20/09/2020 18:47
728 x 90

Tiflis erməni təhdidinə qarşı Bakı və Ankaranın yanında yer ala bilər...

img

Cənubi Qafqazda təhdid mənbəyi olan Ermənistan bu gün regionda təkcə Azərbaycana yox, Gürcüstana qarşı da düşmən münasibət sərgiləyir. Elə bu səbəbdən bir neçə gün öncə BMT Baş Assambleyasında Gürcüstan tərəfindən irəli sürülən “Gürcüstanın Abxaziya və Sxinvali-Cənubi Osetiya regionundan olan qaçqın və məcburi köçkünlərin statusu” adlı qətnamə layihəsi səsverməyə çıxarılaraq qəbul edilərkən İrəvan yenidən xəyanət mövqeyi sərgilədi. Belə ki, Ermənistan Gürcüstan ərazisindən olan qaçqın və məcburi köçkünlərin öz doğma yurdlarına qayıdış hüququnu tanıyan qətnamə ilə bağlı səsverməyə qatılmadı.

Bununla, sirr deyil ki, Rusiya amilinə görə Ermənistan dost və müttəfiq adlandırdığı Gürcüstanın əleyhinə daha bir addım atmış oldu. Halbuki, bu halda Azərbaycan Gürcüstaının yanında yer aldığını növbəti dəfə yüksək səviyyədə nümayiş etdirdi. Sənədi Azərbaycan, eləcə də qardaş Türkiyə daxil olmaqla 84 ölkə dəstəklədi. Beləliklə, Azərbaycan da daxil olmaqla sənədi imzalayan ölkələr Gürcüstanın suverenliyi və ərazi bütövlüyünü dəstəklədiklərini təsdiqləyiblər. Amma Ermənistan Gürcüstanın ərazi bütövlüyünə qarşı çıxıb. Bununla da xəyanətini göstərmiş olub. Elə gürcü ekspert Quram Marxuliya da qeyd edir ki, əsrlər boyunca Ermənistan həmişə gürcü dövlətinə xəyanət edib və təəssüf ki, bu gün də bu açıq şəkildə görünür. Onun sözlərinə görə, qonşu Ermənistan gürcü qaçqınların öz doğma yurdlarına qayıtmasını istəmir: “Gürcülər dövlətin ərazi bütövlüyü bərpa olunmadan işğal olunmuş ərazilərə qayıtmaq niyyətində deyil. Gürcüstan hökuməti BMT ilə birgə bu istiqamətdə diplomatik mübarizə aparır”. O bildirib ki, Ermənistanın hərəkətləri Gürcüstan dövlətinin bütövlüyünü tanımadığını göstərir: “Bu, xəyanət deyilsə, Ermənistanın hərəkətlərini başqa nə ilə izah etmək olar?”. Marxuliyanın sözlərinə görə, Gürcüstanın uğurlu diplomatiyası sayəsində Ermənistan bu il səsvermədən boyun qaçırdı. Amma gələcəkdə Ermənistan öz mövqeyini dəyişməyəcək, çünki Gürcüstanın və Ermənistanın xarici siyasi meylləri fərqlənir. Digər ekspert Giya Kuçava qeyd edir ki, Ermənistan mövqeyini dəyişməyəcək və qaçqınların geri qaytarılması, həmçinin ərazi bütövlüyünün dəstəklənməsi məsələlərində Gürcüstana beynəlxalq platformalarda arxa durmayacaq. O qeyd edir ki, Gürcüstan üçün məcburi köçkünlərin statusu məsələsini mütəmadi olaraq müzakirə edib gündəmə gətirmək çox vacibdir: “Biz abxaz və osetin xalqlarının “soyqırımı” ilə bağlı şimal qonşumuzun mediada yaydığı yalanları, saxta məlumatları ilə mübarizə aparmalıyıq. Gürcüstan həm BMT, həm də Avropa İttifaqında gürcü qaçqınlarla bağlı məsələni qaldırır. Dünya həqiqəti biləcək! Gürcüstanda təkcə Abxaziyadan 300 mindən çox məcburi köçkün var”. Ekspert xatırladır ki, Azərbaycan hər zaman Gürcüstanın qətnamələrini dəstəkləyir, çünki özünün də eyni problemi, yəni bir milyon qaçqın və məcburi köçkünü var: “Yəni ortaq bir problemimiz var. Ancaq nüanslar da var. Qondarma “DQR”i hətta Ermənistanın özü də tanımayıb. Abxaziya və Cənubi Osetiyanı isə Rusiya tanıyır”. O bildirir ki, Tiflisin hazırladığı sənədə Azərbaycan və Türkiyə səs verdi: “Amma Ermənistan Gürcüstanı dəstəkləməyəcək, bu aydındır. Əks təqdirdə, Azərbaycan İrəvandan məcburi köçkünlərinin hüquqlarına riayət etmələrini tələb, onların Qarabağdakı doğma ocaqlarına qayıtmalarına israr edə bilər. Tiflis İrəvanın bu mövqeyini rəsmən bəyan etməsə də, mənfi qiymətləndirir.

Hökumət dairələrində baş verənlər mənfi qarşılanır, amma bunu çox göstərməməyə çalışırlar. Bununla belə, Ermənistana qarşı tənqidlər, hətta hökumətyönlü mediada, “Imedi” və İctimai TV kimi populyar telekanallarda aparılır. Gürcüstan və Azərbaycan bütün beynəlxalq platformalarda bir-birini dəstəkləyir. Bunun əsası 1993-1994-cü illərdə, Azərbaycan və Gürcüstanın liderləri Heydər Əliyev və Eduard Şevardnadze olduğu zaman qoyulub”. Yaranmış vəziyyətdə ekspertlər hesab edir ki, Tiflis artıq İrəvana qarşı sərt mövqe sərgiləməli, bu məsələ ətrafında Azərbaycan və Türkiyənin yanında yer almalıdır. Məhz bu halda regionda erməni təhdidinin neytrallaşdırılması daha uğurla həyata keçirilə bilər. İndiki halda da Ermənistanın atdığı bu cür addımlar Gürcüstan-Ermənistan münasibətlərinə mənfi yöndə təsir etməlidir. Gürcüstanın indiki rəhbərləri, hakimiyyət nümayəndələri qonşuları tərəfindən sərgilənən bu cür mövqe və yanaşmanı görməlidir. Tiflis bundan sonra Ermənistana sərgilənəcək siyasətlərini, onlara olan münasibətlərini ciddi şəkildə götür-qoy etməlidir. Çünki Ermənistan tərəfindən Gürcüstana qarşı, belə demək olarsa, soyuq münasibət, arzuolunmaz mövqe və siyasət artıq davamlı hal alıb. Digər tərəfdən faktdır ki, rəsmi Tiflis strateji tərəfdaşlıqla bağlı Azərbaycan və Türkiyə ilə münasibətlər qura bilib. Məhz bu halda Tiflis də Bakı və Ankara ilə birlikdə erməni təhdidinə qarşı mübarizədə əsas rollardan birini ifa etməlidir. Bu ona gələcəkdə erməni təhdidini önləmək üçün çox vacibdir.

Nahid SALAYEV

 

Son xəbərlər