Mədəniyyət Nazirliyi Respublika Xatirə Kitabı Redaksiyası aprelin 9-da saat 12:00-da Sumqayıt Dövlət Dram Teatrında "44 gün – Tarixi zəfər" adlı çoxcildliyin IV cildinin təqdimatını keçirəcək. Bu cilddə Vətən uğrunda şəhid olmuş (antiterror əməliyyatı daxil olmaqla) şəxslər haqqında əlifba sırası ilə ensiklopedik məlumatlar yer alıb. Məlumat üçün bildirək ki, müasir Azərbaycan dövlətinin qurucusu və memarı, ümummilli lider Heydər Əliyevin qayğısı və təşəbbüsü ilə yaradılmış Respublika Xatirə Kitabı insan resurslarını əbədiləşdirən tarixi sənəd, müharibə ağrılarını özündə geniş əks etdirən ensiklopedik salnamədir. Redaksiya bu missiyanı öz üzərinə götürərək İkinci Dünya müharibəsi (1941-1945), Əfqanıstan döyüşləri, 20 Yanvar faciəsi, Xocalı soyqırımı, Azərbaycanın ərazi bütövlüyü uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli Qəhrəmanlarımız haqqında kitablar dərc etdirir. Bu günədək 17 cild çap olunub. RespublikaXatirə Kitabının indiyədək iyirmiyə yaxın cildi çap edilib. 2017-ci ildə Dövlət Təhlükəsizlik Xidməti nəzdində fəaliyyət göstərən "Əsir, itkin düşmüş, girov götürülmüş vətəndaşlarla əlaqədar Dövlət Komissiyası"nın İşçi qrupu ilə birgə Azərbaycanın ərazi bütövlüyünə təcavüz edən Ermənistanın Dağlıq Qarabağ və ətraf rayonlara hücumu, torpaqlarımızın işğalı zamanı əsir və girov götürülmüş, həmçinin naməlum şəraitdə itkin düşmüş hərbçi və mülki şəxslərin sonrakı taleləri barədə araşdırma aparılıb, 4 cilddə (iki dildə) kitab hazırlanıb. Eyni zamanda, redaksiya 44 günlük Vətən müharibəsində şəhid olmuş şəxslərin adlarının və xatirələrinin əbədiləşdirilməsi məqsədilə 4 cilddə kitab çap etdirib. Bu çoxcildlik ensiklopedik nəşrlər ictimai müstəvidə xüsusi rol oynayır. Redaksiyanınhazırladığı "Qələbə - 75 və Qələbə - 80: Azərbaycan xalqının mübarizə əzmi" kitabları da tarixlə cəmiyyət arasındakı faktiki prosesləri özündə ehtiva edir. Burada faşizm üzərində qələbənin əhəmiyyəti geniş təqdir olunub, 1941-1945-ci illərdə alman faşizminə qarşı döyüşən Azərbaycan vətəndaşlarının qəhrəmanlıq və şücaəti xüsusi rakursda xarakterizə edilib. RespublikaXatirə Kitabı Redaksiyası həmçinin, "Bakı-Xəbər" qəzeti ilə birgə layihəsi əsasında "Şəhidlər ölməz, Vətən bölünməz!" silsiləsindən Qarabağ müharibəsində həlak olanların adlarının və xatirələrinin əbədiləşdirilməsi məqsədilə 10-dan çox kitab nəşr etdirib, həmin kitabların təqdimatını keçirib. Redaksiya,eyni zamanda, "Vətən daşı... və ya 44 günün dastanı" adlı layihə əsasında 8 sənədli film çəkib. Bu filmlər geniş ictimaiyyətə təqdim olunub. Redaksiyanınhazırladığı "Heydər Əliyev Xatirə Kitabının yaradıcısıdır" kitabı ümummilli lider Heydər Əliyevin 100 illiyi münasibətilə çap edilib, kitabda Ulu Öndərin həyat və fəaliyyəti geniş şəkildə xarakterizə olunub. Respublika Xatirə Kitabı yaddaşımızın tarix salnaməsidir və redaksiya dövlət başçısı İlham Əliyevin diqqət və qayğısı altında bugünkü və gələcək strateji işlərini də eyni məhəbbət və həvəslə davam etdirmək üçün əzmlə çalışır.
İradə SARIYEVA
