“Əsgərlərə göndərdiyimiz adyal və isti paltar kifayət etmir, donurlar” – Erməni tikişçilər ciddi faktlar açıqlayır…

Azərbaycan Silahlı Qüvvələri qarşısında tab gətirməyən erməni ordusu mülki əhalinin yaşadığı əraziləri atəşə tutmaqla hərbi cinayətlərini davam etdirir. Azərbaycan Ordusunun gücünü görən işğalçı ölkənin hərbçiləri geri çəkilirlər.

Yayılan məlumatlara görə, təcavüzkar ölkənin hərbçiləri hazırda çətin vəziyyətdədirlər. Onların çətinliklərindən biri də isti geyimdir.

Ermənistanda fəaliyyət göstərən "Gloria” tikiş fabrikinin rəhbəri Naira Arakelyan həmin ölkənin televiziyasına müsahibəsində bildirib ki, erməni əsgərləri soyuqdan donurlar: “Cəbhə bölgəsinə göndərdiyi adyal və isti geyimlər əsgərlərə bəs etmir. Ona görə də onlara daha çox isti geyimlər göndərilməlidir. Tikiş fabrikinin isə buna gücü çatmır. Odur ki, toplanan vəsaitlə xaricdən isti geyimlərin alınması nəzərdə tutulur. Əsgərlər arasında depressiya çoxdur. Onlara fabrikin az da olsa məhsulundan göndəririk ki, yanlarında olduğumuzu göstərək. Çünki güclü əsgərin güclü dəstəyə ehtiyacı var. Gələn həftə isti gödəkçələrin 1000-dən çox nüsxəsi də əsgərlərə təhvil veriləcək”.

Onu da bildiriək ki, “Kommandos” hərbi klubunun üzvü Voskan Marqaryan öz “Facebook” səhifəsində hərbi geyim sarıdan problem yaşandığını qeyd etmişdi: “Ermənistanda müharibəyə görə hərbi geyimlərin qiymətində böyük artım müşahidə edilir. Daha öncə 16 000 drama başa gələn isti gödəkcəni indi 25 000 drama satırlar. Hərbi geyim satışı ilə məşğul olanların 80 %-i müharibə hesabına böyük gəlirlər qazanmağa başlayıblar”.

Məlumat üçün bildirək ki, oktyabrın 5-də Ermənistanın Baş naziri Paşinyan hərbi forması olanlara müraciət edərək onları mərkəzi hərbi komissarlığa təhvil vermələrini xahiş edib.

• “Ermənistanda müharibəyə görə hərbi geyimlərin qiymətində böyük artım müşahidə edilir”

Hərbi ekspert Rasim İsgəndərov bildirdi ki, hazırda Ermənistan ordusunda çoxlu problem yaşanır. O problemlərdən biri də hərbi geyim çatışmazlığıdır: “Ermənistan rəhbərliyində olan şəxslərin özləri də dəfələrlə orduda geyim sarıdan problem yaşandığını etiraf etmişlər. Orduda geyim qıtlığının bir səbəbi də qiymətlərin bahalaşmasıdır. Sahibkarlar fürsətdən istifadə edərək geyimi yüksək qiymətə satırlar. Həm də Ermənistanın büdcəsi hərbi geyim almağa imkan vermir. Bu səbəbdən də Ermənistanın ordunu paltarla da təmin etməyə gücü qalmayıb. Ona görə də ermənilər Dağlıq Qarabağa döyüşməyə mülki formada gəlirlər".

Günel CƏLİLOVA