Ermənilər “Maşa və ayı” filminin Azərbaycan nağılları əsasında çəkilmiş hissələrini sildirib...

img

Erməni təxribatının sınırı yoxdur. Harada əllərinə imkan düşürsə, bundan Azərbaycana qarşı istifadə edirlər, özü də çox iyrənc, özlərinə yaraşan formada. Onlar o qədər həyasızdırlar ki, hətta Rusiyanın Azərbaycanla bağlı mədəniyyət layihələrinə qarşı da iyrəncliklər törətməkdən çəkinmirlər.

Bildiyimiz kimi, ermənilər Rusiyanın çəkdiyi populyar “Maşa və Ayı” cizgi filminin Azərbaycan buraxılışını rəsmi YoTube-dən sildiriblər. Avqustun əvvəlində “Cırtdan” xalq nağılı əsasında hazırlanan bölümü Rusiyada fəaliyyət göstərən erməni diasporu nümayəndələrinin, Ermənistan vətəndaşlarının şikayətləri əsasında platformadan qaldırılıb. 

Qeyd edək ki, cizgi filmində Azərbaycanın milli mətbəxində olan təndir çörəyi, paxlava, şəkərbura, dolma göstərilmiş, o cümlədən məşhur “Cücələrim” mahnısı da səsləndirilmişdi. 

Bizim mədəniyyəti, mətbəxi, folkloru təbliğ edən bir nümunənin erməni təxribatının qurbanı olması narahatedicidir. Maraqlıdır ki, cizgi filmini çəkən kompaniya buna hələ reaksiya verməyib.

  • Aygün Bünyadzadə: “Ermənilər bizim “Cırtdan”ımızdan belə qorxduqları üçün cizgi filmini sildiriblər”

Tanınmış uşaq yazıçısı Aygün Bünyadzadə “Bakı-Xəbər”ə bildirdi ki, ermənilər “Maşa və Ayı” cizgi filminin Azərbaycan buraxılışını rəsmi YoTube-dən sildirsələr də, başqa platformalardan sildirə bilməyiblər. “Mən saytlardan birində bu cizgi filminə baxdım, ermənilər bunu Yotube-dən sildirsələr də, başqa platformada qalıb. Ermənilər tərəfindən “Maşa və Ayı” cizgi filminin Azərbaycan buraxılışını sildirilməsi təsadüfi deyil, çünki bu cizgi filnmində bizim tariximiz, folklorumuz, adət-ənənələrimiz var. Bu cizgi filminin Azərbayacan nağılı “Cırtdan”ın motivləri əsasında çəkilən hissəsində erməniləri narahat edən, qorxudan məqamlar olub. Ermənilər bizim “Cırtdan”ımızdan belə qorxduqları üçün cizgi filmini sildiriblər. Bu bizim balaca “Cırtdan”ımızın qələbəsi deyilmi? Əlbəttə, qələbəsidir. Bilirsiz, hər xalqın özünün kiçik nağıl qəhrəmanları olub, bizim nağıl qəhrəmanlarımızdan da biri Cırtdandı. Ermənilərin isə Cırtdanı yoxdur. 44 günlük müharibədə bizə məğlub olan ermənilər bizim möhtəşəm tariximizdən, folklorumuzdan, nağıl qəhrənlarımızdan, hətta milli adət-ənənələrimizdən, şirniyyatlarımızdan da qorxurlar. Çünki cizgi filminin bizə aid olduğu hissədə bizim milli adət-ənənələrimiz, milli mətbəximiz, musiqimiz və sair var”.

A.Bünyadzadə hesab edir ki, ermənilər  cizgi filmini sildirməklə öz qorxaqlıqlarını, bizim uşaqlardan belə qorxduqlarını etiraf ediblər. A.Bünyadzadənin fikrincə, Youtube populyar “Maşa və Ayı” cizgi filminin Azərbaycan buraxılışını rəsmi olaraq bərpa edəcək, çünki bu cizgi filminə bütün dünyada baxılır.

  • Sevinc Nuruqızı: “Bu gözlənilməz deyildi, çünki “Maşa və Ayı” cizgi filminin Azərbaycan buraxılışında Azərbaycan həqiqətləri vardı, Azərbaycanın xəritəsi, milli mətbəxi...”

Digər tanınmış uşaq yazıçısı Sevinc Nuruqızı da bizimlə söhbətində bildirdi ki, “Maşa və Ayı” cizgi filminin Azərbaycan buraxılışına baxıb və bunu çox sevib. “Düzdür, orada bizim “Cırtdan” nağılımız bir az təhrif olunmuşdu. Başqa xalqların da cırtdan nağıl qəhrəmanları var. Xalqlar və onların cırtdan qəhrəmanları haqqında bir yazım da olmuşdu. Bu cizgi filmində bizim adət-ənənələrlə, folklorumuzla, həyat tərzimizlə bağlı müəyyən nüanslar vurğulanıb. Məsələn, burada ermənilərin illərdir iddia etdiyi dolma da daxil olmaqla, başqa milli mətbəx nümunələrimizin adları çəkilib. Nağılın süjeti təhrif olunsa belə, burada müsbət məqamlar çox idi.   Populyar “Maşa və Ayı” cizgi filminin Azərbaycan buraxılışında Azərbaycanın xəritəsi də verilib. Bu cizgi filminə sonra da baxmaq istədim, amma Youtube-də tapa bilmədim. Bu cizgi filminə zəhmət və vəsait xərclənib, eyni zamanda görünür ki, o cizgi filmini çəkən heyətdə Azərbaycanı ürəkdən sevən bir adam olub və o seriyanın birini Azərbaycana, Azərbaycan nağılı “Cırtdan”a həsr etdirib. Ermənilərin bu təxribatı “Maşa və Ayı” cizgi filminin Azərbaycan buraxılışının itirilməsi demək deyil, bunu yenidən üzə çıxarmaq və yaymaq, Youtube-də yerləşdirmək olar.

Bu, təbii ki, ermənilərin məkrli siyasəti və davranışıdır. Bu gözlənilməz deyildi, çünki “Maşa və Ayı” cizgi filminin Azərbaycan buraxılışında Azərbaycan həqiqətləri vardı, Azərbaycanın xəritəsi, milli mətbəxi, folkloru, musiqisi göz önünə gətirilirdi. Ermənilər isə bu həqiqətin yayılmasından çox qorxurlar”.

S.Nuruqızı deyir ki, ya “Azanfilm”, ya “Azərbaycanfilm”, ya da ki, digər aidiyyəti qurumlar o seriyanı əldə edə bilər, əsas odur, seriya çəkilib, var, onu yenidən Youtube-də yerləşdirmək mümkündür. S.Nuruqızı hesab edir ki, erməni təxribatı həmişə gözləniləndir və biz ayıq-sayıq olmalıyıq.

İradə SARIYEVA

Son xəbərlər