“Şuşanın işğaldan azad edilməsi qarşıda duran hədəflər arasında xüsusi yer tutur”. Prezident İlham Əliyev bu fikirləri Türkiyənin “A Haber” televiziya kanalına müsahibəsində müxbirin Şuşa ilə bağlı sualına cavabında səsləndirib.
Ölkə başçısının sözlərinə görə, işğal edilmiş torpaqların hər bir qarışı, hər bir şəhər bizim üçün doğmadır, əzizdir: “Mənim üçün hər bir kəndin dəyəri, qiyməti o biri kəndlə müqayisədə, o biri şəhərlə müqayisədə eynidir, bərabərdir. Ancaq siz də yaxşı bilirsiniz ki, Şuşanın Azərbaycan xalqının qəlbində xüsusi yeri var. Bu, bizim tarixi şəhərimizdir, qədim mədəniyyət ocağıdır. Şuşa Azərbaycan xalqına bir çox istedadlı, dahi şəxslər bəxş edibdir. Əlbəttə ki, Şuşasız bizim işimiz yarımçıq olar. Bilirsiniz, bundan əvvəlki dövrdə danışıqlar masasında bir çox məsələlər var idi. Bəzi təkliflər ondan ibarət idi ki, yaxşı, Azərbaycan bu beş rayonu alsın, bununla kifayətlənsin. Qalanlar da qalsın, yəni, hər şeyi siz almaq istəyirsiniz, belə şey olmur, kompromis olmalıdır və sair. Ancaq mən heç vaxt buna getməmişəm. Beş rayonu alıb qalan rayonları sonraya, qeyri-müəyyən vaxta saxlayıb, məsələni bitmiş hesab etmək heç cür düzgün olmazdı. Ona görə müxtəlif mərhələlərdə vasitəçilər və bəzi beynəlxalq təşkilatlar təəccüb edirdilər ki, nə üçün İlham Əliyev buna razılaşmır. Axı ona deyirik ki, indi beş rayon, halbuki, Ermənistan indi görünür o beş rayonu da vermək istəmirdi. Ancaq belə təkliflər olub. Amma mənim mövqeyim hər zaman belə olub ki, Şuşasız bizim işimiz yarımçıq olar”.
Bir daha aydın oldu ki, Prezident bütün danışıqlarda Azərbaycanın ərazi bütövlüyünün təmin olunmasını prinsipial olaraq ortaya qoyub. Hansısa ətraf rayonların qaytarılması müqabilində digər ərazilərin güzəştə gedilməsindən söhbət belə gedə bilməz.
“Hərb sahəsində qazandığımız uğurları diplomatlarımız daha da möhkəmləndirməlidirlər”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyevin sözlərinə görə, Ali Baş Komandan, Prezident İlham Əliyevin Şuşa şəhəri ilə bağlı açıqlaması Azərbaycan dövlətinin suverenliyinin təmin olunmasının vacibliyini əks etdirir: “Bununla bir daha aydın oldu ki, ərazi bütövlüyünün təmin edilməsi danışıqlarda başlıca şərtdir. Yarımçıq sülhə ölkə Prezidenti heç vaxt razı olmaz. Şuşa Azərbaycanın qədim mədəniyyət ocağıdır. İşğaldan azad olunan hər hər kənd, hər bir şəhər hər birimiz üçün doğmadır, əzizdir. Azərbaycan Ordusu ölkənin ərazi bütövlüyünün təmin olunmasını yüksək peşəkarlıqla həyata keçirir. Nəinki Şuşa, işğal altında olan bütün yaşayış məntəqələrimiz erməni terrorçularından təmizlənəcək. Üçrəngli bayrağımız Xankəndidə dalğalanacaq. Bu gün ordumuzun gücü dünyanın gözü önündədir. Uzun illərin doğma torpaq həsrəti sona çatır. Ölkəmizin ərazi bütövlüyü bərpa olunur. İşgalçı Ermənistan Azərbaycan dövlətinə sülh imkanları şansını buraxmadı. Eyni zamanda, 30 ildən artıq müddət keçməsinə baxmayaraq, ATƏT-in Minsk Qrupu heç bir əməli addım atmadı. Bu şərəfli missiyanı həyata keçirmək Azərbaycan Ordusunun üzərinə düşdü. İstənilən müharibənin sonu sülhlə başa çatır. Mənim Vətən müharibəsi ilə bağlı düşüncəm ondan ibarətdir ki, Azərbaycan Ordusu ərazilərimizdən axırıncı erməni terrorçularını tamamilə təmizlədikdən sonra sülhdən danışa bilərik. Bu yalnız Azərbaycanın suverenliyinin tam təmin olunmasından sonra baş tuta bilər. Hərb sahəsində qazandığımız uğurları diplomatlarımız daha da möhkəmləndirməlidirlər. Bu belə də olacaq. Bölgədə yeni siyasi düzən yaranır. Sözsüz ki, bu düzənin qalibi Azərbaycan olacaq”.
Sədr müavininin fikrincə, bayrağımız işğal edilmiş bütün torpaqlarda dalğalanacaq, Azərbaycanın ərazi bütövlüyü bərpa ediləcək.
Vidadi ORDAHALLI
