“Təəccüb edirəm ki, bu günə qədər Rusiyada bəzi siyasi dairələr Paşinyanın tərəfini tuturlar”. Bunu Prezident İlham Əliyev Türkiyənin “A Haber” televiziya kanalına müsahibəsində deyib.
Ölkə başçısının sözlərinə görə, Ermənistanda çevrilişin təşkil edilməsində Soros qruplarının böyük rolu oldu: “Paşinyan, əslində, hər zaman anti-Rusiya mövqeyində olub. Onun partiyasının adı ermənicə “Yolk”, onun da tərcüməsi “Çıxış” deməkdir. Haradan çıxış? Rusiya ilə birlikdə olduğu Kollektiv Təhlükəsizlik Müqaviləsi Təşkilatından və Avrasiya Birliyindən. O, millət vəkili kimi hər zaman Rusiyanın əleyhinə idi, anti-Rusiya mövqeyində idi. Ona görə mən təəccüb edirəm ki, bu günə qədər Rusiyada bəzi siyasi dairələr Paşinyanın tərəfini tuturlar. Axı bu, rusiyapərəst qüvvələrə qarşı inqilab etdi, rusiyapərəst sabiq prezidentləri, rusiyapərəst ana müxalifət partiyasının sədrini həbsə atdı! Hər şeyi Rusiyanın əleyhinə etdi. Rusiyanın “Qazprom”, dəmir yolu şirkətinə cinayət işi açdı. NATO tipli bir təşkilat olan Kollektiv Təhlükəsizlik Müqaviləsi Təşkilatının erməni əsilli rəhbərini həbsə atdı. Yəni bu, Sorosun sözü ilə oturub-duran bir adamdır. Bir də bunun komandasına baxın. Onların hamısı Soros Fondu, Açıq Cəmiyyət İnstitutu, “Amnesty International”… Hamısı bunlardır. Yəni Soros bu gün Ermənistanda hakimiyyətə gəldi, amma iflasa uğradı”.
Həqiqətən də Paşinyan hakimiyyətə gələndən sonra anti-Rusiya siyasəti aparır. O bunu müxtəlif formada həyata keçirir. Rus telekanallarının yayımı məhdudlaşdırıldı, rus məktəblərinin sayı azaldılır, ölkə mətbuatında Rusiyaya yönəlik tənqidlər artdı və s. Bütün bunların fonunda maraqlıdır, Rusiyada bəzi siyasi dairələr niyə Paşinyanın tərəfini tuturlar?
“Rusiyada müəyyən dairələr Ermənistanın zəifləməsini istəmirlər”
Məsələyə münasibət bildirən Böyük Azərbaycan Partiyasının sədri Elşad Musayevin sözlərinə görə, Rusiyada müəyyən dairələr Ermənistanın zəifləməsini istəmirlər: “Onların Paşinyanın tərəfini tutmaları əsasən bununla bağlıdır. Fikirləşirlər ki, Paşinyan haçansa hakimiyyətdən gedəcək, amma Ermənistan zəifləsə, sonra daha çətin olacaq. O üzdən, belə narahatdırlar. Ümumiyyətlə, illərlə Rusiyanın müəyyən dairələri Ermənistanı silahlandırıblar. 90-cı illərdə Ermənistana 1 milyard dollarlıq silah yardımı edildi. Sonrakı dövrlərdə də Ermənistanın pulsuz silahlandırılması davam edib. Prezident də dəfələrlə Ermənistanın silahlandırılmasına yönəlik tənqidi fikirlərini səsləndirib. İndiki dövrdə Rusiya rəsmi səviyyədə neytral mövqe sərgiləməyə çalışır. Ən azından, bu belə görünür. Ancaq Rusiyada müəyyən dairələr var ki, Ermənistanı gizli şəkildə silahlandırır, Paşinyana dəstək verirlər. Rusiya KİV-i Ermənistanın maraqlarına uyğun daha çox informasiya yayır. Bütün bunlar, təbii ki, bizi narahat edir. Biz müxalifət partiyası olaraq bir neçə dəfə narahatlığımızı bildirmişik. O cümlədən, ölkə başçısı bir neçə dəfə bu məsələyə toxunub. Ancaq Azərbaycanda müəyyən dairələr var ki, onlar daha çox susmağa üstünlük verirlər. Hesab edirəm ki, nə var o deyilməlidir və kiminsə qabağından qaçmaq lazım deyil. Bizim Rusiya ilə kifayət qədər yaxşı əlaqələrimiz var. Bu ölkə bizim qonşumuzdur və bizim rus xalqı ilə heç bir problemimiz yoxdur. Ancaq hansısa dairələr Paşinyanı dəstəkləyirlərsə, biz bunu açıq şəkildə deməliyik. Rusiyaya çağırış etməliyik ki, Paşinyanın hansısa formada himayə edilməsi Kremlin maraqlarına təhdiddir”.
Partiya sədri hesab edir ki, Azərbaycan diplomatik müstəvidə səylərini daha da artırmalıdır.
Vidadi ORDAHALLI
