“Yada düşdü”nün 10 illiyi ilə bağlı ilk tədbir jurnalın ilk mərhum baş redaktoru, yazıçı Nahid Hacızadəyə həsr edildi... - FOTO

img

“On il bundan əvvəl Nahid müəllimdən xahiş etdim ki, ay Nahid müəllum, “Xatirə kitabı”na görün nə qədər müraciətlər olur, onların hamısı da yaddan çıxmaqdan qorxur. Hətta elə insanlar var ki, ulu babalarını arayıb-axtarıb tarixə salmaq istəyirlər, mənim də könlümdən bir jurnal təsis etmək və adını da “Xatirələr” qoymaq keçir.

Nahid müəllim də həmin vaxt “Yada düşdü” adlı kitabını çapa hazırlayırdı, dedi ki, jurnalın adı “Yada düşdü” olsun. Amma bununla yanaşı, mənə jurnal nəşr etməyin necə çətin, məşəqqətli olduğunu dedi və israr etdi ki, bu işə könül verməyim. Amma mən düz bir il Nahid müəllimin jurnalın nəşrinə razılıq verməsi üçün az qala hər gün bu mövzuda söhbət saldım. Axırda gedib, aidiyyəti orqanlara müraciət edib jurnalı qeydiyyatdan keçirdim və jurnalın baş redaktoru Nahid müəllim oldu. Çünki baş redaktorluğa özünün icazəsini almışdım. Dedim, ay Nahid müəllim, jurnal qeydiyyatdan da keçib, nəşrə dövlət icazə verib. Belə oldu ki, bu jurnal ərsəyə gəldi və bu jurnalın ocağı başına çox gözəl, istedadlı insanlar yığışdılar”. Bu sözləri görkəmli yazıçı-jurnalist, dramaturq Nahid Hacızadənin 85 illik, “Yada düşdü” ədəbi-bədii nostalji jurnalının 10 illiyinə həsr edilmiş yığıncaqda Respublika “Xatirə kitabı” redaksiyasının baş redaktoru, “Yada düşdü” jurnalının təsisçisi və baş redaktoru, tanınmış şairə Nəzakət Məmmədova bildirib.

Yığcam, lakin zəngin olan tədbirdə ölkəmizin görkəmli ədəbiyyat, jurnalistika, söz-sənət insanları iştirak edirdilər. Yazıçı-publisist Yasif Nəsirlinin, tanınmış hərbi jurnalist, tədqiqatçı Şəmistan Nəzirlinin, şair Şöhlət Əfşarın, Əməkdar jurnalist, şair Əbülfət Mədətoğlunun, “Kredo” qəzetinin baş redaktoru Əlirza Xələflinin, şair Balayar Sadığın, tanınmış jurnalist Vasif Quliyevin Nahid Hacızadə ilə bağlı isti və səmimi  xatirələri, on il müddətində “Yada düşdü”nün oxucuların ürəyində özünə birmənalı olaraq yuva qurduğunu dedilər.

  • Nəzakət Məmmədova: “On il bundan əvvəl Nahid müəllimdən xahiş etdim ki...”

Nəzakət Məmmədova söhbətini davam etdirərək üzünü Yasif Nəsirliyə tutaraq, “Yasif müəllim, yadınıza gələr, siz jurnalın ilk redaksiya heyətinə daxil olanlardansınız. Sonradan rəhmətlik Oqtay Rza, İlyas Tapdıq, Fərqanə Mehdiyeva və başqaları bu jurnala gəldi və xatirələrini qoyub getdilər. Bu jurnalın ilk sayı çap olunandan sonra onu götürüb Nahid müəllimlə birgə Yazıçılar Birliyinin sədri Anar müəllimin yanına getdik, Anar müəllimlə Fikrət Qoca otaqda oturmuşdular. İkisi də jurnala baxıb dedilər ki, gözəl jurnaldır, boyalı, bərli-bəzəkli, amma başqa jurnallar kimi bu da uzaq başı bir il davam edər. Anar müəllim və Fikrət Qoca “Yada düşdü”nün ömrünü bir il qoymuşdular. Amma bu gün o birin yanına bir sıfır da artırılıb. Mən çox sevinirəm. Bu on il nə tez gəldi... Zaman bizi aldadıb... Allaha çox şükür ki, bu günə gəlib çıxdıq. Nahid müəllim, Allah sizə qəni-qəni rəhmət eləsin. Ömrümün 19 ilini Nahid müəllimlə çiyin-çiyinə çalışmışam. Mən ata görməmişəm, 6 yaşımda atamı itirmişəm. Amma Nahid müəllimi ata gözündə görmüşəm. O həmişə mənə deyirdi ki, qızım səninlə yaşıddır, elə bil ki, atan mənəm. Mən inanıram ki, atam yaşasaydı, elə Nahid müəllim kimi bir şəxsiyyət olardı...”.

  • Əbülfət Mədətoğlu: “Dünəndən bu ana qədər mən jurnalı içimdə vərəqlədim”

Əməkdar jurnalist, şair Əbülfət Mədətoğlu dedi ki, Nəzakət xanım ona zəng vurub “Xatirə kitabı” redaksiyasına dəvət edəndə səbəbini soruşmayıb, çünki səbəb ona aydın olub. “Səbəbini ona görə soruşmadım ki, Nahid müəllimin 85, jurnalın isə 10 yaşının tamam olduğunu bilirdim. Çünki Nahid müəllimin 75 illik yubileyində biz “Yada düşdü”nün xeyir-duasını “Ədalət” qəzetində verdik.

İnanın ki, dünəndən bu ana qədər mən jurnalı içimdə vərəqlədim. Çünki bu jurnalda mənə də səxavətlə yer verilib, mənim göndərdiyim, bəzən də göndərmədiyim, lakin yaradıcı qrupun özünün seçib təqdim etdiyi kifayət qədər yazım olub... “Yada düşdü” çoxsaylı müəllifdən biri kimi məni də yaddaşına yazıb, yüz ildən sonra bu jurnal vərəqlənəndə o müəlliflərin içində mən də yada düşəcəyəm. “Yada düşdü”yə həmişə yada düşmək və yaşamaq diləyirəm”.  

  • Yasif Nəsirli: “Həmişə böyük həvəslə bu jurnalın çapdan çıxıb gələcəyi günü gözləyirəm”

“Mən “Yada düşdü” jurnalının ilk nömrəsindən ona abunəçiyəm. Həmişə böyük həvəslə bu jurnalın çapdan çıxıb gələcəyi günü gözləyirəm, bu jurnalda elə bir yazı yoxdur ki, onu axıra qədər oxumayım. Böyük həvəslə oxuyuram, bu yazılar məni keçmişə qaytarır, gələcək haqqında nəsə fikirləşməyə vadar edir. Çünki bu yazıları oxuyanda sevinirəm. Nəzakət xanım, “Yada düşdü” oxucular arasında çox böyük sevgi qazanıb”. Bu sözləri isə yazıçı-publisist Yasif Nəsirli bildirdi.

O qeyd etdi ki, N.Hacızadə ilə yaxın dost və aralarında çox isti, səmimi münasibətlər olub.

Y.Nəsirlinin çıxışından sonra N. Məmmədova “jurnalın 10 yaşı, əslində, oktyabrda olmalı idi. Jurnalın 10 illiyi münasibətilə on tədbir keçirəcəyik və bölgələrdə də tədbirlərimiz olacaq. Amma, bildiyiniz kimi, Nahid müəllimin 85 yaşı tamam olur və qərara aldıq ki, “Yada düşdü” jurnalının 10 illiyi ilə bağlı ilk tədbiri N.Hacızadənin 85 illiyinə həsr edək. Beləliklə, birinci tədbirimiz Nahid müəllimin yubileyinə həsr olunub” - deyə bildirdi.

Sonra sözü şair Şöhlət Əfşara verdi. Ş.Əfşar bildirdi ki, jurnalın məzmunu, mahiyyəti, yönü, istiqaməti hamısı bir-birilə uyğunluq təşkil edir və “Yada düşdü” başqa dərgilərdən yerlə-göy qədər fərqlənir. “Yada düşdü”nün oxucularının Azərbaycanın hər yerində olduğunu deyən Ş.Əfşar qeyd etdi ki, jurnalda onun da yazıları çıxır. Ş.Əfşar söylədi ki, “Yada düşdü” Cənubi Azərbaycanda Hüseyn Şərqinin baş redaktorluğu ilə nəşr olunan “Körpü” dərgisi ilə qardaşlaşıb və qarşılıqlı olaraq yazıları nəşr edirlər.

  • Şəmistan Nəzirli: “Təsəvvür edin ki, mən Xınalıqda belə “Yada düşdü” jurnalı ilə qarşılaşmışam”

Hərbi jurnalist Şəmistan Nəzirli də qeyd etdi ki, N.Hacızadə ilə həm keçmişdə iş yoldaşı olublar, həm də yaxın dost. “Yada düşdü” jurnalının ilk saylarından redaksiya ilə yaxından əməkdaşlıq etdiyini deyən Ş.Nəzirli bildirdi ki, ilk dəfə burada Səməd Vurğunun ilk məhəbbətinə həsr olunmuş maraqlı bir yazı ilə çıxış edib. “Təsəvvür edin ki, mən Xınalıqda belə “Yada düşdü” jurnalı ilə qarşılaşmışam. Çox sevinmişəm ki, mənim yazılarımı oxucular bu jurnaldan da oxuyurlar. Bundan başqa, çox arzu edərdim ki, jurnal tədqiqata cəlb olunsun və onun əsasında elmi iş yazılsın, çünki bu jurnal tədqiq edilib öyrənilməyə layiqdir” - deyə Ş.Nəzirli dedi.

  • Əlirza Xələfli: “Demək istəyirəm ki, “Yada düşdü” bir düşüncə antologiyasıdır, düşüncə məcmuəsidir”

“Kredo” qəzetinin baş redaktoru Əlirza Xələfli isə “demək istəyirəm ki, “Yada düşdü” bir düşüncə antologiyasıdır, düşüncə məcmuəsidir. On il böyük rəqəmdir. “Yada düşdü” əbədi yaşayacaq ömür qazanan dəyərli söz abidəsidir” - deyə bildirdi.

  • Balayar Sadıq: “Nəzakət xanım bir xeyirxahlıq, bir vəfa simvoludur”

Şair Balayaq Sadıq isə həm N.Hacızadənin işıqlı xatirəsindən, həm də N.Məmmədovanın N.Hacızadəyə bir övlad qayğısı göstərməsindən, onun ruhuna ehtiram və hörmətindən danışdı. Bildirdi ki, N.Məmmədova N.Hacızadəyə, sözün həqiqi mənasında, vəfa borcunu həmişə yüksək səviyyədə yerinə yetirib: “Nəzakət xanım bir xeyirxahlıq, bir vəfa simvoludur. O, yalnız Nahid müəllimə münasibətdə deyil, bütün sahələrdə, bütün məsələlərdə nümunəvi olub. Belə gözəl jurnal nəşr edir və onun nəşrini davam etdirir”.

Tanınmış jurnalist Vasif Quliyev də N.Hacızadə haqqında xatirələrini danışdı, “Yada düşdü” jurnalının ədəbi dünyamızda oynadığı rola toxundu.   

N.Məmmədova sonda qeyd etdi ki, indiyə qədər jurnalın 41 sayı işıq üzü görüb.

“Yada düşdü” jurnalı yaddaşımızın istinad yerlərindən biri kimi yüzillər sonra da insanların müraciət edəcəyi bir jurnaldır.

İradə SARIYEVA

Son xəbərlər