Nüsrət İbrahimli: “Hansı bölgədə işçi qüvvəsi çoxdursa və məşğulluq digər yerlərlə müqayisədə daha yüksəkdirsə, sosial evlərin inşa olunması məqsədəuyğundur”
Əhalinin mənzil təminatının yaxşılaşdırılması istiqamətində Prezident İlham Əliyev tərəfindən verilən sərəncam əsasında paytaxt ərazisinin bəzi yerlərində sosial mənzillər inşa olunacaq. Artıq bu istiqamətdə işlər görülür. Ancaq sosial mənzillərin tək paytaxt Bakı ərazisində deyil, regionlarda da tikilməsi təklif olunur. Belə bir təkliflə Milli Məclisin ötən iclaslarının birində millət vəkili Aydın Mirzəzadə çıxış edib.
A.Mirzəzadə qeyd edib ki, regionlarda seçicilərlə görüşlər zamanı onlar da bu məsələnin həyata keçirilməsini istəyirlər. Onun fikrincə, Bakıda reallaşdırılan sosial mənzil layihəsi regionlarda da həyata keçirilməlidir.
Qeyd edək ki, bir müddət öncə Mənzil İnşaatı Dövlət Agentliyinin rəhbəri Samir Nuriyev bildirmişdi ki, regionlarda da belə mənzillər tikilməsi diqqət mərkəzində saxlanır: “Araşdırdıq və məlum oldu ki, hazırda əsas tələb Bakıdadır. Ona görə də birinci və ikinci yaşayış kompleksləri paytaxtda inşa edilir. Çox güman ki, üçüncü də Bakıda olacaq. Amma biz regionları da diqqətdə saxlayırıq və artıq bəzi ərazilərdə olmuşuq. Yəqin ki, regionda ilk belə kompleks əsas şəhərlərdən birində olacaq”.
Daşınmaz əmlak məsələləri üzrə ekspert Nüsrət İbrahimli bildirdi ki, paytaxt Bakı ilə yanaşı, regionlarda da sosial evlər tikilə bilər. Onun sözlərinə görə, bölgələrdə yaşayan insanların bir qismi mənzil almaq istəyir: “Lakin onların qeydiyyatı rayona olduğu üçün, paytaxtda inşa edilən sosial evlərdən ala bilmirlər. Bu səbəbdən də bölgələrdə sosial evlərin inşa olunması düzgün olar”.
Ekspertin bildirdiyinə görə, əhalinin sıx yaşadığı bölgələrdə sosial ev inşa oluna bilər: “Belə ki, orada yaşayan insanlar iş sarıdan çətinlik çəkirlər”.
N.İbrahimli hesab edir ki, iri şəhər və rayonlarda, məsələn, Lənkəran, Naxçıvan, Gəncə və Sumqayıtda sosial evlər tikilə bilər: “Hansı bölgədə işçi qüvvəsi çoxdursa və məşğulluq digər yerlərlə müqayisədə daha yüksəkdirsə, sosial evlərin inşa olunması məqsədəuyğundur”.
Həmsöhbətimiz onu da əlavə etdi ki, artıq bir neçə ildən sonra bu layihə əsasında insanların yaşayış problemi həll olunacaq.
Günel CƏLİLOVA
