Ermənistan işğal altında saxladığı Azərbaycan torpaqlarını süni surətdə Suriya və Livan erməniləri ilə doldurmaqda davam edir. Bu gün yüzlərlə terrorçu qrupun üzvü olan ermənilər və onların ailələri Ermənistan rəhbərliyi tərəfindən işğal altında olan Dağlıq Qarabağa və ətraf rayonlara köçürülüb, proses günü-gündən də genişlənir.
Məlum olduğu kimi, Ermənistan hökuməti, həmçinin, PKK və digər terror təşkilatları ilə açıq əməkdaşlıq hərəkətləri sərgiləyir. Son zamanlar Livan ermənilərinin işğal altındakı Azərbaycan torpağı olan Dağlıq Qarabağa köçürülməsindən sonra Ermənistanın bu dəfə PKK kürd terror təşkilatının “xüsusi tapşırıqlar yerinə yetirən dəstə”lərini Dağlıq Qarabağda yerləşdirmək qərarına gəldiyi bildirilir. Türkiyənin “Cümhuriyyət” nəşrinin yazdığına görə, Ermənistan Baş naziri Nikol Paşinyan işğal altındakı Azərbaycan ərazilərində demoqrafik landşaftı dəyişmək siyasətini davam etdirməklə yanaşı, Dağlıq Qarabağdakı işğalın mövcudluğunun əsası olan hərbi tərkibi də gücləndirir. Regional təhlükəsizlik sahəsindəki etibarlı mənbəsinə istinad edən qəzet Ermənistan tərəfindən PKK terror təşkilatının “xüsusi tapşırıqlar yerinə yetirən dəstə”lərinin “yeni hücum dalğası”na hazırlaşmaq üçün Dağlıq Qarabağa yerləşdirildiyini yazıb. Müəllif bildirir ki, bundan əlavə, Ermənistandan 250-yə yaxın əsgər Suriyaya - yəni PKK-nın Suriya qanadı olan PYD/YPG-nin sıralarına qoşulmaq üçün göndərilib.
Daha sonra qeyd olunur ki, İranın Azərbaycandakı keçmiş səfiri Əfşar Süleymaninin sözlərinə görə, Livan ermənilərinin Dağlıq Qarabağa yerləşdirilməsi aysberqin görünüən hissəsidir. Belə ki, son iki ayda işğal altındakı ərazilərimizə İraq və Suriyadan PKK terrorçuları gətirilib.
Türkiyə nəşri Ermənistan hərbçiləri ilə PKK arasında əməkdaşlığın Fransanın vasitəçiliyilə qurulduğunu yazır.
Siyasi şərhçilər qeyd edirlər ki, PKK ilə ermənilər arasında əməkdaşlığın kökü daha əvvəlki illərə dayanır və zaman-zaman mətbuatda Ermənistanla PKK arasında gizli anlaşmanın mövcud olması haqqında faktlar yayılıb. Vurğulanır ki, bu anlaşmaya görə, Ermənistan PKK-ya hər ay müəyyən sayda viza verir. Terrorçular ayrılan viza sayına görə pasportlarını Ermənistanın Parisdəki səfirliyinə göndərir və oradan istədikləri ölkəyə gedirlər. Hətta Ermənistanın PKK-ya kvota ayırdığı və hər ay 50 PKK-çıya viza verdiyi haqda məlumatlar hesabatlarda yer alıb. Bu məsələdə mərkəz rolunu Ermənistanın Parisdəki səfirliyi oynayıb.
“...terror təşkilatları ilə əlaqədə olması, PKK ilə hərbi əməkdaşlıq etməsi...”
Millət vəkili Aydın Mirzəzadə Ermənistanla PKK arasındakı hərbi əməkdaşlığı “Bakı-Xəbər”ə şərh edərkən bildirdi ki, terrorçu təşkilatlarla Ermənistan dövləti arasında əlaqələr yeni qurulmayıb, uzun illərdir bu istiqamətdə əməkdaşlıq edilir. “Ermənistanın xarici siyasəti elə terror üzərində qurulub. Yada salaq, ermənilər ötən əsrin 90-cı illərində Azərbaycan ərazisində görün neçə terror hadisəsi həyata keçiriblər. Hətta Bakı metrosundakı dəhşətli terror aktlarını da ermənilər törədiblər. Eyni zamanda, bu gün cəbhə xəttində və Azərbaycanla sərhəddə vaxtaşırı olaraq dinc sakinlərimizə qarşı terror hərəkətləri törədirlər. Bunlar hamısı göz qarşısında olan məsələlərdir. Heç bir şübhə ola bilməz ki, Ermənistan bu gün xarici ölkələrin terror təşkilatları ilə əməkdaşlıq edir. Ermənistanın həm işğal altında saxladığı Dağlıq Qarabağda terror bazaları yaratması, həm də orada terrorçu qrupların yerləşdirilməsi, gələcək planlarında istifadə etmək üçün Livandan, Suriyadan erməni ailələrinin köçürülməsi bu qəbildən olan məsələlərdir. Bunlar hamısı Ermənistanın dövlət siyasətinin kökündə terror yanaşmasını göstərir. Ermənistan elə hesab edir ki, qonşu dövlətlərə qarşı terror hərəkəti həyata keçirdikcə “güclənir”, amma, ilk növbədə, o özünü məhv edir. Minillərdən sonra təsadüfən bir milli dövlətçilik əldə edib və terrorla, qonşu dövlətlərlə müharibə vəziyyəti ilə özü özünü məhv edir. Bu, Ermənistana heç bir inkişaf verə bilməz”.
A.Mirzəzadənin fikrincə, Ermənistanın həyata keçirdiyi və keçirməyi planlaşdırdığı terror hərəkətlərinin qarşısı alınacaq. Millət vəkili dedi ki, Azərbaycan dövləti bu gün Ermənistanın bütün təxribatlarına layiqli cavab verir, Türkiyə PKK-ya qarşı ciddi mübarizə aparır və onların bazasını xeyli zəiflədib: “Ermənistanın terror təşkilatları ilə əlaqədə olması, PKK ilə hərbi əməkdaşlıq etməsi, birincisi, bu dövlətin mahiyyətini göstərir. İkincisi, bu heç də həmin terrorun güclənməsinə gətirib çıxarmayacaq. Ermənistan qonşu dövlətlərin yardımından məhrum olacaq, Ermənistan dünyada terror dövləti kimi tanınır, tanınacaq da. Yəni Ermənistanın apardığı siyasət normal təfəkkürə ziddir. Onların seçimi budur və bu seçimə uyğun da layiqli cəzalarını alacaqlar”.
İradə SARIYEVA
