Ermənilərin Ağdam rayonunun işğal altında qalan Şahbulaq ərazisindəki qanunsuz arxeoloji qazıntılarla bağlı həyasızlığı səngimək bilmir.
Erməni mediasının yaydığı məlumata görə, Qarabağdakı separatçı rejimin “təhsil, elm və mədəniyyət naziri” Lusine Qaraxanyan Xankəndidə keçirdiyi mətbuat konfransında deyib ki, guya “Tiqranakert”dəki qazıntılar beynəlxalq standartlara uyğun olaraq aparılır. O, koronavirus pandemiyasının yayılmasının “arxeoloji qazıntılar”a mane ola bilmədiyini qeyd edib.
Söhbət Azərbaycanın Ağdam rayonunun 28 ildir işğal altında qalan Şahbulaq ərazisindən – Qarabağ xanı Pənahəli xanın tikdirdiyi qalanın ətrafındakı “Tiqranakert” adlandırılmış ərazidən gedir. İşğalçılar bu ərazidə guya “qədim erməni çarlığının paytaxtı”nın dağıntılarını tapdıqlarını iddia edirlər. L.Qaraxanyan həyasızcasına onu da qeyd edib ki, Şahbulaqda hər il aparılan qazıntıların nəticələri guya beynəlxalq jurnal və konfranslarda təqdim olunur: “Tiqranakert”in “şəxsiyyəti”nin erməni olduğuna şübhə yoxdur. “Tiqranakert”in “pasportu”nun müzakirəyə ehtiyacı yoxdur. Biz “Tiqranakerti” açıq hava altında muzeyə çevirəcəyik. Və qonşularımız nə qədər qəzəblənsələr də, bütün dünyanın diqqətini “Tiqranakert”ə yönəldəcəyik. “Tiqranakert” Azərbaycanın Qarabağa aid bütün siyasi iddialarını zərərsizləşdirir. Biz burada erkən xristianlıq, qədim dövrləri hiss edirik”.
Göründüyü kimi, erməni yalanları və həyasızlığı heç bir əndazəyə sığmır. Bu o həddə gəlib çatıb ki, saxta tarix uyduraraq azğıncasına meydan oxuyurlar.
“Ermənistanın dövlətçilik ənənəsi ilə bağlı heç bir tarixi sübut yoxdur”
Məsələyə münasibət bildirən Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyevin sözlərinə görə, ermənilərin saxtakarlığı o dərəcədə geniş miqyas alıb ki, bunu sözlə ifadə etmək çətindir: “L.Qaraxanyan sadəcə sərsəmləyir. Çünki o, ümumiyyətlə, orta məktəb həcmində tarixi bilmir. O, tutuquşu kimi, başqalarının dediyini təkrar edir. Əvvəla Tiqranın erməni olduğunu ermənilərin ən böyük tarixçiləri belə sübut edə bilməyiblər. İndiyə qədər bunu bacarmayıblarsa, bundan sonra da edə bilməyəcəklər. Sövet dönəmində Rusiyanın himayədarlığından istifadə edərək ermənilər müəyyən yazılar yazıblar. Birincisi, İkinci Tiqranı “erməni çarı” kimi təqdim ediblər. Ancaq ümumdünya tarixi bilir ki, Tiqran erməni deyil, o, parfiyalıdır. Tiqran haqqında olan əfsanələri şişirdiblər. Məqsəd saxta tarix yazıb, dünya ictimaiyyətini aldatmaqdır. Ermənilər Tiqranla bağlı saxta araşdırmalar apararkən nəinki Qarabağın, hətta Qara dəniz sahilində yerləşən Soçi və digər şəhərlərin onlara məxsus olduğunu iddia edirlər. Bunlar o dərəcədə cəfəng fikirlərlə çıxış edirlər ki, tanış olan kimi görürsən saxtadır. Bunlar anlamaq istəmirlər ki, arxeoloji qazıntı ilə milli mənsubiyyət və etnik tərkibi müəyyənləşdirmək olmur. Hansısa yerdə abidələr tapılırsa, bu, həmin dövlətin qədim mədəniyyətini göstərir. Nəinki Qarabağ, hətta indiki Ermənistanın özü də qədim Azərbaycan torpaqları olub. Oradan hansı abidə, qədim əşya çıxsa, onların hamısı Azərbaycan xalqına məxsusdur. Ermənistanın dövlətçilik ənənəsi ilə bağlı heç bir tarixi sübut yoxdur”.
Professor onu da qeyd etdi ki, ermənilər davamlı olaraq belə yalanlar uydurmaqla, dünya ictimaiyyətini aldatmaq istəyirlər.
Vidadi ORDAHALLI
