Uzun illərdir Azərbaycan tarixində öz xeyirxah əməlləri ilə dərin izlər qoyan mesenat, millət atası Hacı Zeynalabdin Tağıyevə Bakıda heykəl ucaldılması məsələsi gündəmdədir. Məlum olduğu kimi, dəfələrlə bu məsələ ictimaiyyət və ziyalılar tərəfindən müzakirə edilib. Onu da vurğulayaq ki, bu ilin mart ayında Prezident İlham Əliyevin bir qrup mədəniyyət xadimi ilə görüşündə də Hacı Zeynalabdin Tağıyevə heykəl qoyulması ilə bağlı məsələnin aktual olduğu səsləndirilib. Prezident İlham Əliyev bu təklifə anındaca reaksiya verib və bu vacib məsələ ölkə başçısının və Birinci vitse-prezident Mehriban Əliyevanın daim diqqət mərkəzində olub.
Bir müddət əvvəl Hacı Zeynalabdin Tağıyevə Bakıda qoyulacaq heykəlin, abidənin hazırlanması üçün heykəltəraşlar arasında açıq müsabiqə elan ediləcəyi qeyd edilirdi.
Artıq Azərbaycan Mədəniyyət Nazirliyi, Bakı Şəhər İcra Hakimiyyəti və Heydər Əliyev Fondu Hacı Zeynalabdin Tağıyevin heykəlinin hazırlanması ilə bağlı açıq heykəltəraşlıq müsabiqəsi elan edib.
Fonddan mətbuata verilən məlumata görə, heykəlin “İçərişəhər” metrostansiyası yaxınlığındakı meydançada (İstiqlaliyyət küçəsi) ucaldılması nəzərdə tutulur.
Şərtlərinə görə, müsabiqədə landşaft memarlığı, bağça-park və şəhər heykəltəraşlığı sahələrində işləyən peşəkar heykəltəraşlar iştirak edə bilərlər.
Heykəlin ucaldılması müəllifin və ya onun müvəkkili olan şəxsin bilavasitə müşahidəsi altında, müsabiqənin təşkilatçısı tərəfindən seçilmiş yerdə həyata keçiriləcək.
Qeyd edək ki, seçimləri həyata keçirəcək münsiflər heyətinin üzvlərinin də adları açıqlanacaq. Belə ki, Azərbaycan Respublikası mədəniyyət nazirinin birinci müavini Vaqif Əliyev, Azərbaycan Rəssamlar İttifaqının sədri, Xalq rəssamı Fərhad Xəlilov, Azərbaycan Memarlar İttifaqının sədri, Əməkdar memar Elbəy Qasımzadə, Azərbaycan Respublikası Mədəniyyət Nazirliyinin İncəsənət şöbəsinin müdiri İsmayıl Hüseynov, Heydər Əliyev Fondunun incəsənət məsələləri üzrə eksperti, Əməkdar incəsənət xadimi Emin Məmmədov, Heydər Əliyev Mərkəzinin departament direktoru, Əməkdar incəsənət xadimi Məhəbbət Mehdiyeva, Xalq rəssamı, heykəltəraş, professor Akif Əsgərov, AMEA Memarlıq və İncəsənət İnstitutunun Memarlıq abidələrinin qorunması və bərpası problemləri şöbəsinin müdiri, memarlıq üzrə fəlsəfə doktoru Rahibə Əliyeva, Azərbaycan Respublikası Mədəniyyət Nazirliyinin Təsviri və dekorativ sənət sektorunun müdiri, sənətşünas Qalib Qasımov müsabiqənin münsiflər heyətində təmsil olunurlar.
Azərbaycan Mədəniyyət Nazirliyi, Bakı Şəhər İcra Hakimiyyəti və Heydər Əliyev Fondu Hacı Zeynalabdin Tağıyevin heykəlinin hazırlanması ilə bağlı elan etdiyi açıq heykəltəraşlıq müsabiqəsi ölkə heykəltəraşlarının diqqət mərkəzindədir.
Heykəltəraşlar Hacı Zeynalabdin Tağıyevin obrazını necə görürlər? Ümumiyyətlə, bu müsabiqədə hansı heykəltəraşlar iştirak edəcəklər?
Xanlar Əhmədov: “... yaradıcılıq sirri olduğu üçün sizə bu barədə heç bir söz deyə bilmərəm”
Azərbaycan Rəssamlar İttifaqının heykəltəraşlıq bölümünün rəhbəri, Xalq rəssamı Xanlar Əhmədov “Bakı-Xəbər”ə açıqlamasında bildirdi ki, onun ən böyük yaradıcılıq arzularından biri Hacı Zeynalabdin Tağıyevə Bakıda ucaldılacaq heykəlin müəllifi olmaqdır. X.Əhmədovun sözlərinə görə, bu gün bir çox heykəltəraş da bu arzudadır. Hacı Zeynalabdin Tağıyevin heykəlinin hazırlanması ilə bağlı keçirilən müsabiqədə iştirak edəcəyini deyən X.Əhmədov hesab edir ki, o, yaradıcılıq potensialından istifadə edərək böyük xeyriyyəçinin obrazını yaratmağa çalışacaq. “Bu müsabiqənin açıq şəkildə elan edilməsi bu məsələdə şəffaflığın təmin olunmasına şərait yaradacaq. Hesab edirəm ki, mən də daxil olmaqla, bir sıra heykəltəraşlar Hacı Zeynalabdin Tağıyevin heykəlinin hazırlanması ilə bağlı müsabiqəyə qatılacaqlar. Mən Hacı Zeynalabdin Tağıyevin heykəlinin hansı formada olmasını artıq özüm üçün müəyyən etmişəm, lakin bu, yaradıcılıq sirri olduğu üçün, sizə bu barədə heç bir söz deyə bilmərəm. Ümumiyyətlə, heykəltəraşların hamısı bu heykəli bir-birindən xəbərsiz işləyəcəklər”.
Bir sıra tanınmış heykəltəraşların müsabiqədə iştirakının rəqabət yaradacağını istisna etməyən X.Əhmədovun sözlərinə görə, bu, sağlam rəqabət olmalıdır. “Bilirəm ki, bu məsələdə güclü rəqabət olacaq. Mən hazırda bu heykəli işləməyə hazırlaşıram. Ümid edirəm ki, onun şəxsiyyətinə layiq heykəl yarada biləcəyəm. O, yaxın tarixdə yaşamış şəxsiyyətdir və onun obrazını elə vermək lazımdır ki, siması tam əks olunsun”.
X.Əhmədov onu da bildirdi ki, müsabiqə hələ yeni elan edilib və yaxın zamanlarda müsabiqə ilə bağlı yaradıcılıq məsələləri Rəssamlar İttifaqında müzakirə edilə bilər.
Fəxrəddin Əliyev: “Mənim bu müsabiqədə iştirak etmək və belə böyük bir şəxsiyyətin heykəlini işləmək fikrim var”
Heykəltəraş Fəxrəddin Əliyev də “Bakı-Xəbər”ə bildirdi ki, müsabiqədə iştirak edəcək. “Mənim bu müsabiqədə iştirak etmək və belə böyük bir şəxsiyyətin heykəlini işləmək fikrim var. Ancaq hələlik heç nə etməmişəm. H.Z.Tağıyevin heykəli hazırlanarkən onun tikdiyi binaları da nəzərə almaq lazımdır. Onun heykəlinin qoyulması üçün bir meydança olmalıdır. Şevçenkonun, Puşkinin heykəli üçün yaradılan meydança kimi, onun da heykəlinin yaradılması üçün meydanca müəyyən edilməlidir. Belə yaxşı olardı. Bu heykəl onun bütün missiyasını, tariximizdə oynadığı rolu əks etdirməlidir”.
Əlisəfa Əsgərov: “Bu müsabiqədə güclü rəqabət olacaq”
Heykəltəraş Əlisəfa Əsgərov da müsabiqədə iştirak edəcək. “Mən bu müsabiqədə iştirak edəcəyəm. H.Z.Tağıyevin heykəlini hazırlayarkən gözəl eskizlər vermək mümkündür. Bu heykəl hazırlanarkən həm onun dövrünün mənzərəsini, həm də gördüyü işləri göstərmək lazımdır. Hesab edirəm ki, bütün heykəltəraşlar müsabiqədə iştirak edərək bu böyük şəxsiyyətin obrazını yaradacaqlar. Düşünürəm ki, mənim də iştirak edəcəyim bu müsabiqədə güclü rəqabət olacaq, ancaq hər kəs müsabiqəyə öz yaradıcılıq nümunəsini təqdim edəcək” - deyə Ə.Əsgərov vurğuladı.
Heykəltəraşlar Zakir Əhmədov və İslam Abdullayev isə müsabiqəyə qatılmayacaqlar
Heykəltəraş Zakir Əhmədov isə bizimlə söhbətində müsabiqəyə qatılmayacağını bildirdi. Bunun səbəbinə gəlincə, heykəltəraş “Qardaşım, Xalq rəssamı Xanlar Əhmədov müsabiqədə iştirak edəcək. Ona görə də mən iştirak etmirəm” - deyə bildirdi.
Heykəltəraş İslam Abdullayev də müsabiqəyə qatılmayacaq. O, müsabiqənin şəffaf keçiriləcəyinə inanmır. “Mənim bu müsabiqədə iştirak etmək fikrim yoxdur. Artıq bəllidir ki, kimlər hazırlayacaq. Burada müsabiqəlik iş yoxdur” - deyə müsahibimiz bildirdi.
İradə SARIYEVA
