Pərvanə Vəliyeva: “YUNİSEF də, digər beynəlxalq təşkilatlar da Ermənistanın Azərbaycanın mülki əhalisinə qarşı törətdiyi çoxsaylı terror cinayəti məsələsinə münasibətdə həmişə kənarda qalırlar”
Terrorçu Ermənistanın Azərbaycanın böyük şəhərlərini raket atəşinə tutması nəticəsində onlarla mülki vətəndaş həyatını itirib. Düşmənin hədəfi Azərbaycanın dinc sakinləri, xüsusən də uşaqlardır. Bilirik ki, sentyabın 27-nə qədər də, ondan sonrakı həftələrdə də terrorçu dövlətin ölkəmizə qarşı həyata keçirdiyi terror aktları zamanı bir neçə uşaq həyatını itirib, xeyli sayda uşaq isə ağır yaralanıb.
Düşmənin Gəncə şəhərini gecə saatlarında atəşə tutması nəticəsində uşaqlarımızın da həlak olduğu məlumdur. Təkcə Ermənistan silahlı qüvvələrinin oktyabrın 17-də Gəncə şəhərini raket atəşinə tutması nəticəsində ölənlərdən 3 nəfərinin azyaşlı olması, yaralananların da 5 nəfərinin uşaqlar olması deyilənlərin əyani sübutudur.
Gəncədə ikinci Xocalı genosidi törətmək üçün terror aktlarını davam etdirən düşmən dövlətin həyata keçirdiyi məlum qətliamlara hələ də beynəlxalq təşkilatlar tərəfindən lazım olan reaksiya verilməyib.
Qeyd edək ki, oktyabrın 17-də Gəncədə Ermənistanın həyata keçirdiyi terror nəticəsində həyatını itirən və ağır yalanan uşaqlarla bağlı beynəlxalq uşaq təşkilatı olan YUNİSEF hələ də susur. Yeri gəlmişkən, hadisə yerində olan Ombudsman Səbinə Əliyeva da mətbuata açıqlamasında YUNİSEF-in bu acı olaya münasibət bildirmədiyini, bundan təəssüfləndiyini qeyd edib.
Bu o YUNİSEF-dir ki, peyvənd satmaq istəyəndə Azərbaycana üz tutur və öz peyvəndini aldırmamış əl çəkmir. Bu o YUNİSEF-dir ki, özünü həmişə dünyada uşaq hüquq və azadlıqlarının müdafiəçisi kimi təqdim edir. Amma biz YUNİSEF-in Azərbaycan uşaqlarına yönələn, Ermənistanın terrorçu hərəkətləri ilə bağlı bir açıqlamasını, bir münasibətini belə görə bilmədik.
YUNİSEF niyə susur, niyə indiyə qədər bu acı olaya münaibət bildirmir, nə üçün terrorçu Ermənistanı uşaq qatili kimi ittiham etmir.
“Biz də YUNİSEF-in bu davranışını sağlamlıq sahəsində fəaliyyət göstərən bir qeyri-hökumət təşkilatı olaraq qınayırıq”
“Sağlamlığa Xidmət” İctimai Birliyinin icraçı direktoru Pərvanə Vəliyeva “Bakı-Xəbər”ə bildirdi ki, indiyə qədər bu qurumun susma mövqeyində dayanması təəssüf doğurur: “YUNİSEF hələ də bu məsələ ilə bağlı ölkəmizlə əlaqə saxlamayıb. Səbinə xanım da bunu qeyd edib. YUNİSEF BMT-nin bir qurumudur. Azərbaycan öz torpaqlarını işğaldan azad etmək uğrunda döyüşlərə başladığı ilk gündən bəri BMT tərəfsiz olmağa çalışır, hər iki tərəfi sülhə çağırır. Bu səbəbdən də tərəfsiz bəyanatlar səsləndirir. Yalnız BMT deyil, onun bütün qurumları bu məsələdə tərəfsiz olduqlarını göstərməyə çalışırlar. İstər YUNİSEF, istərsə də Ümumdünya Səhiyyə Təşkilatı olsun. YUNİSEF 17 oktyabr tarixində Gəncə terrorunun baş verdiyi gecənin səhərisi Cenevrədən bəyanat səsləndirib, öz saytında bəyanat nəşr edib, amma bu bəyanatın heç bir cümləsində Gəncə adı çəkilmir, Gəncədə baş verən terror hadisəsi qeyd edilmir, Ermənistanın mülki əhaliyə qarşı hansı silahlardan istifadə etməsi barədə bir söz belə yoxdur. Sadəcə, qeyd olunur ki, hər iki tərəfdə uşaqlar, qadınlar, yaşlılar həyatını itirir. “Uşaqların gələcəyini düşünürlər” kimi çox tərəfsiz bir bəyanat veriblər. Həmin günə təsadüf edən bu cür bəyanatla yanaşı, BMT, o cümlədən də ABŞ səfirliyi bəyanat yayıb ki, Gəncədə və Xankəndidə sivillərin öldürülməsini, mülki əhalinin hədəfə alınmasını dayandırın. Halbuki, Ermənistan tərəfindən heç bir uşaq həlak olmayıb, heç bir uşaq yaralanmayıb, hər hansı bir uşaq ya bir, ya da hər iki valideynini itirməyib. Azərbaycan erməni uşaqlarına qarşı Ermənistanın bizim uşaqlara qarşı etdiklərini heç zaman etməyib. Azərbaycan dövləti həmişə öz humanistliyini, mərhəmət hissini qoruyub saxlayıb, bizim ordu döyüş meydanında, cəbhədə hərbçilərlə mübarizə aparır, heç zaman sivilləri hədəfə almayıb”.
YUNİSEF-in Azərbaycana peyvənd satmaq üçün etdiyi müraciətləri də şərh edən P.Vəliyeva qeyd etdi ki, yalnız bu təşkilat deyil, həmçinin də uşaq üzrə digər təşkilatlar da bu istiqamətdə ölkəmizə müraciətlər ediblər. “Burada bütün təşkilatlar biznes maraqları naminə çıxış edir, Azərbaycanla əlaqələri möhkəmləndirirlər. İstər Avropa İttifaqı olsun, istərsə də digər qurumlar olsun, onlar ölkəmizin iqtisadiyyatından yararlanmaq üçün bizə yaxınlaşırlar. Hamısının niyyəti biznes qurmaq, Azərbaycan ərazisindən gəlir götürməkdir. Amma YUNİSEF də, digər beynəlxalq təşkilatlar da Ermənistanın Azərbaycanın mülki əhalisinə qarşı törətdiyi çoxsaylı terror cinayəti məsələsinə münasibətdə həmişə kənarda qalır. Ombudsman YUNİSEF-in münasibətini çox düzgün qeyd edib, yaxşı ki, bu məsələ ətraflı araşdırılıb. Edvard Karvardin Azərbaycandakı nümayəndəsidir. Mən bu barədə status yazıb onu tağ etdikdən sonra bir saat ərzində E.Karvardin bir status yazaraq YUNİSEF-in 17 oktyabr bəyanatını öz səhifəsində paylaşdı. Halbuki, YUNİSEF-in Azərbaycan nümayəndəliyi Ermənistanın terroruna məruz qalan, valideynlərini itirən Azərbaycan uşaqlarına psixoloji dəstək göstərməli idi. Bu məsələ ilə çoxdan ətraflı maraqlanmalı idilər. Oktyabrın 10-da Gəncədə baş verən dəhşətli terror nəticəsində valideynlərini itirən uşaqlar da var. Bunun üzərindən 7-8 gün vaxt keçməsinə baxmayaraq, hələ də YUNİSEF tərəfindən əlaqə yaradılmayıb və hətta bir nəfər də olsa nümayəndələrini belə Gəncəyə göndərməyiblər. Biz də YUNİSEF-in bu davranışını sağlamlıq sahəsində fəaliyyət göstərən bir qeyri-hökumət təşkilatı olaraq qınayırıq” - deyə P.Vəliyeva qeyd etdi.
İradə SARIYEVA
