Beynəlxalq kino festivalları təsis ediləndə, ola bilsin, mədəniyyətə, kinoya dəyər vermək üçün yaradılıb, amma son 20-30 ildə açıq görünən odur ki, bu festivallar kimlər üçünsə siyasi alətə çevrilir. Beynəlxalq Kann Film Festivalından da siyasi məqsədlər üçün istifadə edildiyinin dəfələrlə şahidi olmuşuq. Fransada 74-cü Beynəlxalq Kann Film Festivalı başlayıb.
Amerikalı aktrisa Codi Foster Kann Film Festivalında "Qızıl Palma budağı" fəxri mükafatını qazanıb. Aktrisaya bu mükafatı ispaniyalı rejissor Pedro Almodovar təqdim edib. Festivalın baş direktoru Tyerri Fremo bildirib ki, bu Fosterin Kann Film Festivalında qazandığı 9-cu mükafatdır.
“Sputnik Azərbaycan”ın xarici mətbuata istinadən verdiyi xəbərə görə, festival 6-17 iyul tarixləri arasında keçirilir. Festivalın builki münsiflər heyətinə amerikalı rejissor Spike Lee sədrlik edir. Festivalda yalnız həmin ölkə tərəfindən təsdiqlənmiş vaksini vurduran şəxslər iştirak edirlər. Bundan başqa, festivalda iştirak etmək istəyənlər 48 saat əvvəl koronavirus (COVID-19) testindən keçməlidirlər.
Xatırladaq ki, film festivalı ötən il pandemiya səbəbindən təxirə salınmışdı. Amerikalı Spayk Linin (Spike Lee) sədrlik edəcəyi münsiflər heyəti hələ açıqlanmayıb. Bu haqda ötən ay Kann Festivalının səlahiyyətli nümayəndəsi Tyeri Fremo mətbuat konfransında bildirmişdi. Qeyd edib ki, "Kann premyeraları" (Cannes Premiers) adlı yeni seksiyanın yaradılması festival həyatında ilkdir.
Azərbaycan kinosunun Kann Festivalına qatılacağı haqqında məlumata rast gəlmədik, bu səbəbdən də məsələni araşdırmaq qərarına gəldik. Bu o Kann Festivalıdır ki, hər il ermənilər bu festivalda Azərbaycan əleyhinə təbliğatla məşğul olurlar, Qarabağla bağlı saxtakarlıq dolu filmləri nümayiş etdirirlər.
Ermənilərin 73-cü Beynəlxalq Kann Festivalında təqdim etdiyi “Əgər külək olsa” filmi Azərbaycan əleyhinə çirkin təbliğata çevrilmişdi. Bu, hər kəsin xatirindədir. Ermənilərin ötən illərdə olduğu kimi, bu il də Kann Festivalında meydanı ələ alacağı istisna deyil, çünki hər il Azərbaycan kinematoqrafının bu məsələyə barmaqarası yanaşması ermənilərin meydanını genəldir.
Ekspertlər bildirirlər ki, Azərbaycan 44 günlük müharibədən qalib çıxıb və bu gün Azərbaycan kinosunun Kann Festivalında söz demək haqqı daha böyükdür. İllər boyu ermənilərin əleyhimizə çəkdikləri filmlərin təbliğat meydanına çevrilən Kann Festivalında Azərbaycanın bu il də iştirak etmədiyini deyən ekspertlərin sözlərinə görə, bunun iki səbəbi var, birincisi pandemiyadır, ikincisi isə Kann Festivalı üçün ayrıca filmin çəkilməməsidir. Ekspertlər deyirlər ki, Azərbaycanın, yaxud bir başqa ölkənin hər il Kann Festivalında iştirak etmək kimi öhdəliyi yoxdur. Ekspertlər bildirirlər ki, pandemiya ilə bağlı dünyada istehsalat az olub.
Burada əsas problemlərdən biri Kannda Azərbaycan pavilyonunun olmamasıdır. Hər il Kannda Azərbaycan pavilyonunun olduğunu deyən ekspertlər qeyd etdilər ki, bu gün o pavilyon yoxdur. Kandda Azərbaycan pavilyonunun olmaması ilə bağlı qərar isə sabiq mədəniyyət naziri Əbülfəs Qarayevin rəhbərliyi dövründə verilib, səbəbi isə aydın deyil.
Fakt budur ki, bu il Azərbaycan kinosu Kann Festivalında təmsil olunmayacaq, səbəbini isə Mədəniyyət Nazirliyi bilir. Azərbaycanın 74-cü Beynəlxalq Kann Kino Festivalına hansı səbəbdən qatılmadığına, burada Azərbaycan pavilyonunun qurulmadığına aydınlıq gətirilməsi üçün Mədəniyyət Nazirliyinə göndərdiyimiz sorğuya yazı çapa hazırlanana qədər heç bir cavab verilmədi. Bu səbəbdən də nazirliyin rəsmi cavabını təqdim edə bilmədik.
İradə SARIYEVA
