Abutalıb Səmədov: “İrana göstərdiyi əsas yardım kəşfiyyat məlumatların verilməsindən ibarətdir ki, bu məlumatlar əsasında da...”
Rusiya prezidentinin mətbuat katibi Dmitri Peskov bildirib ki, Rusiya İran ətrafındakı münaqişədə iştirak etmir, bu, onun müharibəsi deyil. “Rusiya bu hərbi əməliyyatların bir hissəsi deyil; bu, bizim müharibəmiz deyil", - deyə Peskov “India Today” qəzetinə verdiyi müsahibədə bildirib.
Rusiyanın bu müharibə ilə əlaqəsi hansı səviyyədədir?
“Alyans” SAM-ın sədri Abutalıb Səmədov baki-xeber.com-a bildirdi ki, Rusiya Amerika İran müharibəsində Peskovun dediyi kimi iştirak etmir. “Məlumdur ki, Rusiya ilə İran arasında strateji əməkdaşlıq haqqında müqavilə imzalanıb və bu müqavilədə nəzərdə tutulurdu ki, əgər hərbi münaqişə baş verərsə tərəflər düşmən dövlətin tərəfində iştirak etməyəcəklər. Yəni Rusiyanın İran tərəfindən hərbi əməliyyatlarda hansısa formada iştirak etmək öhtəliyi yoxdur. Öhtəlik ABŞ-a və İsrailə dəstək verməməkdir. Üstəlik, nəzərə almaq lazımdır ki, Rusiyanın özü kifayət qədər ağır vəziyyətdədir və onun özünün yardımlara ehtiyacı var. Ancaq bununla belə, aydındır ki, Rusiya İrana yaxından kömək edir və bu məsələni ABŞ-ın rəsmiləri də bir neçə dəfə dilə gətiriblər. Hətta xahiş ediblər ki, Rusiya İrana ilk növbədə kəşfiyyat məlumatları verməsin. Yəni Rusiyanın İrana göstərdiyi əsas yardım kəşfiyyat məlumatların verilməsindən ibarətdir ki, bu məlumatlar əsasında da İran ABŞ-ın bazalarına zərbələr endirib. İkinci yardım istiqaməti isə kibet təhlükəsizlik məsələləri ilə əlaqədardır. Yəni kiber müharibə texnologiyalarını Rusiya İrana verib və bundan da İran istifadə etməyə çalışıb. Bir də hər iki dövlətin bir ümumi problemi var ki, bu da sanksiyalardır”.
A.Səmədov qeyd edildi ki, Rusiyaya qarşı tətbiq olunan sanksiya artıq 25 mini də keçib, İrana bu qədər sanksiya tətbiq olunmasa da, kifayət qədər təsirli sanksiyalar tətbiq olunub. A.Səmədov vurğuladı ki, bu sansksiyalardan yan keçməkdə də Rusiyanın təcrübəsi böyükdür və bu təcrübəni İrana vermək üçün zəruri addımlar atılıb. “Bir də Rusiyanın İrana göstərə biləcəyi ən böyük yardım BMT Təhlükəsizlik Şurasında İrana qarşı qəbul olunan, yaxud qəbul olunması planlaşdırılan qətnamələrin qarşısını almaqdır ki, bu məsələdə də Rusiya İrana yardım göstərməyə çalışır. Aprelin 7-də BMT Təhlükəsizlik Şurasında Hörmüz boğazında və ətrafında təhlükəsiz gəmiçiliyin təmin olunması məsələsi ilə bağlı Bəhreynin təqdim etdiyi layihə səsə qoyularkən Rusiya və Çin bunun əleyhinə səs verdi və qətnamənin qəbul olunmasına imkan vermədi. Bu təbiidir ki, Rusiyanın İrana diplomatik yardımının bir nümunəsidir. Rusiya İranın uranı zənginləşdirmək istəyinə dəstək verir, 60 faiz zənginləşmiş uranın Rusiya ərazisinə gətirilməsini qəbul edir, İran da bunu qəbul edir, istəyir. Yəni birlikdə əlaqəli şəkildə faəliyyət göstərirlər. Ancaq müqavilədə nəzərdə tutulduğu kimi Rusiyanın İranla birlikdə hərbi əməliyyatlara qoşulmaq, ona dəstək vermək öhtəli yoxdur”-deyə A.Səmədov bildirdi.
İradə SARIYEVA
