Rusiya prezidentinin mətbuat katibi Dmitri Peskov bildirib ki, Türkiyə Qara dənizdə təhlükəsizliklə bağlı təkliflər təqdim edib, lakin heç bir əsaslı danışıqlar aparılmır.
O, bunu, "İnterfaks"ın Türkiyə tərəfinin Qara dənizdə təhlükəsizliyin təmin edilməsi ilə bağlı təkliflərinin hazırda müzakirə olunub-olunmadığı ilə bağlı sualını cavablandırarkən deyib.
Kremlin sözçüsü Qara dənizdə təhlükəsizlik məsələsini "həqiqətən vacib" adlandırıb və qeyd edib ki, bu məsələ Ukrayna da daxil olmaqla bir çox dövlət tərəfindən "fəal şəkildə gündəmə gətirilir". O xatırladıb ki, Ukrayna "ABŞ və Türkiyə ilə əlaqəli xarici bayraqlar altında üzən ticarət gəmilərimizə, tankerlərimizə" qarşı zərbələr endirməyə başlayıb.
"Və əlbəttə ki, bu, Rusiya Federasiyasının cavab tədbirlərinə səbəb olub", - deyə o əlavə edib.
Kreml əvvəllər Türkiyənin Rusiya və Ukraynaya Qara dənizdə zərbələri azaltmağı təklif etdiyini təsdiqləmişdi. Rusiya və Türkiyə prezidentləri bu məsələni bu yaxınlarda Bişkekdə keçirilən görüşdə müzakirə ediblər.
"Əgər təhlükəsizliyin təmin edilməsindən danışırıqsa, bu, hərtərəfli bir həll yolu olmalıdır. Hazırda hər hansı bir ayrı-ayrı seqmentdə həll yollarını ayırd etmək çətindir. Bu, çox mürəkkəb danışıqlar tələb edir. Hərtərəfli bir həll yolu olmalıdır və biz də məhz bundan danışırıq" – deyə Peskov əlavə edib.
Tahir TAĞIYEV
