İşğal olunmuş torpaqlarımızın azad edilməsi uğrunda Azərbaycan Ordusunun apardığı gərgin döyüşlər davam edir. Azərbaycan Müdafiə Nazirliyinin yaydığı rəsmi məlumata görə, sentyabrın 27-dən 1 oktyabr səhər saatlarınadək düşmənin 2300 nəfərədək canlı qüvvəsi məhv edilib və yaralanıb, 130-dək tank və digər zirehli texnikası, 200-dən artıq artilleriya, yaylım atəşli raket sistemləri, minaatan, 25-dək hava hücumundan müdafiə vasitələri, 6 komanda-idarəetmə və komanda-müşahidə məntəqəsi, 5 silah-sursat anbarı, 50-dək tankəleyhinə vasitələr, 55 ədəd avtomobil texnikası məhv edilib və sıradan çıxarılıb.
Dünən gedən döyüşlər ərzində Xocalı rayonunun Şuşakənd ərazisində düşmənin 1 S-300 zenit-raket qurğusu sıradan çıxarılıb.
İtirilmiş mövqeləri geri qaytarmaq üçün əlavə qüvvələr cəmləşdirən düşmən hücuma cəhd göstərib. Düşmənin bu fəaliyyətinin qarşısı alınır və onun müqavimətinin qırılması məqsədilə qoşunlarımız tərəfindən əks-həmlə əməliyyatı keçirilir. Hazırda bütün cəbhə boyu hərbi əməliyyatlar davam edir. Ermənistan Müdafiə nazirliyi itkilərinin sayını açıqlayan bir neçə məlumat təqdim edib. Ancaq həmin məlumatlarda canlı qüvvə itkisi ilə bağlı xəbərlərin dəfələrlə az göstərildiyinin şahidi oluruq. Paşinyanın 2300 erməni əsgərinin Qarabağda öldürülməsi faktını öz xalqından gizlətməsi nə ilə bağlıdır?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, ermənilərin döyüş itkilərini gizlətməsinin bir neçə səbəbi var: “Onlar bizimlə həm də informasiya müharibəsi aparır. Bu səbəbdən də öz itkilərini gizlədib, itkilər barədə həqiqətə uyğun olmayan rəqəmlər səsləndirirlər. Ancaq Azərbaycan Müdafiə Nazirliyinin rəsmən ictimailəşdirdiyi videolardan görünür ki, düşmən tərəf çox ciddi itkilər verir. Bu rəqəm o qədər böyükdür ki, Paşinyan onların xalqa açıqlanmasından qorxur. Bilir ki, ciddi etirazla qarşılanacaq. Bunun da nəticəsində, onsuz da ona münasibətdə çox sərt mövqedə olan cəmiyyətin kütləvi etiraza qalxa biləcəyini təxmin edir. Ermənistanın öz itkilərini gizlədə bilməsinin başqa bir səbəbi də var. Əldə olunan kəşfiyyat məlumatına əsasən, düşmənin itkiləri arasında Suriya və Yaxın Şərqin müxtəlif ölkələrindən olan çoxlu sayda erməni əsilli muzdlu döyüşçü də var. Lakin onlar Ermənistanda rəsmi qeydiyyata alınmadığı üçün düşmən bu itkiləri asanlıqla gizlədə bilir. Biz bilməliyik ki, Ermənistan Müdafiə nazirliyinin rəsmilərinin Azərbaycan Ordusundakı itkilərin sayı ilə bağlı yaydığı məlumatların heç bir əsası yoxdur və reallığı əks etdirmir. Bu, Azərbaycan Ordusunun uğurları qarşısında erməni əhalisi arasında hökm sürən təşviş və ordularında yaranmış xaosu bir qədər azaltmaq məqsədi güdür. Biz də başa düşürük ki, müharibədə itki ola bilər. Ancaq ordumuzun apardığı əməliyyatlar müasir silahlarla, yüksək peşəkarlıqla həyata keçirildiyi üçün düşmən fatnastik sayda itkilər verir. Yaxşı olardı ki, Paşinyan bütün bunlardan nəticə çıxarıb, işğaldan əl çəksin. Azərbaycan tərəfi hər zaman sülh danışıqlarına sadiq olub. Bizim bir tələbimiz var. Ermənistan işğal edilmiş ərazilərdən geri çəkilsin. Belə olacağı təqdirdə sülh də yarana bilər. Əks halda Ermənistanın döyüş itkiləri daha da artacaq. Çünki Azərbaycan əsgəri qarşısına bir məqsəd qoyub - nəyin bahasına olursa olsun, ərazilərimizi düşməndən təmizləmək. Biz bu istəyin həyata keçdiyinin ilkin əlamətlərini görürük. Ordumuzun qazandığı zəfərlər bunu deməyə əsas verir”.
Ermənistanın apardığı informasiya siyasəti çox primitivdir. Müasir texnologiyaların vasitəsilə tez bir zamanda ifşa edilir. Döyüş itkiləri ilə bağlı verdikləri yalan məlumatları da bu qəbildən saymaq olar.
Məhəmmədəli QƏRİBLİ
