Ermənistanın daxili hərbi siyasətində baş verən son hadisə və qərarlar sübut edir ki, Paşinyan ordu quruculuğuna yanaşmada öz sələflərindən heç də irəli gedə bilməyən işlər görür.
Bunu “Bakı-Xəbər”ə açıqlamasında politoloq Aydın Quliyev bildirib. O deyib ki , vaxtilə sabiq prezident Serj Sarkisyan Ermənistan silahlı qüvvələrini dağılma prosesindən xilas etmək üçün necə uğursuz addımlar atırdısa, bu gün həmin ölçü-biçisiz addımları eynilə Paşinyan iqtidarı təkrar edir:”2017-18- ci illərdə fərarilik və ordudaxili cinayətlər o həddə çatdı ki, o dövrkü prezident Sarkisyan böyük hay-küylə "ordu-xalq həmrəyliyi " adında konsepsiyanı ictimai müzakirələrə çıxartdı və heç bir nəticəyə nail ola bilmədi. 2018-ci ildə hakimiyyət dəyişikliyinə qədər Sarkisyan Ermənistan ordusunu dağıdıcı problemlərdən xilas edə bilmədi. Sarkisyanın 2018-ci ilə qədərki uğursuz çabalarını bu gün Paşinyan təkrar edir”.
Politoloq deyib ki, Ermənistanın baş naziri Paşinyan az əvvəl "könüllü xalq ordusu" yaratmaq məsələsini gündəmə gətirməklə orduda dağıdıcı proseslərin getdiyini bir daha təsdiqlədi və ordunu xilas etmək üçün növbəti planına baş vurdu: "Könüllü xalq ordusu" planı həm də onu ifadə edir ki, Paşinyan Ermənistan ordusuna tam şəkildə nəzarət edə bilmir, orduya etimad etmir və əslində özünə daha sadiq alternativ ordu formalaşdırmaq istəyir. Paşinyan dərk edir ki, korrupsiya, fərarilik, “dedovşina” cinayətləri içində batan Ermənistan ordusu üzərində keçmiş prezidentlərdən olan Sarkisyanın və Köçəryanın güclü təsir imkanları var. Paşinyanın altetnativ ordu birləşmələri yaratmaqla, hətta onun tərkibinə xaricdən muzdlu qüvvələr cəlb etmək kimi ciddi planlarının olduğu da istisna deyil. "Könüllü xalq ordusu" planının arxasında Paşinyanın hazırkı Ermənistan ordusuna inanmaması və daxili siyasi planlar baxımından onu qorxulu qüvvə hesab etməsi dayanır. Paşinyanın Ermənistan ordusuna güvənmədiyini göstərən daha bir əlamət onun işğal etdikləri Qarabagda təmas xətlərinə polis qüvvələrini çıxarmasıdır. Etibarlı mənbələrin məlumatına görə, Ermənistan hərbi komandanlığı döyüş postlarına çıxarmağa yetərli sayda əsgər belə tapa bilmir. Məlumatlara görə, Ermənistanın təxribatçı zabiti Alaverdiyanın Azərbaycan silahlı qüvvələrinə könüllü təslim olması və geri qayıtmaq istəməməsi Ermənistan ordusunda fərarilik və ruh düşkünlüyü əlamətlərini daha da gücləndirib. Erməni gənclərin işğal torpaqlarında hərbi xidmətə xüsusilə aqressiv yanaşması barədə xəbərlər daha intensiv şəkil almaqdadır. Hərbi xidmətdən yayınmaq meylləri o həddə çatıb ki, Paşinyan bu günlərdə, hətta polislərin təmas xəttində 15 günlük məcburi hərbi xidmət keçməsinə dair əmr verib.
Ermənistanın keçmış prezidentinin də, indiki baş nazirinin də dağılan ordunu xilas etmək planlarının uğursuzluğa düçar olmasının tək səbəbi var. Keçmiş prezident Sarkisyan da, Paşinyan da başa düşmür və ya başa düşmək istəmirlər ki, Ermənistan ordusunun ən böyük dağılma səbəbi onun özgə torpaqlarında işğalçı əsgərlər kimi hərbi xidmətə məcbur edilməsidir.
Paşinyanın "könüllü xalq ordusu" planı da Sarkisyanın "ordu-xalq həmrəyliyi" konsepsiyası kimi rüsvayçı uğursuzluğa məhkumdur”.
