Hüseyn İbrahimov: “Bunun bir səbəbi onunla bağlıdır ki, Ermənistan ordusu 5 ildən çoxdur məğlubiyyət sindromu altındadır”
Ermənistan parlamentinin deputatı Ayk Sarqsyan ölkədə hərbi çağırışla bağlı ciddi problemlərin olduğunu bəyan edib. Onun sözlərinə görə, 2025-ci ildə çağırışçıların cəmi 30 faizi ordu sıralarına qoşulub.
Deputat bildirib ki, hər gün 10-dan çox hərbçi itirilir, ötən il isə 2800 gənc Ermənistan vətəndaşlığından imtina edib. Sarqsyan qeyd edib ki, bu vəziyyət xüsusilə xidmət edən hərbçilərin üzərinə əlavə yük salır və orduda gərginliyi artırır.
Maraqlıdır, Azərbaycanla Ermənistan arasında müharibə riski yoxdur. 2024-cü ilin fevralından bəri sərhəddə ölüm və yaralanma halı qeydə alınmayıb. Ötən ilin avqustunda Bakı ilə İrəvan sülh sazişinin bəndlərini paraflayıb. O zaman ermənilər niyə ordudan yayınır?
Sözügedən məsələni baki-xeber.com-a şərh edən İdarəçilik Akademiyasının müəllimi, sosioloq Hüseyn İbrahimovun fikrincə, Ermənistanda çağırışdan yayınma hallarının artması bir neçə səbəblə bağlı ola bilər: “Bunun bir səbəbi onunla bağlıdır ki, Ermənistan ordusu 5 ildən çoxdur məğlubiyyət sindromu altındadır. Ərazilərimiz işğal altında olanda belə bir saxta mif uydurmuşdular ki, guya Ermənistan ordusu, regionun ən güclü ordusudur və s. Halbuki, 90-cı illərdə bilavasitə xarici dəstək hesabına ərazilərimiz işğal edildi. 44 günlük Vətən müharibəsi və onun nəticələri bu mifi darmadağın etdi. Fikrimcə, əsasən bu səbəbdən ordudan yayınma artıb. Digər tərəfdən sosial-iqtisadi çətinliklər, təhlükəsizlik riskləri və cəmiyyətdə hərbi xidmətə münasibətin dəyişməsi buna öz təsirini göstərir. Eyni zamanda, vətəndaşlıqdan imtina edənlərin sayının artması ölkədə demoqrafik problemlər buna təsir edir. Problem həm də ondadır ki, Ermənistanda əhalinin sayı azalır, əmək qabiliyyətli əhali ölkəni tərk edir. Bu tendensiya davam edərsə, qarşıdakı illərdə problemlər daha geniş miqyasda özünü göstərəcək və geridönməz hal alacaq”.
Vidadi ORDAHALLI
