Ərazilərimizin azadlıq xəbərinin Prezidentin özü tərəfindən yayılması ictimai fəallığa güclü təsir faktoru kimi…
Mənfur qonşularımız olan ermənilər XX əsrin 80-ci illərinin sonlarından başlayaraq ərazi bütövlüyümüzə iddia qaldırmışlar. Ermənilər havadarlarının köməkliyilə yenicə müstəqilliyini bərpa edən gənc Azərbaycan dövlətinin torpaqlarının 20%-ni zəbt edib, 1 milyondan çox qaçqın və məcburi köçkünü öz doğma ocaqlarından didərgin salıblar.
Bu problemi sülh yolu ilə həll etmək üçün ATƏT-in Minsk Qrupunun vasitəçiliyilə 1994-cu ildə atəşkəs müqaviləsi imzalanıb. Bu müqavilədə problemin sülh yolu ilə həll ediləcəyi müddəası da var idi.
Prezident İlham Əliyevin səylərinə baxmayaraq, erməni tərəfinin qeyri-konstruktiv yanaşması üzündən aparılan danışıqlar bir nəticə vermədi. Nikol Paşinyanın hakimiyyətə gəlməsi ilə bu danışıqlar təmamilə donduruldu. İyirmi altı il davam edən, heç bir fayda verməyən danışıqlardan Azərbaycan xalqının səbr kasası daşmışdı. Azərbaycan Respublikasının rəhbərliyi son illərdə Ermənistan və ATƏT-in Minsk Qrupunun üzvlərini bir neçə dəfə xəbərdarlıq etmişdi ki, torpaqlarımız sülh yolu ilə azad olunmasa, hərbi yolla torpaqlarımızı işğaldan azad edəcəyik.
Sentyabr ayının 27-si Ermənistan tərəfinin hücumuna cavab olaraq, Ali Baş Komandanın əmrilə Azərbaycan Silahlı Qüvvələri əks-hücuma keçdi. Bu gündən etibarən xalqımızın tarixində yeni şanlı səhifə açıldı. Xalqımızın misli görünməyən iradəsinə arxalanan Ali Baş Komandan İlham Əliyevin rəhbərliyilə qüdrətli ordumuz işğal olunan torpaqlarımızı müvəffəqiyyətlə işğalçılardan azad etməyə başladı. Azərbaycan xalqının bu iradəsi qarşısında heç bir qüvvə tab gətirə bilməz. Düşmənə qarşı mübarizədə 10 milyonluq xalq tək yumruq altında birləşdi. Bu İkinci Qarabağ Müharibəsində müzəffər ordumuz xalqının yeni qəhrəmanlıq tarixini yazır. Qürurvericidir ki, rəşadətli ordumuzun uğurlu əməliyyatları nəticəsində işğal altında olan xeyli sayda yaşayış məntəqəmiz düşmən tapdağından azad olundu.
Sevindirici məqamlardan biri də odur ki, torpaqların azad olunması xəbərini Prezident İlham Əliyev şəxsi “Tvitter” hesabından paylaşır. Qələbə xəbərini ölkə başçısının özünün açıqlaması ölkə ictimaiyyəti tərəfindən böyük rəğbətlə qarşılanır.
Demək olar ki, artıq vətəndaşlar hər gün, hər saat ölkə rəhbərinin yeni qələbə tvitini böyük həyəcanla gözləməkdədirlər.
- Tahir Mirkişili: “Prezidentin məhz cəbhə, qalibiyyət xəbərlərini “Twitter”dən elan etməsi Azərbaycanın ən müasir ölkələr sırasında olmasına dəlalət edir”
Milli Məclisin komitə sədri Tahir Mirkişili qeyd etdi ki, Prezident İlham Əliyevin qələbə xəbərlərini “Twitter”dən elan etməsi təqdirəlayiq haldır: “Çünki Azərbaycanın apardığı Vətən müharibəsinin Ali Baş Komandanı cənab Prezidentdir. “Twitter” sosial şəbəkələrin rəsmi dili sayılır. “Facebook”, “Instagram” və digər sosial şəbəkələrdən fərqli olaraq, diplomatik, rəsmi dil “Twitter”də istifadə olunur. Təəssüf ki, bizim azərbaycanlı istifadəçilərin böyük əksəriyyəti “Facebook”dadır. “Twitter”in getdikcə populyarlaşması dünyada gedən trenddir. Mən düşünürəm ki, xəbərlərin cənab Prezident tərəfindən tvit edilməsi daha çox şad xəbər almaq üçün “Twitter”dən istifadənin populyarlaşmasına səbəb olacaq”.
Deputatın sözlərinə görə, ümumilikdə, müasir texnologiyalardan istifadə edilməsi Azərbaycanın dövlət siyasətinin tərkib hissəsidir: “Fikir verirsinizsə, biz döyüşdə, informasiya siyasətində müasir texnologiyalardan istifadə edirik. Cənab Prezidentin məhz cəbhə, qalibiyyət xəbərlərini “Twitter”dən elan etməsi Azərbaycanın ən müasir ölkələr sırasında olmasına dəlalət edir”.
- Fatimə Hacıbəyli: “Qələbə xəbərini Prezident İlham Əliyev özü şəxsən sosial şəbəkə hesabından paylaşır, həmin xəbərləri eşidəndə, görəndə hər kəs sevinc, qürur hissi keçirir”
“Vəfa” Sosial-İctimai Birliyinin rəhbəri Fatimə Hacıbəyli qeyd etdi ki, ərazilərin düşmən işğalından azad olunması ilə bağlı şad xəbərləri Prezident İlham Əliyev özü şəxsən sosial şəbəkə hesabından paylaşır: “Həmin xəbərləri eşidəndə, görəndə hər kəs sevinc, qürur hissi keçirir. Bu xəbərləri eşidəndə adam çox böyük həyəcan keçirir. Həmin xəbərləri adi qarşılamaq mümkün deyil. Cənab Prezidentin fəaliyyəti hər bir Azərbaycan vətəndaşını ruhlandırır. Yorulmadan, gecə-gündüz çalışır, xarici mətbuata müsahibə verir, beynəlxalq təşkilatlarla, digər ölkələrin prezidentləri ilə telefon əlaqəsi yaradır, vəziyyəti izah edir”.
Günel CƏLİLOVA
