Azərbaycan Yazıçılar Birliyi digər yaradıcı təşkilatlardan fərqli olaraq, hər zaman müzakirə obyekti olaraq qalmaqdadır. Bu qurumda miqyasından asılı olmayaraq, baş verən istənilən hadisə müzakirə mövzusuna çevrildiyi kimi, baş verməsi gözlənilən olaylar da saf-çürük edilir.
Bu gün təkcə ədəbi ictimaiyyəti deyil, elə cəmiyyətin digər təmsilçilərini də maraqlandıran məsələlərdən biri AYB-nin növbəti qurultayının hansı səbəbdən keçirilməməsidir.
Bir məqamı da vurğulayaq ki, AYB-nin ali orqanı olan qurultay beş ildən bir çağırılmalı olsa da, bu qurumun qurultayı heç vaxt zamanında keçirilməyib. Qurumun sonuncu qurultayı 7 il əvvəl - 2014-cü ildə keçirilib.
Keçən il qurultayın keçiriləcəyi elan edilsə də, sonradan məlum olmayan səbəblərdən qurultay keçirilmədi. Halbuki, qurultayın keçirilməsi keçən ilin mart-aprel aylarına təsadüf etməli idi. Amma qurumun XIII qurultayı keçirilmədi. Belə fikirlər vardı ki, pandemiya ilə əlaqədar qurultay 2020-ci ilin oktyabr ayında baş tutacaq, o da olmadı.
AYB-nin növbəti qurultayının nə zaman keçiriləcəyi müzakirə mövzusudur.
Xalq yazıçısı, Azərbaycan Yazıçılar Birliyinin (AYB) sədri Anar mətbuata deyib ki, pandemiya bitən kimi AYB-nin qurultayı keçiriləcək. O bildirib ki, pandemiya ilə əlaqədar 10 nəfərdən artıq yığışmağa icazə verilmir: “Yazıçılar Birliyi isə 10 nəfərlə qurultay keçirə bilməz”.
AYB-nin qurultayının keçirilməsinə pandemiya mane olur?
Ekspertlər deyirlər ki, onsuz da bütün dünya pandemiyadan əziyyət çəkir və pandemiya üzündən də heç bir beynəlxalq əhəmiyyətli tədbir təxirə düşməyib, zirvə görüşləri, konfranslar, iclaslar videoformatda olsa da keçirilir.
Aydın Xan Əbilov: “AYB-nin qurultayının keçirilməməsi...”
Yazıçı Səxavət Sahil hesab edir ki, AYB rəhbərliyi qurultay keçirməmək üçün hər dəfə bir bəhanə gətirir: “AYB həmişə müxtəlif bəhanələr gətirməklə qurultayın vaxtını uzatmaqla məşğuldur. Bu gün YAP qurultay keçirir, amma AYB qurultayı yubatmaqla məşğuldur. Halbuki, YAP-ın üzvlərinin sayı AYB-nin üzvlərinin sayından daha çoxdur. AYB ölkədə aparılan yenilənmə və islahatlar tendensiyasına cavab vermir, özünün köhnə siyasətini davam etdirir. Koronaviris qaydaları çərçivəsundə qutultay keçirilə bilər. Artıq bunun örnəyi var və YAP hakim partiya olaraq bunu bu gün edir.
Görünür, AYB vaxt udmaqla, öz köhnə idarəçiliyini davam etdirmək istəyir. Təcili qurultay keçirilməli, AYB yenilənməli və rəhbərliyində gənclər təmsil olunmalıdır. Həmçinin, AYB-nin orqanı olan və dövlət büdcəsindən maliyyələşən “Ədəbiyyat qəzeti” və “Azərbaycan” jurnalı kimi köhnəlmiş ədəbi orqanlar yenilənməlidir” - deyə S.Sahil qeyd etdi.
Yazıçı-kulturoloq, AYB üzvü Aydın Xan Əbilov isə hesab edir ki, AYB öz tarixində bir neçə dəfə öz qurultayını vaxtında keçirə bilməyib. “Bu normal haldır. Yəni pandemiya dövründən əvvəlki illərdə də biz AYB-nin qurultaylarının gecikməsinin şahidi olmuşuq. Azərbaycan Yazıçılar Birliyi o biri yaradıcı qurumlara rəğmən kifayət qədər güclü fəaliyyət göstərir. Bilirsiniz ki, AYB-nin “Ədəbiyyat”, “Mir literaturı” qəzetləri, “Dünya ədəbiyyatı” jurnalı, klassik jurnallardan “Azərbaycan”, “Ulduz”, “Qobustan”, “Literaturnıy Azerbaydjan” dərgiləri çap olunur, həmçinin də saytları fəaliyyət göstərir. Düzdür, bunlar hamısı dövlət büdcəsindən maliyyələşdirilir, amma təşkilati məsələlər Yazıçılar Birliyinin üzərindədir. AYB-nin rəhbərliyində bizim ağsaqqal Xalq yazıçılarımız, Xalq şairlərimiz təmsil olunurlar. Onlar pandemiya dövrünün qadağalarına uyğun olaraq, həm məsafəli şəkildə, həm də həftədə bir neçə dəfə birliyə gəlməklə qurumun fəaliyyətini tənzimləyirlər. Amma, əlbəttə, bütün sahələrdə olduğu kimi, Yazıçılar Birliyinin fəaliyyətində də yeni dövrün tələblərinə uyğun olaraq, bir yeniləşmə, islahat getməlidir. Mən inanıram ki, qurultay bu islahatların başlanğıcı olacaq. Yazıçılar Birliyinin rəhbərliyində kimin olmasından asılı olmayaraq, Azərbaycan dilinin, ədəbiyyatının, mənəviyyatının, milli-mənəvi ruhumuzun keşiyində duran bir təşkilatdır, təsisatdır. Ona qarşı olan hər hansı bir hücum birbaşa Azərbaycan xalqına, Azərbaycan dövlətçiliyinə olan hücumdur”.
A.X.Əbilov hesab edir ki, AYB üzvlüyündə kifayət qədər istedadlı adamlar təmsil olunur və AYB-nin özü sırf peşəkarlar tərəfindən idarə olunur. “Fikrət Qoca, Çingiz Abdullayev, İlqar Fəhmi, Rəşad Məcid və AYB-nin katibləri olan digər dostlarımız qurultayda seçilir. Anar müəllim növbəti qurultayda yenə də namizədliyini verərsə, güman ki, yazıçıların böyük əksəriyyəti onu dəstəkləyəcək. Amma adlarını sadaladığım hər bir katib, xüsusən də mən Çingiz Abdullayevin adını çəkmək istəyirəm, AYB sədri vəzifəsi daşımağa peşəkarlıq baxımından tam hazırdırlar. Anar müəllim çox böyük bir məktəb yaradıb. İnanıram ki, dəyişiklik olsa, yazarlarımız AYB rəhbərliyində peşəkar, təşkilatçı, dünyada və Azərbaycanda tanınan Çingiz Abdullayevi görmək istərdilər. AYB-nin qurultayının keçirilməməsi yalnız bu qurumun özü ilə bağlı deyil. Bir də ki, Azərbaycanda gündə tədbir, qurultay keçirən partiyalar, təşkilatlar var ki, onların ölkəmizə heç bir faydası yoxdur. Amma AYB öz fəaliyyəti, nəşr etdiyi jurnal və qəzetlərlə, müxtəlif nəşrləri ilə, sosial şəbəkələrdəki işlək səhifələri ilə Azərbaycan ədəbiyyatının, Azərbaycan mədəniyyətinin, incəsənətinin, tarixinin, dilinin inkişafına güclü təkan verir. Bilirsiniz ki, AYB 44 günlük Vətən müharibəsi dövründə də çox fəal oldu”.
A.X.Əbilov hesab edir ki, birliyin orqanları 44 günlük müharibədə qazandığımız zəfəri layiqincə təbliğ etdilər və gözəl nümunələr təqdim olundu.
İradə SARIYEVA
