İyul hadisələrinin mahiyyətini daxili və beynəlxalq ictimaiyyətdən gizlətmək üçün Paşinyanın növbəti cəhdi - deputatlarla birgə...
Ermənistanın Baş naziri Nikol Paşinyan parlamentin 16 sentyabr iclasında deputatların suallarını cavablandırarkən bir sıra məqamlardan danışıb. O bildirib ki, güya Tovuzdakı iyul təxribatını Ermənistan yox, Azərbaycan törədib.
Paşinyan, hətta bir az da lovğalanaraq, Ermənistanla güc dilində danışmağın mənasız olduğunu bildirib və deyib ki, istər iyul hadisələrindən əvvəl, istərsə də sonra Azərbaycan müharibə çağırışları edib. Ancaq dönə-dönə vurğulayıb ki, problemin həlli sülh yolundan keçir. Hətta növbəti danışıqların olacağına da işarə edib. Bildirib ki, Ermənistan və Azərbaycan xarici işlər nazirləri arasında görüşün təşkili ilə bağlı müzakirələr aparılır, lakin bu məsələ ilə bağlı hələlik konkret qərar verilməyib. Eyni zamanda, ATƏT-in Minsk Qrupu həmsədrlərinin əvvəllər heç bir şərt olmadan danışıqlara başlamağı təklif edən bəyanatını konstruktiv adlandırıb: ”Beləliklə, 14 sentyabrda vasitəçilər Ermənistan və Azərbaycan xarici işlər nazirləri ilə telefon danışıqları aparıblar və yaxın gələcəkdə görüş keçirmək barədə razılığa gəliblər”.
Baş nazir erməni tərəfinin heç bir şərt qoymadığını deyib: “Azərbaycan da bununla məşğuldur. Bildirir ki, Dağlıq Qarabağ müstəsna olaraq Azərbaycanın bir hissəsi olmalıdır. Danışıqlar prosesində bəzi prinsiplərimiz olduğunu söylədik, eyni zamanda bu prinsipləri ilkin şərt hesab etmirik”.
Göründüyü kimi, Paşinyan istər iyul hadisələrinin, istərsə də ondan sonra baş verən proseslərin əsl mahiyyətini beynəlxalq ictimaiyyətdən gizlətmək üçün növbəti cəhdini edib. Paşinyan bu ritorikası ilə hansı məqsədi güdə bilər?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, Ermənistan rəhbərliyi əslində yenə öz ənənəvi mövqelərini ortaya qoyur: “Onlar özlərini dünyanın gözündə sülhpərvər kimi qələmə verməyə çalışır. İndiyə qədər də Ermənistan özünü sülh istəyən tərəf kimi təqdim edib. Hər zaman deyirlər ki, güya Minsk Qrupu çərçivəsində danışıqların aparılmasının tərəfdarıdırlar və bunu Azərbaycan istəmir. Əslində məsələnin mahiyyəti tam başqadır. Bizim torpaqlarımız işğal altındadır və bunu Ermənistan geri qaytarmaq istəmir. Nümayişkaranə şəkildə bundan yayınırlar. Gah ora yol çəkirlər, gah asma körpü tikirlər, Ağdamda saldıqları üzum bağlarını nümayiş etdirirlər. Bununla açıq mesaj verirlər ki, həmin torpaqlar onlarındı və geri qaytarmaq istəmirlər. Artıq onlar da hiss edirlər ki, Azərbaycanın hərbi yoldan başqa variantı qalmayıb. Hər vəchlə çalışırlar ki, bu variantdan qaçsınlar. Çünki bilirlər ki, Azərbaycan hərbi əməliyyatlara başlayacağı təqdirdə sona qədər, qələbə çalana kimi gedəcək. Bu da Ermənistanın sonu olacaq. Məhz bu amilləri nəzərə aldıqları üçüb bizi müharibə tərəfdarı kimi beynəlxalq ictimaiyyətin gözündə şərləməyə çalışırlar. Reallıq isə budur ki, Ermənistan işğalçı siyasətindən əl çəkmədiyi üçün bizə müharibədən başqa yol qoymayıb. Azərbaycan müharibəyə istəyindən yox, məcbur qaldığından gedə bilər. Onlar bu yolla dünya biriliyini məcbur etməyə çalışırlar ki, Azərbaycanı hərbi yoldan çəkindirsinlər. Artıq Azərbaycanın mövqeyi konkretləşib. Bu müddət ərzində dünya birliyinə qulaq asıb ortada heç bir nəticə görməyəndən sonra biz öz seçimimizi edə bilərik”.
Akif Nağının sözlərinə görə, son vaxtlar hərbi ritorikadan daha çox ermənilər istifadə edir: “Hətta Gəncəyə zərbələr endirəcəkləri ilə də bizi hədələyiblər. Həm hədə gəlirlər, həm də müharibədən qorxurlar. Bu sübut edir ki, Ermənistanda idarəetmə tam itib. Qarşıda onları böyük təhlükələr gözlədiyi üçün belə manevrlər etməyə, daha doğrusu, yalanlar danışmağa məcburdurlar”.
Bu cür gedişlər Ermənistanı məsuliyyətdən azad edə bilməz. Onun iki yolu var - ya işğaldan əl çəkməli, ya da bütün variantlara hazır olmalıdır.
Məhəmmədəli QƏRİBLİ
