs daşıdığı hərbi və dövlət sirrini qorumalıdır”.

Həmsöhbətimiz onu da əlavə etdi ki, sosial şəbəkələrə xüsusi nəzarət olunmalıdır: “Rəsmi təsdiq olunmamış materiallar yayımlanmamalıdır. İnsanların özləri də məsuliyyətli olmalıdırlar. Məlumdur ki, “azərbaycanlı” adı ilə yüzlərlə erməni sosial şəbəkə istifadəçisi bizim əleyhimizə işləyir, müxtəlif təxribatlar yayırlar. Bu halda sosial şəbəkə istifadəçilərinin şəkil paylaşaraq “mənim qohumum, dostum filan yerdə döyüşür” və üstəlik, onun fotosunu da yerləşdirməsi düzgün deyil. Bu istiqamətdə həm tənzimlənmələr olmalı, həm də ciddi maarifçilik işləri aparılmalıdır. Sosial şəbəkə istifadəçiləri yalnız dövlət qurumları tərəfindən rəsmən təsdiqlənən məlumatları paylaşmalıdırlar”.

Günel CƏLİLOVA

Son xəbərlər