2018-ci ilin dövlət büdcəsi iqtisadi risklər nəzərə alınaraq tərtib olunub və təmkinli büdcədir. Trend-in məlumatına görə, bunu Milli Məclisin birinci vitse-spikeri Ziyafət Əsgərov parlamentdə büdcə müzakirələri zamanı deyib.
Z.Əsgərov söyləyib ki, müxtəlif sahələri balanslaşdırmaq çox çətin olsa da, hökumət bu işin öhdəsindən gələ bilir.
Çıxışı zamanı Bakı-Astara dəmir yolunun köçürülməsi təklifi ilə çıxış edən Z.Əsgərov bildirib ki, sözügedən dəmir yolu bir başa dəniz sahilindən keçir və dənizə çıxışı bağlayır: “Suyun qabarma dövründə dəmir yolunun fundamenti yuyulur və belə olan halda, dəmir yolu korlanır. Düzdür, dəmir yolu təmir olunur. Lakin bu, problemdən çıxış demək deyil. Bu yolun köçürülməsi dənizkənarı infrastrukturun inkişafına böyük töhvə olar, eyni zamanda dəmir yolunun sürətini artırar və daha səmərəli fəaliyyətinə təsir edə bilər. Şimal-Cənub dəhlizi bir ildən sonra istifadəyə veriləcək. Bundan sonra onun köçürülməsi çətin olacaq. Çünki yük daşımaları çoxaldıqda köçürülmə prosesi çətinləşəcək”.
Maliyyə naziri Samir Şərifov Bakı-Astara dəmir yolunun Lənkəran və Astaradan keçən hissəsinin köçürülməsi ilə bağlı Ziyafət Əsgərovun təklifinə cavab verib. “APA-Economics”in məlumatına görə, S. Şərifov deyib ki, Prezident İlham Əliyevin tapşırığı ilə köçürülmə işlərinin həyata keçirilməsi üçün hazırlıq işləri görülür. “Bu işlərlə “Azərbaycan Dəmir Yolları” və İqtisadiyyat Nazirliyi məşğuldur”, - deyə nazir vurğulayıb.
