Hər zaman xristian həmrəyliyindən geninə-boluna sui-istifadə edən ermənilər hər dəqiqə yeni-yeni saxtakarlıqlar ortaya atırlar. Son zamanlar ermənilər sosial şəbəkələrdə, internet resurslarında, bəzi Rusiya telekanallarında yeni iddialar səsləndirməyə başlayıblar.
İşğalçı dövlətin vətəndaşları Dağlıq Qarabağda Azərbaycan Ordusunun həyata keçirdiyi əks-hücum, antiterror əməliyyatlarını “xristian-müsəlman” qarşıdurması kimi qələmə verirlər. Ermənilər saxtakarcasına iddia edirlər ki, guya Qarabağda müsəlmanlar “haqsız yerə” “xristianları qırırlar” Ermənistan da “xristianlığın müdafiəsi uğrunda” təkbaşına mübarizə aparır. Ermənilər özlərini hazırda bütün dünyada xristianlığın yeganə “müdafiəçisi” kimi təqdim edirlər ki, guya xristianlığın təəssübünü çəkən, onu məhv olmaq təhlükəsindən ermənilər “müdafiə edirlər”.
“...Dağlıq Qarabağda baş verən prosesləri “müsəlman-erməni qarşıdurması” kimi qələmə verməyə cəhd edir”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq bölməsinin rəhbəri, professor Qasım Hacıyev “Bakı-Xəbər”ə bildirdi ki, ermənilər özləri tarixən heç zaman xristianlığın möhkəmlənməsinə xidmət etməyiblər, əksinə, xristianlığın parçalanmasında “böyük rol” oynayıblar. Q.Hacıyevin sözlərinə görə, ermənilər həmişə qriqoryanlığın təəssübünü çəkiblər, qriqoryanlıq da qondarma bir təriqətdir. Ermənilərin xristianlığı heç zaman bəyənmədiyini, dəstəkləmədiyini deyən Q.Hacıyevin fikrincə, ermənilər əsl xristian olsaydılar, ya pravoslav, ya da katolik olardılar, onlar katolikliyi və pravoslavlığı inkar edərək, qondarma qriqoryanlığı yaradıb qəbul ediblər. “Erməniləri öyrənmək istəyən hər bir adam bu zaman açıq şəkildə onların dünyada olan bütün saxtakarlıqları, hiyləgərlik üsullarını, hiylə metodlarını bir-bir sınaqdan keçirdiklərini görər. Həqiqətən də, yeri gələndə, ermənilər özlərini yazıq, aciz, mağmun kimi göstərir, yeri gələndə cəllada dönürlər. Mənim bir fikrim var ki, özünü mağmun, bacarıqsız, yazıq aparan insanlar şərait düşən kimi daha çox cəllad olurlar. Ermənilərin hamısını belə görürəm, tanınmış adamları da belədir. Yaltaqlığın, göz yaşının hesabına müxtəlif dövlətlərin ərazilərində yerləşiblər, özlərini bərkidən kimi cəllada dönüblər. Ermənilərin apardıqları hiyləgər siyasətdən biri də xristianlıqla bağlıdır. Ən çox xristian amilindən istifadə edənlər qriqoryanlığın yaranma tarixini bilməyən ermənilərdir. Halbuki, ermənilər özlərini xristian hesab etsələr də, xristian mədəniyyətinə şərik olsalar da, xristianlığa dair yazılar yazsalar da, bunun hamısının mahiyyətində erməni şovinizmi, separatizmi dayanıb. Xristianlıq dini katolikliyə və pravoslavlığa bölünənə qədər də, ondan sonra da ermənilər bu dinin inkişafında heç bir rol oynamayıblar. Ermənilər həqiqətən də normal xristian olsaydılar, ya katolik, ya da pravoslav olardılar. Ermənilər xristianlığın hər iki qolundan ayrılaraq özləri üçün xristianlığın yeni bir “formasını” yaradıblar ki, bu da qriqoryanlıqdır. Qriqoris ayrıca bir təriqət yaradıb və bunları ətrafına yığıb, guya ki, ermənilər “peyğəmbər nəslinin” davamçılarıdır. Onlar bu adın altında əsrlərdir təxribatla, şovinizmlə məşğul olublar. Ermənilər təsadüfən pravoslav və katolik kilsələrinə gedəndə də orada təxribatçı hərəkətlərə yol verirlər.
O ki, qaldı indi ermənilərin özlərini dünyada “xristian dininin yeganə müdafiəçisi” kimi qələmə verməyə başlamasına, burada məqsəd, əslində, başqadır, xristian dünyasını qıcıqlandırmaqdır. Bu gün ermənilər özlərini məzlum şəkilə salaraq, “biz dünyada xristianlığın yeganə müdafiəçisiyik” deməklə xristian dövlətlərindən Azərbaycanın haqq işinə qarşı istifadə etmək istəyirlər. Azərbaycan Ordusunun həyata keçirdiyi əks-hücum əməliyyatları nəticəsində çıxılmaz vəziyyətə düşən Ermənistan xristian amilindən sui-istifadə edərək, Dağlıq Qarabağda baş verən prosesləri “müsəlman-erməni qarşıdurması” kimi qələmə verməyə cəhd edir. Guya ki, ermənilər burada təkləniblər və təkbaşına xristianlığı “qoruyurlar”, “müdafiə edirlər”. Ermənilər kimdir ki, xristianlığın müdafiəçisi olalar. Ermənilər heç zaman xristianlığın müdafiəçisi olmayıblar, bu gün isə özlərini “məzlum xristian” donunda göstərməklə dünya xristianlarının diqqətini cəlb etmək istəyirlər”.
Q.Hacıyev qeyd etdi ki, Azərbaycan Ordusu bizim öz torpaqlarımızda, ərazilərimizdə əks-hücum əməliyyatları aparır və bizim yolumuz haqq yoludur. Azərbaycanda nə indi, nə də tarixin heç bir dönəmində xristianlığa, xristianlara qarşı heç zaman pis münasibət olmayıb, əksinə, onlara burada hər cür şərait yaradılıb. Azərbaycanda yaşayan xristian inanclı insanların da Azərbaycan Ordusuna böyük dəstək verdiyini deyən Q.Hacıyev hesab edir ki, ermənilərin bu iddiası da dünyanın diqqətini cəlb edə bilməyəcək: “Bu gün Azərbaycanda xristian dininə mənsub olan insanlara müsbət münasibət var, onların kilsələri, ibadət yerləri fəaliyyət göstərir, onlar dinc, azad şəkildə dini ayinlərini icra edir, ibadətləri ilə məşğul olurlar. Nə Azərbaycan, nə də dünya xristianlarının ermənilərin xristianlığı müdafiə etməsinə ehtiyacı yoxdur. Bunu ermənilər bilməlidirlər. Dağlıq Qarabağda gedən müharibə isə xristan-müsəlman müharibəsi deyil, bunu bütün dünya bilir, bilməyənlər də bilsin. Azərbaycan Ordusu torpaqlarımızı işğaldan azad edir, işğalçı ölkənin silahlı birləşmələrini, terrorçu qruplarını ərazilərimizdən çıxarır. Cənab Prezident də dəfələrlə deyib ki, bizim dinc erməni sakinləri ilə işimiz yoxdur, onlar bizim vətəndaşlarımızdır. Bildiyimiz kimi, bizim dinc erməni xalqı ilə işimiz yoxdur, məqsədimiz işğalçı ordunu ərazilərimizdən çıxarmaqdır” - deyə Q.Hacıyev vurğuladı.
İradə SARIYEVA
