Zakir Əhmədov: “Bu da büdcəyə daxilolmaların həcmini artıracaq”
2018-ci il üçün dövlət büdcəsinin gəlirləri 20,127 milyard manat həcmində proqnozlaşdırılır. Bu da ümumdaxili məhsulun 29 faizi həcmində olmaqla, 2017-ci ilin təsdiq edilmiş proqnozu ilə müqayisədə 3,361 milyard manat və ya 20 faiz, 2016-cı ilin faktiki icra göstəricisi ilə müqayisədə isə 2,621 milyard manat və ya 15 faiz çoxdur.
2018-ci il dövlət büdcəsinin gəlirləri üzrə proqnozun 7,907 milyard manatı və ya 39,3 faizi Vergilər Nazirliyinin xətti ilə daxilolmaların, 9,216 milyard manatı və ya 45,8 faizi Dövlət Neft Fondundan transferin, 2,43 milyard manatı və ya 12,1 faizi Dövlət Gömrük Komitəsinin xətti ilə daxilolmaların, 574 milyon manatı və ya 2,8 faizi isə digər gəlirlərin payına düşür.
2018-ci il dövlət büdcəsində neftin baza qiyməti 45 dollar/barrel səviyyəsində götürüləcək ki, bu da 2017-ci ildəki analoji baza qiymətindən 12,5 faiz və yaxud 5 dollar/barrel çoxdur. 2018-ci ilin büdcə xərclərinin ümumdaxili məhsulda xüsusi çəkisi 30,1 faiz təşkil edəcək ki, bu da 2017-ci ilə nisbətən 3,8 faiz bənd çoxdur. Mütləq ifadədə 2018-ci ilin dövlət büdcəsində xərclər 20,906 milyard manat həcmində proqnozlaşdırılır ki, bu da 2017-ci illə müqayisədə 2,965 milyard manat və ya 16,5 faiz artıqdır. 2018-ci il üçün büdcə kəsiri 778,7 milyon manat həcmində nəzərdə tutulub. 2018-ci il icmal büdcəsinin gəlirləri 23223,2 milyon manat məbləğində proqnozlaşdırılır.
Bununla yanaşı, gələn ilin dövlət büdcəsinin layihəsi hazırlanarkən 2018-2021-ci illərin makroiqtisadi proqnozları və qlobal iqtisadi prosesləri nəzərə alınıb.
Bütün bu deyilənlərin fonunda, 2018-ci ilin büdcəsi ümumilikdə son dörd ildə qeyri-neft sektorundakı inkişafın nə kimi nəticələrini özündə əks etdirir? Məsələyə münasibət bildirən ekspert Zakir Əhmədovun sözlərinə görə, gələnilki büdcədə qeyri-neft sektorundan daxilolmalar artacaq: “Əvvəla nəzərə almaq lazımdır ki, Azərbaycanın büdcə zərfi sosial-iqtisadi vəziyyət nəzərə alınmaqla hazırlanıb. Müşahidələr göstərir ki, gələn il real iqtisadi artım qeyri-neft sektorunda özünü daha çox göstərəcək. Bu da büdcəyə daxilolmaların həcmini artıracaq. Çünki son 3 ildə bu istiqamətdə bir sıra işlər görülüb. Geniş və sistemli islahatlar həyata keçirilib. İstər aqrar, istərsə də iqtisadiyyatın digər sahələrində çoxşaxəli işlər həyata keçirilib. Məqsəd ölkədə real sektorun inkişafına ciddi dəstək verməkdir. Görünən odur ki, aparılan iqtisadi siyasət makroiqtisadi təhlükələrin qarşısını almağa imkan verir. Son illər həyata keçirilən tədbirlər nəticəsində ölkədə qeyri-neft sektorunun payı əhəmiyyətli dərəcədə yüksəlib. 2018-ci ilin dövlət büdcəsi sosialyönümlüdür. Xərclərin 33,5 faizinin sosial sahəyə ayrılması bunu bir daha sübut edir. Biznes mühitinin yaxşılaşdırılması, maliyyə bazarlarının təkmilləşdirilməsi iqtisadiyyatın rəqabət qabiliyyətini artırıb.O baxımdan iqtisadiyyatla bağlı gözləntilər nikbindir”.
Vidadi ORDAHALLI
