Yazıçılar Birliyi üzvlərinin 70-i Prezident mükafatı, 10-a yaxını isə Prezidentin fərdi təqaüdünü alır Aşıqlar Birliyinin yalnız iki üzvü Prezidentin fərdi təqaüdçüsüdür Rəssamlar İttifaqının 70 üzvü Prezident mükafatı alır, fərdi təqaüd alanların sayı isə… Bəstəkarlar İttifaqının 40 üzvü Prezident mükafatı, 21 üzvü isə Prezidentin fərdi təqaüdünü alır…
Yaradıcı insanların stimullaşdırılması dövlətin həyata keçirdiyi sosial mədəniyyət siyasətinin tərkib hissəsidir. Son 20-25 ildə Azərbaycanın yaradıcı şəxslərinə, rəssamlara, heykəltəraşlara, memarlara, sənətşünaslara, yazıçılara, şairlərə, ədəbiyyatşünaslara, bəstəkarlara, musiqişünaslara Prezidentin fərdi təqaüdü və Prezident mükafatları verilir.
Prezident təqaüdləri ömürlük verilsə də, Prezident mükafatı birillik verilir. Lakin elə insanlar var ki, onlar yaradıcılıq qurumlarının rəhbərliyinin “xüsusi diqqətində” olduğu üçün, hər il adı Prezident mükafatçıları siyahısına salınır. Sözsüz ki, bu da yaradıcılıq qurumları üzvlərinin narazılığına səbəb olur və bu proses hətta qalmaqalla müşayiət olunur. Bəzən deyirlər ki, filan gənc yazıçı birlik, ittifaq sədrinin xüsusi rəğbətini qazandığı üçün onun adı hər il yenilənən siyahıya daxil edilir. Yaradıcı adamlar hesab edirlər ki, 300 manat məbləğində olan Prezident mükafatı alanların hər il tərkibi dəyişdirilməlidir ki, başqaları da bu mükafatlardan bəhrələnə bilsin.
Mətbuatda yer alan fikirlərə görə, Prezident təqaüdü alan yazıçı, şair, rəssam və bəstəkarların siyahısı açıqlanmır. Mədəniyyət Nazirliyinin İnformasiya və ictimaiyyətlə əlaqələr şöbəsinin müdiri İntiqam Hümbətov “Prezident təqaüdü alacaq üzvlərin siyahısını Mədəniyyət Nazirliyinə yaradıcı ittifaqlar təqdim edir” - deyə bildirib.
O, həmçinin, qeyd edib ki, nazirlik təqaüd alanların sadəcə maliyyələşməsini təmin edir: “Burada hər üç yaradıcı ittifaq – Yazıçılar Birliyi, Bəstəkarlar İttifaqı və Rəssamlar İttifaqının təqdim etdiyi siyahıya baxılır. Qurumların təqdim etdiyi siyahı təsdiqlənir. Yazıçılar İttifaqından 70 nəfər yaşlı, 50 nəfər gənc yazıçıya, Rəssamlar İttifaqından 50 nəfər yaşlı, 20 nəfər gənc rəssama, Bəstəkarlar İttifaqından isə 30 nəfər yaşlı, 10 nəfər gənc bəstəkara 1 illik təqaüd müəyyən olunub.
Yaşlı nəsil mədəniyyət nümayəndələrinə aylıq 300 manat, gənclərə isə 200 manat Prezident təqaüdü verilir. Növbəti illərdə siyahı yenilənir və nazirliyə təqdim edilir. Qeyd etdiyim kimi, nazirlik siyahını sadəcə təsdiq edir və maliyyə ayırır. Həmin yaradıcı ittifaqlar özləri məlumat versələr, siyahı ilə əlaqədar sualları cavablandırsalar, daha yaxşı olar”.
Hansı yaradıcı ittifaqın neçə üzvü Prezidentin fərdi təqaüdünü, neçə üzvü Prezident mükafatı alır?
Azərbaycan Yazıçılar Birliyinin (AYB) mətbuat xidmətinin rəhbəri Xəyal Rza “Bakı-Xəbər”ə açıqlamasında bildirdi ki, Birliyin təqaüd və mükafat alan üzvlərinin sayı heç zaman gizlədilmir. Onun bildirdiyinə görə, Birlik üzvü olan 20 nəfər gənc, 50 nəfər yaşlı və orta yazlı yazar 1 illik Prezident mükafatı alır. “Ümumilikdə, Azərbaycan Yazıçılar Birliyinin 70 üzvü Prezident mükafatı alır. Prezidentin fərdi təqaüdçülərinin sayına gəlincə, onların sayı 10 nəfərə qədərdir”.
Azərbaycan Aşıqlar Birliyinin sədri, professor Məhərrəm Qasımlı isə bizimlə söhbətində bildirdi ki, Birliyin yalnız iki üzvü - əməkdar mədəniyyət işçiləri aşıq Mahmud Məmmədov və aşıq Ulduz Quliyeva Prezidentin fərdi təqaüdünü alır. “Birliyin heç bir üzvü Prezident mükafatı almır. Keçən ilə qədər yalnız əməkdar mədəniyyət işçisi Samirə Əliyeva alırdı, bu il onun adı siyahıya düşmədi. Ancaq mən aşıqlara Prezident mükafatı və Prezidentin fərdi təqaüdünün verilməsi ilə bağlı Mədəniyyət Nazirliyinə müraciət etmişəm. Hazırda aşıq Əli Quliyevin Prezidentin fərdi təqaüdünə layiq görülməsinə çalışırıq. Ümid edirəm ki, hazırda ağır xəstə vəziyyətində olan görkəmli aşıq Prezidentin fərdi təqaüdünə layiq görüləcək” - deyə M.Qasımlı bildirdi.
Azərbaycan Bəstəkarlar İttifaqının katibi, xalq rəssamı Ağaəli İbraihimov isə bildirdi ki, Rəssamlar İttifaqının 20 nəfər gənc, 50 nəfər yaşlı nəslə aid olan üzvü 1 illik Prezident mükafatı alır. “Əslində, yaradıcılıq ittifaqlarının üzvlərinə Prezident mükafatının verilməsi ideyası Rəssamlar İttifaqının sədri, xalq rəssamı Fərhad Xəlilova məxsusdur. O bir neçə il əvvəl təklif etmişdi ki, gənc rəssamların həvəsləndirilməsi üçün belə bir mükafatın verilməsi çox yaxşı olardı. Sağ olsun dövlətimiz, yalnız Rəssamlar İttifaqının deyil, digər yaradıcılıq qurumlarının da üzvlərinə Prezident mükafatı verilməsini reallaşdırdı. Bizim ittifaqda 20 nəfər gənc, 50 nəfər isə yaşlı rəssam Prezident mükafatı alır. Prezident təqaüdçülərinin sayını isə dəqiq bilmirəm” - deyə o bildirdi.
Azərbaycan Bəstəkarlar İttifaqının baş məsləhətçisi Sevda Hüseynova isə “Bakı-Xəbər”ə verdiyi məlumatda qeyd etdi ki, İttifaqın 40 üzvünə 1 illik Prezident mükafatı verilir. “Hər il siyahı dəyişdiyindən, mən sizə adları deyə bilməyəcəyəm. Ancaq 10 nəfər gənc, 30 nəfər isə yaşlı nəslin nümayəndəsi Prezidentin xüsusi sərəncamına əsasən xüsusi mükafat alır. Bu aiddir Bəstəkarlar və Rəssamlar ittifaqlarına, eyni zamanda, Yazıçılar Birliyinə. Prezidentin fərdi təqaüdçülərinə gəlincə, 21 nəfər İttifaq üzvü fərdi təqaüd alır” - deyə Sevda Hüseynova bildirdi.
İradə SARIYEVA
