Yaxşılıq etmək, kiməsə təmənnasız köməklik göstərmək, hətta ona əlindən gələni əsirgəməmək hamıya xas deyil. Bu kimi yaxşılıqlar fərqli, bir qism insana məxsusdur; Allah bu lütfü insan saydıqlarına verir...
Bizim Lətifə xanım da məhz belə insanlardandır... Lətifə Məmmədovadan bəhs edirəm, o Lətifə Məmmədovadan ki, insanlıq onun həyat kredosudur; tanıdı, tanımadı, ünvanına müraciət edənləri xoş çöhrə ilə qarşılayar, qəti pərişan etməz, mümkün qədər razı salar.
Səmimi deyim, Lətifə Məmmədova sözün əsl mənasında insandır... Onu lap çoxdan tanıyıram. İllər əvvəl Respublika Xatirə Kitabı bizi həm tanış etdi, həm də mənim Lətifə xanımı yaxından tanımağıma vəsilə oldu.
Bu, necə oldu? Düz on il əvvəl-onda Respublika Xatirə Kitabı Redaksiyası Azərbaycan Milli Ensiklopediyasının tərkibində fəaliyyət göstərirdi, məlum olmayan səbəblərdən redaksiyamız AMEA-nın strukturundan kənarlaşdırıldı və o vaxt biz bir neçə Nazirliyə, o cümlədən Mədəniyyət Nazirliyinə müraciət etdik. Bizə yalnız Mədəniyyət Nazirliyindən müsbət cavab gəldi...
Sonralar Lətifə xanım dedi ki, Respublika Xatirə Kitabının mahiyyəti barədə nazirə məruzə etmişdim...
Lətifə xanım cənab nazirə məruzə etməklə, əslində, redaksiyamıza, xüsusilə bizə böyük bir xeyirxahlıq etmiş oldu...
Nə vaxt Lətifə xanımdan söz düşürsə, mən bu epizodu məxsusi olaraq vurğulayıram. Bir insana əl tutmaq, ondan köməyini əsirgəməmək insanın insana sevgisidir və bu, bütövlükdə bir Allah lütfüdür. Belə bir lütfü necə yaddan çıxarmaq olar?
Lətifə xanımla tez-tez görüşüb zəngləşməsək də, aramızdakı doğma münasibət qorunur. Hesab edirəm ki, aradakı uzaqlıq bizi o qədər də uzaq məsafələrdə tutmur, çünki ən azından tez-tez bir-birimizi xatırlayırıq.
Lətifə xanım hazırda Yasamal rayon Mərkəzləşdirilmiş Kitabxana Sisteminin direktorudur, çox bacarıqlı kadr, fərqli təşkilatçı, ən əsası, dediyim kimi, həqiqi insandır. Onunla hətta uzaqdan uzağa doğma olmağın öz fərqli təsirləri var. O, hər gün ən azı iki-üç dəfə xatırladığım, ləyaqətinə, insana sevgisinə heyran qaldığım səmimi dost, mehriban tərəfdaşdır.
Lətifə xanımın insan çöhrəsi öz rəngindədir, başqa rəng çaları ilə qarışmaz. Onun insan çöhrəsinin rəngi, mən deyərdim, bəlkə də elə sevgi rəngidir. Çünki onun ürəyi ilə düşüncəsi məhz bu anlamdadır.
Lətifə xanımın insan çöhrəsində təzahür edən kübarlıq, həlimlik bəlli ki, bir az özünün həyatla münasibətindən irəli gəlirsə, daha çox gendən gəlir. O, ali keyfiyyətlər arzusu ilə yaşayan qadın olmayıb, Allah ona qəlb aynasının təmizliyi səbəbindən bu keyfiyyətləri nəsib edib. Zənnimcə, Lətifə xanım başqasının dərdini öz dərdi sanır, ağlayanın halına acıyır, yeri gəldikdə dərdinə əlac edir, sülhpərvərdir və s. Bütün bunlar da elə əsl kübarlıqdır.
Aramızdan qatar tələskənliyi ilə ötüb keçən illər Lətifə xanımı ömrünün 65-ci mərtəbəsinə çatdırıb. Adamın inanmağı gəlmir ki, həyatını yaxşılıqlara sərf etmiş bu dəyərli, eleqant insanın 65 yaşı olur.
65 yaş müdrikliyin göstəricisidir. Bu yaşda da Lətifə xanım çox möhtəşəm görünür. O, bu çağında da əvvəlki qətiyyətini saxlayıb, bunu qarşıdakı yubileylərə də aparmaq niyyətindədir...
Səni ürəkdən təbrik edirəm, əziz Lətifə xanım. 65-in mübarək! Gün gəlsin, 70, 75, 80, 85 yaşını da belə duru və qaynar sevgi ilə təbrik edim!
Ömür boz kahadı - zülmət yığını,
Siz də bir işıqsız, camalınız xoş.
Yenə eyni ruhda, havadasınız,
Yenə də işiniz, amalınız xoş.
Könül rübabınız neçə xətti ki?
Sanıram, Allahı anmısız elə...
Su qədər ağrınız, acınız olub,
Siz doğma, yad üçün yanmısız elə.
Ömür qatarına əl edən qadın
Qayğı olan yerdə çağlamaq çətin.
Eşq ürək ovutmur, iz salır elə,
Yetmiş qapı açıb bağlamaq çətin.
İrəli şütüyür illər saattək,
Yenə sevgi adlı çəpərdə qalın...
Hələ açılası qapılar çoxdur,
Həminki ovqatda, təpərdə qalın.
Söz kimi qətidi andınız, bəlli.
...Söz həyat mülkündə ləliydi, adam.
Mən gülə heç zaman gül vermədim ki,
Sonra deməsinlər: dəliydi adam...
Mən ovçu deyiləm tüfəngim olsun,
...Qışın oğlan çağı tələm sevinər.
Bu şeir Allahın söz çələngidi, -
Məndən qəbul etsəz, qələm sevinər.
Məndən qəbul etsəz,
Lətifə xanım həm sözüm,
Həm də ki, qələm sevinər.
Nəzakət Məmmədova
Respublika Xatirə Kitabı
Redaksiyasının Baş redaktoru
