Ramil Məmmədli: “Ukrayna təslim olsa növbəti hədəfin Avropa olacağından qorxurlar”
NATO Avropa İttifaqının (Aİ) kreditinə əlavə olaraq Ukraynaya 60 milyard dollar hərbi yardım verəcək. Bu barədə NATO-nun Baş katibi Mark Rütte Berlində Ukraynanın müdafiəsi üzrə təmas qrupunun iclasının əvvəlində bildirib. Qeyd olunub ki, NATO dövlətlərindən vəsaitlər artıq 2026-cı ildə daxil olacaq.
Rüttenin sözlərinə görə, maliyyələşdirmədə prioritet hava hücumundan müdafiəyə, dronlara və uzaqmənzilli döyüş sursatlarına veriləcək.
Almaniyanın müdafiə naziri Boris Pistorius bəyan edib ki, dünyanın diqqəti Yaxın Şərqə və Hörmüz boğazının açılması səylərinə yönəlsə də, bu, Ukraynaya hərbi dəstəyin zəifləməsinə gətirib çıxarmayacaq.
Bir sözlə, Ukraynaya hərbi yardımla bağlı Ramşteyn əlaqə qrupunun iclasında Avropa ölkələri Ukraynanın təkcə hava müdafiəsini gücləndirmək üçün 4 milyard dollar və PUA-lar üçün 1,5 milyard dollardan çox vəsait ayırmağı öhdələrinə götürüblər. Almaniya hava hücumundan müdafiənin gücləndirilməsinə 4 milyard dollar sərmayə qoyur. Daha 600 milyon dollar dərin və orta zərbə qabiliyyətlərinin inkişafına ayrılacaq. İspaniya SAFE çərçivəsində 215 milyon dollar ianə edir və əlavə “Patriot” raketləri ilə hava hücumundan müdafiəni gücləndirir. Britaniya müdafiə naziri Con Healey isə Ukraynaya 120.000 dron çatdırıldığını bəyan edib.
Adətən bundan əvvəl belə proqnozlar səslənirdi ki, Yaxın Şərqdəki müharibə Ukraynaya dəstəyi zəiflədəcək. Ancaq son Ramşteyn toplantısı göstərdi ki, Ukraynaya dəstək azalmayacaq. Əksinə, Avropa Ukraynaya dəstəyi gücləndirəcək. Üstəlik, Kanada da bu prosesdə iştirak edir. Nəzərə almaq lazımdır ki, NATO üzvü olan Avropa ölkələrinin heç biri Yaxın Şərq müharibəsində hərbi baxımdan demək olar iştirak etmir. ABŞ-ın yanında deyillər, bazalarından istifadəyə icazə vermirlər. Bütün vasitələrlə göstərirlər ki, Ukraynanın hərbi təchizatı artacaq.
Sözügedən məsələni baki-xeber.com-a şərh edən hərbi ekspert Ramil Məmmədlinin fikrincə, Ukrayna məsələsində Avropa dövlətlərinin belə həmrəylik göstərməsi Rusiyadan olan qorxu ilə əlaqədardır: “Məsələ ondadır ki, Tramp ikinci dəfə prezident olandan sonra ABŞ dövləti hesabına Ukraynaya hərbi yardım dayandırıldı. Bütün yardımları Avropa İttifaqı öz üzərinə götürdü. Hazırda Birləşmiş Ştatlar Ukraynaya yalnız kəşfiyyat dəstəyi verir. Ola bilsin həmin dəstək də dayandırılsın. Avropa ABŞ-ın Rusiya-Ukrayna müharibəsində sərgilədiyi mövqedən narazıdır. Elə bu səbəbdən İranla müharibədə Aİ ABŞ-ın yanında olmadı. Hətta Avropa ölkələrində yerləşən NATO bazalarından ABŞ-ın istifadə etməsinə razılıq verilmədi. Bütün bunlar Avropa ilə Birləşmiş Ştatlar arasında münasibətlərin pisləşməsini göstərir. İndiki məqamda Avropa Ukraynanın silahlanmasına ona görə diqqəti artırır ki, özünü qorumaq istəyir. Çünki Ukrayna təslim olsa növbəti hədəfin Avropa olacağından qorxurlar. Əvvəl elə idi ki, ABŞ Avropanı qoruyurdu. Tramp prezident olandan sonra artıq Avropa üzərində bu qalxan praktiki olaraq yoxdur. NATO mövcud olsa da, ABŞ-ın öz öhdəliklərinə sadiq qalacağına inanmırlar. O üzdən, Ukrayna Avropa üçün ölüm-qalım məsələsinə çevrilib. Ukraynaya dəstəyin artırılması o deməkdir ki, müharibə uzanacaq”.
Vidadi ORDAHALLI
