23/07/2019 22:31
728 x 90

Elmira Axundova bəzi əlaqədar qurumları rəssamlara laqeyd münasibətdə suçladı - FOTO

Ziyadxan Əliyevin 70 illik yubileyi münasibətilə nəşr olunan “Sənətşünas düşüncələri” adlı miniatür kitabının təqdimatı keçirilib

img

Azərbaycanın görkəmli sənətşünas-alimi Əməkdar incəsənət xadimi, Azərbaycan Rəssamlar İttifaqının “Tənqid və sənətşünaslıq” bölməsinin rəhbəri, Azərbaycan Dövlət Rəssamlıq Akademiyasının “incəsənət tarixi” kafedrasının dosenti Ziyadxan Əliyevin 70 illik yubileyi münasibətilə “Sənətşünas düşüncələri” adlı miniatür kitabının təqdimat mərasi keçirilib.

Nəşrdə Z. Əliyevin Azərbaycanın görkəmli sənətkarları, onların yaratdıqları möhtəşəm sənət əsərləri haqqında zaman-zaman qələmə aldığı mahiyyətcə çox dəyərli, keyfiyyətcə yüksək səviyyəli, sənəti və tədqiqatı məqalələri əsasında tərtib olunub. Təxminən 25 məqalədən ibarət olan, 447 səhifəlik bu kitabın ölçüsü 60 mm, tirajı isə simvolik olaraq 100 nüsxə nəzərdə tutulub. Yüksək poliqrafik və çox nəfis şəkildə nəşr olunan kitabın ideya müəllifi, təşəbbüskarı və təşkilatçısı Azərbaycanın görkəmli mədəniyyət xadimi, Azərbaycan Respublikasının Əməkdar incəsənət xadimi, Azərbaycan Kitabsevərlər Cəmiyyətinin sədri, Azərbaycanda ilk Miniatür Kitab Muzeyinin yaradıcısı və rəhbəri Zərifə xanım Salahova, maliyyə yardımçısı isə Azərbaycan Rəssamlar İttifaqıdır.

Təqdimat mərasimini giriş sözü ilə açan Zərifə xanım Salahova Z.Əliyevi  Kitabsevərlər Cəmiyyətinə sədr seçildiyi ilk vaxtlardan tanıdığını bildirərək qeyd edib ki, həmin dövrdə Azərbaycanın ilk kitab nişanı barədə düşünməyə başlayıb və işin reallaşmasında ona Z.Əliyev dəstək olub. “Bunun üçün bir çox əlaqədar təşkilatlarla əlaqə saxladım. Ancaq istədiyim nəticəni əldə edə bilmədim. Lakin yenə də ruhdan düşmədim. Nəhayət, dəyərli dostların sayəsində Ziyadxan Əliyevlə əlaqə saxlamalı oldum. Əlbəttə ki, nəticə ürəkaçan oldu. Verdiyi sözü tutan, zəhmətdən, əzab-əziyyətdən çəkinməyən bu insan mütləq olaraq sübut etdi ki, “Azərbaycan ən qədim kitab nişanının vətənidir”-deyə o bildirib.

Sonra söz Azərbaycanın Xalq Rəssamı, professor Arif Hüseynova verilib.

A.Hüseynov qeyd edib ki, bu tədbir Z. Əliyevin 70 illik yubileyinə həsr olunan toplantılardan sayca üçüncüsüdür.

Tədbirdə millət vəkili Elmira xanım Axundovanın çıxışı bir bir qədər diqqətçəkən olub. Çıxışına “Dünyanın Səttarı” məqaləsinə münasibətlə başlayan millət vəkili qeyd edib ki, Səttar Bəhlulzadə, bütövlükdə Səttar sənəti onun üçün ikiqat əzizdir. O vurğulayıb ki, birincisi onun ecazkar sənət dünyasıdırsa, ikincisi isə bu sənət, bu sənətkar haqqında mərhum həyat yoldaşı Ramiz Axundovun Səttar Bəhlulzadə haqqında çəkdiyi ilk və yeganə sənədli filmdir.

Sonda E.Axundova bəzi əlaqədar təşkilatlara öz iradlarını bildirməkdən də çəkinməyib. O deyib ki, rəssamlarla daim təmasda olması onların həyat, sosial-məişət, sənət şəraitləri ilə yaxından tanış olmasına imkan verib və gəldiyi qənaət budur ki, rəssamların əksəriyyəti digər yaradıcı sahə adamları ilə müqayisədə maddi cəhətdən xeyli imkansız olsalar da, səxavətlilik, əliaçıqlıq baxımından kifayət qədər varlıdırlar. “Təbii ki, bu da onların yüksək insani keyfiyyətlərindən, ilahi mənəviyyatlarından irəli gəlir. Buna baxmayaraq, təəssüf ki, digər yaradıcı sahə adamları ilə nisbətdə rəssamların dəyərincə qiymətləndirilməsində son dövrlərdə sanki bir durğunluq yaranmışdır. Hansı ki… Ancaq ümid edirəm ki, əlaqədar təşkilatlar, xüsusən də səlahiyyətli təqdimatçı təşkilatlar, rəssamların da fəxri adlarla, mükafatlarla, xüsusi imtiyazlarla dəyərləndirilməsində keyfiyyətlər nəzərə alınmaqla kəmiyyət artımı təqdimatlarına da diqqəti artıracaqlar”- deyə o qeyd edib.

Tədbirdə, həmçinin, xalq rəssamı Cəmil Müftizadə, Azərbaycan Rəssamlar İttifaqının katibi, Xalq rəssamı Ağali İbrahimov, Xalq rəssamı Eldar Mikayılzadə, yazıçı Natiq Rəsulzadə də çıxış edib.

Qeyd edək ki, yazı sənətşünas Binnət Hümbətoğlunun qeydləri əsasında hazırlanıb.

Xəbər xidməti

Son xəbərlər