Azərbaycanda mal-qara sayında azalma davam edir. Bu barədə Dövlət Statistika Komitəsinin (DSK) son aylıq hesabatında bildirilir.
Qurumun 2026-cı il aprelin 1-nə olan məlumatına görə, son bir ildə iribuynuzlu mal-qaranın sayında 22 min 500 azalma baş verib. Bu say 2 milyon 434 min 100-ə düşüb. Qoyun və keçilərin sayında isə daha çox, 40 minə yaxın azalma qeydə alınıb. Onların da sayı 6 milyon 880 min 100-ə düşüb. Bəzi ekspertlər bunu 2015-ci ildən etibarən ölkədə pambıqçılığın inkişafı adı altında bəzi heyvandarlıq təsərrüfatlarına aid torpaq sahələrinin uzunmüddətli icarələrinin kütləvi ləğvi ilə izah edirlər. 10 il əvvəl ilə müqayisədə iribuynuzlu mal-qaranın sayında 300 minə, qoyun və keçi sayında isə 2 milyona yaxın azalma var.
Bununla belə, DSK vurğulayır ki, ötən ilin yanvar-mart ayları ilə müqayisədə kənd təsərrüfatının ümumi məhsulu real ifadədə 1.1 faiz, o cümlədən heyvandarlıq məhsulları istehsalı 0.9 faiz, bitkiçilik məhsulları istehsalı 5.5 faiz artıb. Qeyd edək ki, mövcud vəziyyətdə aqroparklar demək olar ki, örüş sahələri hesabına formalaşdırıldı. İndi isə xüsusilə fərdi fermerlər öz təsərüffatları üçün yem fondunu formalaşdıra bilmir. Örüş sahələri də azdı, əkinə yararlı torpaq da azalır. Bu da otun qiymətinin bahalaşmasına səbəb olur. Yem ehtiyatının tələbatı tam ödəməməsi, otun bahalaşması nəticə etibarilə ətin qiymətini də artırır. Fərdi təsərrüfatlar yavaş-yavaş sıradan çıxır. Bunun da səbəbi kəndlinin bazarlara birbaşa çıxışının olmamasıdır. Nəticədə kəndlinin həyətində və ya sahədə yerində satdığı qiymətlə bazarlardakı qiymət arasında uçurum olur. Belə olan halda isə itirən kəndli və bazarlardan məhsulu alan alıcı olur. Heyvandarlıq üçün qışlaq və yaylaq sahələri olmadıqda, bu sahənin inkişafı da qeyri-mümkün hala gəlir. Bu vəziyyəti düzəltmək üçün aqrar siyasət yenidən nəzərdən keçirilməli, kiçik təsərrüfatlara dəstək gücləndirilməli və örüş sahələrinin qorunması üçün tədbirlər görülməlidir.
Ramil QULİYEV
