Ermənistan Livandan Azərbaycanın işğal olunmuş ərazilərinə erməni ailələrini deyil, yaxşı təlim keçmiş erməni silahlılarını köçürür. Bunu ərəb araşdırmaçı-jurnalist, Cənubi Qafqaz üzrə ekspert Əbdül-Həmid Qutub deyib.
Onun sözlərinə görə, Livan erməniləri 1970-1980-ci illər vətəndaş müharibəsi zamanı müsəlman ərəblərə, eləcə də digər azlıqlara qarşı mübarizədə vacib rol oynayıblar. O qeyd edib ki, təxminən bütün Livan erməniləri hərb işini yaxşı öyrənib və sirr deyil ki, Azərbaycanın işğal olunmuş ərazilərinə köçürülmüş “ailələr” arasında dəstələr yaratmaq, şəhər və dağ landşaftı şəraitində döyüş əməliyyatları keçirmək bacarıqlarına malik təcrübəli erməni silahlılarının sayı az deyil. Ekspertin sözlərinə görə, bu barədə az adam yazsa da, Azərbaycanın işğal olunmuş ərazilərinə ermənilər təkcə Livan və Suriyadan köçürülmür: “Vaxtilə Misir ermənilərinin də Ermənistanda və Azərbaycanın işğal olunmuş ərazilərində hərbi hazırlıq keçməsi barədə sənədli faktlar mövcuddur”.
Ə.H.Qutub bildirib ki, bu faktı yerli nəşrlərin birində jurnalist işləyən Misir ermənisi Üsamə Eidanın çəkdiyi sənədli videokadrlar təsdiq edir. Bu kadrlarda Misir ermənilərinin Ermənistanda və Azərbaycanın işğal olunmuş ərazilərində hərbi düşərgələrdə təlim keçdiyi görünür.
O, həmçinin, qeyd edib ki, Ermənistan Livan ermənilərinin ailələrini Azərbaycanın işğal olunmuş ərazilərinə Ermənistanla “xristian həmrəyliyi” göstərən Livan hökumətinin dəstəyilə köçürür: “Bütün bunlar regionun demoqrafik tərkibinin dəyişdirilməsinə yönəlib”.
Bütün bunlar bir daha sübut edir ki, Ermənistan Qarabağda işğalçılıq fəaliyyətini gücləndirmək üçün Livandan erməni əsilli dinc sakinləri yox, məhz erməni kökənli terrorçuları orada yerləşdirir. Nəzərə almaq lazımdır ki, işğal olunmuş ərazilərdə möhkəmlənmək üçün canlı qüvvə baxımından Ermənistanın resursları məhduddur. O üzdən, Livandan döyüş qabiliyyəti olan təcrübəli erməni əsilli silahlılar Qarabağa köçürülür.
Məsələyə münasibət bildirən hərbi ekspert Ramil Məmmədlinin sözlərinə görə, ərəb jurnalistin ermənilərlə bağlı qabartdığı məqam çox önəmli məsələdir: “Əvvəla, Birinci Qarabağ müharibəsi zamanı məhz Livandan, Suriyadan olan ermənilər qrup şəklində Qarabağ ərazisinə gələrək hərbi əməliyyatlara qoşulublar. Bunların da başında duran məşhur terrorçu Monte Melkonyan idi. Sözügedən proses yenidən başlayıb. Ümumiyyətlə, Livanda vətəndaş müharibəsi və ondan sonra gedən proseslərdə iştirak edən, döyüş təcrübəsi olan erməni silahlıları Qarabağa köçürülür. Bütün bunlar təsadüfi deyil. Məsələ ondadır ki, Ermənistan öz canlı qüvvəsinin potensialına bələd olduğu üçün, bu cür mənfur addım atır. Çünki erməni ordusunda ciddi əsgər çatışmazlığı problemi var. Bu səbəbdən Livan və Suriyada baş verən gərginlikdən istifadə edərək, oradakı erməni silahlılarını kompakt şəkildə Qarabağa köçürürlər. Bununla İrəvan həm Qarabağda əhalinin sayını süni şəkildə artırır, həm də işğal faktorunu gücləndirmək istəyir. Yəni bununla döyüşə biləcək ermənilərin sayını artırır. Ermənistanın əsas məqsədi budur. Sözügedən faktın ərəb jurnalisti tərəfindən qabardılması çox önəmli məsələdir. O baxımdan ki, bununla Ermənistanın xəbis məqsədləri üzə çıxır. Bunu biz deyəndə bəziləri qəbul etmək istəmirlər. O zaman ərəb jurnalistin ortaya qoyduğu arqumentə nə deyirlər? Onu da qeyd edim ki, Azərbaycan Ordusu 90-cı illərin ordusu deyil. Peşəkarlıq, döyüş qabiliyyəti, silah təchizatı və digər parametrlər üzrə Azərbaycan Ordusu üstün mövqedədir. Bu kimi təhdidlər heç bir halda hərbi əməliyyatlar zamanı ordumuzun qarşısını ala bilməyəcək”.
Hərbi ekspert onu da qeyd etdi ki, Qarabağ sözügedən erməni silahlılarına məzar olacaq.
Vidadi ORDAHALLI
